Берзи
На Волстрит рекорд на Dow Jones, индексот S&P падна, пад и во Европа

На њујоршки Волстрит во четвртокот индексот Dow Jones достигна ново рекордно ниво, благодарејќи на растот на финансискиот и енергетскиот сектор, додека индексите S&P 500 и Nasdaq паднаа поради падот на цените на акциите во технолошкиот сектор, а паднаа и најважните европски индекси.
На европските берзи цените на акциите во четвртокот паднаа, па лондонскиот FTSE ослабе за 0,45 отсто, на 6.752 поени, додека франфуртскиот DAX се лизна за 1,0 процент, на 10.534 поени, а парискиот CAC за 0,39 отсто, на 4.560 индексни поени.
Во Њујорк индексот Dow Jones зајакна за 0,36 отсто, на рекордните 19.191 поен, додека S&P 500 падна за 0,35 проценти, на 2.191 поен, а Nasdaq се лизна за 1,36 отсто, на 5.251 индексен поен.
Новото највисоко ниво на Dow Jones индексот во историјата, доаѓа благодарејќи на растот на цените на акциите во финансискиот сектор, за 1,7 отсто. Поддршка на овој сектор му даваат најавите на новоизбраниот американски претседател Доналд Трамп за олабавување на регулацијата во банкарството, но и процените дека поради јакнењето на инфлацијата американската централна банката Federal Reserve (Fed) во следниот период ќе го забрза темпото за зголемување на каматните стапки.
Трговците на пазарите на парите проценуваат дека постојат околу 90 отсто шанси дека Fed во декември ќе ги зголеми клучните каматни стапки, што и требало позитивно да влијае врз банките.
Индексот S&P на енергетскиот сектор зајакна, пак, за дополнителни 0,3 отсто, бидејќи цените на нафтата скокнаа за повеќе од 4 отсто, продолжувајќи го својот подем од средата. Имено, тогаш цените на нафтата скокнаа за над 9 отсто откако членките на Организацијата на земјите извознички на нафта OPEC постигнаа договор за намалување на производството, што треба да ја ублажи нерамнотежата на пазарите меѓу преголемата понуда и недоволната побарувачка и така да ја поткрепи цената на „црното злато“.
Од друга страна, пак, веќе со денови под притисок се цените во технолошкиот сектор. Од 8-ми ноември, кога Трамп победи во трката за Белата куќа, индексот S&P 500 зајакна за над 2 отсто, додеа технолошкиот сектор во тој период загуби речиси 3 отсто. Во четвртокот овој сектор падна за 2,3 отсто, при што акциите на „Microsoft“ поевтинија за 1,8, а на „Facebook“ за 2,8 отсто.
„Во атмосферата со високите каматни стапки сакате да плаќате помалку за да остварите заработка на акциите. Се чини дека сега под притисок се акциите со поголем сооднос меѓу цената и заработката“, вели за Reuters Ким Форст, аналитичар во компанијата „Fort Pitt Capital Group“./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Берзи
„Волстрит“ падна – ни САД ни Кина не попушта

На Волстрит цените на акциите нагло паднаа, губејќи дел од добивките од претходниот ден, бидејќи царинската војна меѓу Вашингтон и Пекинг не покажува крај.
Индексот Dow Jones падна за 2,50 отсто, на 39.593 поени, додека S&P 500 потона за 3,46 отсто, на 5.268 поени, а индексот Nasdaq за 4,31 отсто, на 16.387 поени.
Така, индексите загубија дел од добивките од претходниот ден, кога S&P 500 скокна за историски 9,5 отсто, а Nasdaq повеќе од 12 отсто.
По големите промени во последниве денови, S&P 500 сè уште е во пад од околу 7 отсто од средината на минатата недела, кога американскиот претседател Доналд Трамп најави дополнителни, реципрочни царини за американскиот увоз.
Откако Трамп во средата ја одложи примената на тие царини за 90 дена, многу земји вчера изјавија дека се подготвени да преговараат. Меѓу другите и Европската унија, која ги одложи своите контрамерки против царините на Трамп.
Но, царинската војна меѓу Вашингтон и Пекинг продолжува бидејќи Трамп ја зголеми вкупната царинска стапка за увоз на кинески стоки на 145 отсто, 125 отсто реципрочни царини и претходните 20 отсто поврзани со кризата со фентанил.
Кина, пак, од вчера применува царина од 84 отсто за увоз на американски стоки, покрај претходните 20 отсто на одредена група производи и вели дека нема да отстапи.
„Тешко е за инвеститорите да одлучат да купат акции со ваква нестабилност и неизвесност. Тие се загрижени за тарифите бидејќи е тешко да се процени како тоа ќе влијае на економиите“, рече Пол Нолте, аналитичар во Марфи и Силвест.
Затоа инвеститорите вчера не ги охрабрија подобрите од очекуваните податоци за ублажувањето на инфлацијата во САД во март. Се проценува дека инфлацијата најверојатно ќе се зголеми во наредните месеци поради воведувањето царини, додека челниците на американската централна банка велат дека нема да брзаат со намалување на каматните стапки, туку чекаат податоци кои ќе покажат како царините влијаеле на економскиот раст и на инфлацијата.
На европските берзи вчера пораснаа акциите. Лондонски FTSE индекс зајакна 3,04 отсто, на 7.913 поени, додека франкфуртски DAX скокна за 4,53 отсто, на 20.562 поени, а париски CAC зајакна 3,83 отсто, на 7.126 поени.
Берзи
Доларот нагло падна, еврото зајакна

