Берзи
На светските берзи внимателно, на Волстрит нови рекорди

На Волстрит минатата седмица цените на акции достигна нови рекордни нивоа, додека на другите берзи се тргуваше внимателно бидејќи вложувачите чекаат конкретни предлози на американскиот претседател Доналд Трамп за најавените економски политики.
На европските берзи минатата седмица се тргуваше внимателно. Притоа, франкфуртскиот DAX индекс порасна за 0,4 отсто, на 11.804 поени, додека лондонскиот FTSE ослаби за 0,8 отсто, на 7.243 поени, а парискиот CAC за 0,5 отсто, на 4.845 индексни поени.
На Токиската берза, пак, индексот Nikkei минатата седмица зајакна за 0,3 отсто, на 19.283 поени.
На њујоршки Волстрит минатата седмица индексот Dow Jones зајакна за 0,95 отсто, на 20.821 поен, додека S&P 500 се зголеми за 0,7 отсто, на 2.367 поени, а Nasdaq индексот за 0,1 отсто, на 5.845 поени.
Во петокот индексот Dow Jones достигна највисоко ново во историјата 11-ти ден по ред, бидејќи на Волстрит и натаму владее оптимистично расположение поттикнато од најавите на новиот претседател на САД за намалување на даноците,зголемување на инвестициите во инфраструктурата и олабавување на регулативите во некои сектори.
Позитивно на пазарите влијаеше и пораката на претседателот Трамп на состанокот со дваесетината директори на компании дека планира да врати во САД милиони работни места, иако подетално не објасни како има намера да го прекине долгогодишниот тренд на намалувањето на работните места во индустријата.
„Видовме досега голем број состаноци со деловните лидери и многу позитивни најави дека ќе се создадат подобри услови за работење. Некои најави од големите домашни компании, како и странските, им сугерираат на вложувачите дек настапува нова ера“, вели во анализата за Reuters Брус Меккејн, стратег во „Key Private Bank“.
Благодарејќи на тоа, од почетокот на ноември, кога Трамп победи во трката за Белата куќа, S&P 500 индексот порасна за повеќе од 10 отсто, и ги достигна највисоките нивоа во историјата. Но последните денови сепак се тргуваше претпазливо, па индексите не растеа позначително, бидејќи вложувачите ги чекаат конкретните предлози од администрацијата на Трамп.
Министерот за финансии на САД, Стивен Мнахин, рече дека овие денови сите политички потези веројатно оваа година ќе имаат само ограничено влијание.
Но, додека најавените политики на Трамп треба да го забрзаат растот на американската економија, исто така, би можеле да влијаат на јакнењето на инфлацијата, а тоа би можело да ја наведе американската централна банка Federal Reserve (Fed) на забрзување на темпото на зголемувањето на каматите.
Минатата седмица беше објавен записникот од последната седница на челниците на Fed кој покажа дека тие сметаат оти би можело наскоро да се зголеми цената на парите.
Така, сега на пазарот се проценува дека постојат 27 отсто шанси Fed да ги зголеми каматите уште на седницата во март, а 53 отсто дека тоа може да го стори во мај./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Берзи
„Волстрит“ падна – ни САД ни Кина не попушта

На Волстрит цените на акциите нагло паднаа, губејќи дел од добивките од претходниот ден, бидејќи царинската војна меѓу Вашингтон и Пекинг не покажува крај.
Индексот Dow Jones падна за 2,50 отсто, на 39.593 поени, додека S&P 500 потона за 3,46 отсто, на 5.268 поени, а индексот Nasdaq за 4,31 отсто, на 16.387 поени.
Така, индексите загубија дел од добивките од претходниот ден, кога S&P 500 скокна за историски 9,5 отсто, а Nasdaq повеќе од 12 отсто.
По големите промени во последниве денови, S&P 500 сè уште е во пад од околу 7 отсто од средината на минатата недела, кога американскиот претседател Доналд Трамп најави дополнителни, реципрочни царини за американскиот увоз.
Откако Трамп во средата ја одложи примената на тие царини за 90 дена, многу земји вчера изјавија дека се подготвени да преговараат. Меѓу другите и Европската унија, која ги одложи своите контрамерки против царините на Трамп.
Но, царинската војна меѓу Вашингтон и Пекинг продолжува бидејќи Трамп ја зголеми вкупната царинска стапка за увоз на кинески стоки на 145 отсто, 125 отсто реципрочни царини и претходните 20 отсто поврзани со кризата со фентанил.
Кина, пак, од вчера применува царина од 84 отсто за увоз на американски стоки, покрај претходните 20 отсто на одредена група производи и вели дека нема да отстапи.
„Тешко е за инвеститорите да одлучат да купат акции со ваква нестабилност и неизвесност. Тие се загрижени за тарифите бидејќи е тешко да се процени како тоа ќе влијае на економиите“, рече Пол Нолте, аналитичар во Марфи и Силвест.
Затоа инвеститорите вчера не ги охрабрија подобрите од очекуваните податоци за ублажувањето на инфлацијата во САД во март. Се проценува дека инфлацијата најверојатно ќе се зголеми во наредните месеци поради воведувањето царини, додека челниците на американската централна банка велат дека нема да брзаат со намалување на каматните стапки, туку чекаат податоци кои ќе покажат како царините влијаеле на економскиот раст и на инфлацијата.
На европските берзи вчера пораснаа акциите. Лондонски FTSE индекс зајакна 3,04 отсто, на 7.913 поени, додека франкфуртски DAX скокна за 4,53 отсто, на 20.562 поени, а париски CAC зајакна 3,83 отсто, на 7.126 поени.
Берзи
Доларот нагло падна, еврото зајакна