На девизните пазари вредноста на доларот во однос на кошницата валути драстично падна минатата недела, бидејќи инвеститорите сметаат дека поради забавувањето на инфлацијата во САД заврши циклусот на зголемување на каматните стапки од страна на американската централна банка. Индексот на доларот, кој ја следи вредноста на САД во однос на шесте најважни светски валути, потона минатата недела за 1,9 отсто, на 103,81 поен, што е најниско ниво од почетокот на септември.
Истовремено, доларот падна за 2,1 отсто во однос на европската валута, па цената на еврото достигна 1,0910 долари. Остриот пад на курсот на доларот уследи по објавувањето во вторникот дека стапката на инфлација во САД се лизна на 3,2 отсто во октомври, од 3,7 отсто во септември.
И низа други извештаи потврдија дека инфлацијата се намалува, што ја поддржа тезата дека ФЕД нема да има потреба дополнително да ја заостри монетарната политика. Од март минатата година, ФЕД ги зголеми клучните каматни стапки за 5,25 процентни поени за да ја ограничи инфлацијата.
Сепак, на последните две седници челниците на ФЕД ги оставија каматните стапки непроменети, па инвеститорите сметаат дека циклусот на зголемување на цената на парите е завршен, иако од ФЕД велат дека е можно дополнително заострување на монетарната политика.
Во наредниот период, движењата на пазарот ќе зависат главно од шпекулациите за тоа кога ФЕД би можел да започне со намалување на каматните стапки. На пазарот на пари се проценува дека првото намалување на каматните стапки на ФЕД би можело да се случи во мај следната година, а до крајот на следната година каматните стапки би можеле да се намалат вкупно за еден процентен поен.
Берзи
Светските берзи драстично паѓаат, можно е дополнително зголемување на каматите

На светските берзи цените на акциите нагло паднаа минатата недела поради растот на приносите на обврзниците и пораката на претседателот на ФЕД Џером Пауел дека централната банка може дополнително да ги зголеми каматните стапки. На Волстрит, Доу Џонс индексот минатата недела падна за 1,6 отсто, на 33.127 поени, додека S&P 500 се лизна за 2,4 отсто, на 4.224 поени, а индексот Nasdaq се намали за 3,2 отсто, на 12.983 поени.
На берзата негативно влијаеше растот на приносите на американските државни обврзници. Во петокот приносите на 10-годишните обврзници се пробија над нивото од 5 отсто за прв пат по 16 години. Ова може да влијае на каматите на хипотеките и автомобилските заеми, каматите на кредитните картички… Покрај тоа, повисоките приноси на обврзниците ја намалуваат привлечноста на акциите бидејќи на инвеститорите им нудат добри приноси без никаков ризик.
Во такви околности, инвеститорите се повлекуваат од поризични инвестиции, како што се акциите, и бараат засолниште за својот капитал во инвестиции кои се сметаат за побезбедни во несигурни времиња, како што е златото. Како резултат на тоа, цената на унца злато се движи близу највисокото ниво во последните два месеци, околу 1.980 долари.
Поради сето ова, инвеститорите не беа охрабрени ниту од кварталните деловни резултати, иако поголемиот дел од компаниите од индексот S&P 500, кои досега објавуваа извештаи, остварија поголема заработка од очекуваната.
И на европските берзи цените на акциите драстично паднаа минатата недела. Лондонскиот FTSE индекс се лизна за 2,6 отсто, на 7.402 поени, додека франкфуртски DAX потона за 2,5 отсто, на 14.798 поени, а париски CAC 2,7 отсто, на 6.816 поени.