На девизните пазари вредноста на доларот во однос на кошницата валути драстично падна минатата недела, бидејќи инвеститорите сметаат дека поради забавувањето на инфлацијата во САД заврши циклусот на зголемување на каматните стапки од страна на американската централна банка. Индексот на доларот, кој ја следи вредноста на САД во однос на шесте најважни светски валути, потона минатата недела за 1,9 отсто, на 103,81 поен, што е најниско ниво од почетокот на септември.
Истовремено, доларот падна за 2,1 отсто во однос на европската валута, па цената на еврото достигна 1,0910 долари. Остриот пад на курсот на доларот уследи по објавувањето во вторникот дека стапката на инфлација во САД се лизна на 3,2 отсто во октомври, од 3,7 отсто во септември.
И низа други извештаи потврдија дека инфлацијата се намалува, што ја поддржа тезата дека ФЕД нема да има потреба дополнително да ја заостри монетарната политика. Од март минатата година, ФЕД ги зголеми клучните каматни стапки за 5,25 процентни поени за да ја ограничи инфлацијата.
Сепак, на последните две седници челниците на ФЕД ги оставија каматните стапки непроменети, па инвеститорите сметаат дека циклусот на зголемување на цената на парите е завршен, иако од ФЕД велат дека е можно дополнително заострување на монетарната политика.
Во наредниот период, движењата на пазарот ќе зависат главно од шпекулациите за тоа кога ФЕД би можел да започне со намалување на каматните стапки. На пазарот на пари се проценува дека првото намалување на каматните стапки на ФЕД би можело да се случи во мај следната година, а до крајот на следната година каматните стапки би можеле да се намалат вкупно за еден процентен поен.
Берзи
Светските берзи драстично паѓаат, можно е дополнително зголемување на каматите

На светските берзи цените на акциите нагло паднаа минатата недела поради растот на приносите на обврзниците и пораката на претседателот на ФЕД Џером Пауел дека централната банка може дополнително да ги зголеми каматните стапки. На Волстрит, Доу Џонс индексот минатата недела падна за 1,6 отсто, на 33.127 поени, додека S&P 500 се лизна за 2,4 отсто, на 4.224 поени, а индексот Nasdaq се намали за 3,2 отсто, на 12.983 поени.
На берзата негативно влијаеше растот на приносите на американските државни обврзници. Во петокот приносите на 10-годишните обврзници се пробија над нивото од 5 отсто за прв пат по 16 години. Ова може да влијае на каматите на хипотеките и автомобилските заеми, каматите на кредитните картички… Покрај тоа, повисоките приноси на обврзниците ја намалуваат привлечноста на акциите бидејќи на инвеститорите им нудат добри приноси без никаков ризик.
Во такви околности, инвеститорите се повлекуваат од поризични инвестиции, како што се акциите, и бараат засолниште за својот капитал во инвестиции кои се сметаат за побезбедни во несигурни времиња, како што е златото. Како резултат на тоа, цената на унца злато се движи близу највисокото ниво во последните два месеци, околу 1.980 долари.
Поради сето ова, инвеститорите не беа охрабрени ниту од кварталните деловни резултати, иако поголемиот дел од компаниите од индексот S&P 500, кои досега објавуваа извештаи, остварија поголема заработка од очекуваната.
И на европските берзи цените на акциите драстично паднаа минатата недела. Лондонскиот FTSE индекс се лизна за 2,6 отсто, на 7.402 поени, додека франкфуртски DAX потона за 2,5 отсто, на 14.798 поени, а париски CAC 2,7 отсто, на 6.816 поени.