Економија
Broadstone Security во Македонија ќе произведува оружје за НАТО Алијансата

Американската компанија Broadstone Security со инвестиција од пет милиони долари во Македонски Брод ќе отвори фабрика каде што ќе се произведуваат муниција и лично вооружување според стандардите на НАТО, наменети за земјите членки на Алијансата. Се очекува фабриката да биде оперативна до мај следната година, а почетното производство да започне во јули 2017-та година.
„Тука сме со нашите пријатели со кои делиме визија и стремеж за производство на најточна муниција, како и иновативно и квалитетно оружје за нашата војска, полиција и лични корисници. Задоволни сме што влегуваме во македонската одбранбена индустрија и со нетрпение ја очекуваме можноста за соработка со македонските лидери”, изјави основачот и извршен директор на Broadstone Security, Денис Прат.
Според министерот за одбрана Зоран Јолевски, инвестицијата има повеќе значења, а покрај отворањето на нови работни места, ова ќе биде и чекор напред во зајакнувањето на борбената готовноста на АРМ. “Еден од проектите за модернизација на АРМ е конверзија на личното наоружување на АРМ со она на НАТО членките. САД ќе го финансираат проектот, значи со оваа инвестиција ќе имаме производител територијата на Македонија за муниција која во иднина ќе ја користи АРМ”, рече Јолевски.
Според него, инвестицијата исто така ќе придонесе и за македонските евроатлански интеграции. Проектот го поздрави и генералот Џим Џонс, поранешен советник за национална безбедност на американскиот претседател Барак Обама.
“Додека бев во НАТО, Алијансата се прошири од 19 на 23 членки. Ние ја поставивме и сцената за прием на нови членки на Алијансата, а се надевам дека ќе бидам таму и кога Македонија ќе стане полноправна членка. Но додека го чекаме тој ден, сметам дека ова што Македонија го прави овде е многу важно. Сето тоа е важно за способностите за Македонија и економскиот просперитет, како и за професионализмот на АРМ. Истовремено ова ќе придонесе и за виталноста и кредибилноста на НАТО како една голема меѓународна организација”, рече Џонс.
Фабриката на жителите од Македонски Брод ќе им донесе 200 вработувања, а американската компанија одлуката за инвестирање во земјава ја донела откако разгледала и можности во Србија и Романија./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
УЈП: Даночните обврзници имаат рок до петок да поднесат ДДВ – 04 пријави

Даночните обврзници имаат рок до петок да поднесат ДДВ – 04 пријави, потсетува Управата за јавни приходи.
„Со цел да се обезбеди непречено поднесување на ДДВ-04 пријавите за овој даночен период, ИТ тимовите на УЈП ќе работат и во попладневните часови. Процесот на поднесување на ДДВ – 04 пријавите се одвива непречено и заклучно со вчерашниот ден, 22 април 2025 година од очекуваните 40.885, вкупно 12.202 даночни обврзници поднеле ДДВ-04 пријави, што претставува близу 30% од вкупниот број на даночни обврзници кои треба да поднесат ДДВ-04 пријави“, влеат од УЈП.
Од таму апелираат даночните обврзници кои имаат обврска да поднесат ДДВ-04 пријави за овој даночен период, а сè уште не ги поднеле истите, уште денес да ја достават потребната документација до сметководителите со цел до законскиот рок 25 април 2025 година (петок) да ги исполнат своите даночни обврски.
„Навременото поднесување на ДДВ-04 пријавите не е само законска обврска, туку и клучен фактор за финансиска стабилност и градење на довербата во институциите“, велат од УЈП.
Економија
Извршена исплата од 224.748.332 денара кон 7.826 лица за остварено производство на овошје

Денеска се изврши исплата од 224.748.332,00 денари кон 7.826 лица.
Исплатата како што информираат од Министерството за земјоделство, се однесува на дополнителните директни плаќања за остварено производство на овошје, мерка 1.9 Дополнителни директни плаќања од подмерка 1.8. за остварено производство на овошје од Програмата за финансиска поддршка во земјоделството за 2024 година.
Корисници на оваа подмерка се земјоделските стопанства кои имаат засадени површини со следните овошни видови: јаболка, слива, праска, вишна, цреша, кајсија, круша, јапонско јаболко, лешник, орев, бадем и калинка, а оствареното производство е предадено на регистриран откупувач, вклучително и произведените овошни култури за потребите на сопствениот преработувачки капацитет или е користено за домашни потреби или е продадено на пазар.
Грижата кон земјоделецот продолжуваме да ја покажуваме на дело, велат од МЗШВ.
Економија
Се намалува цената на мазутот, а на дизелот и на бензините не се менува

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 0,11 % во однос на одлуката од 14.04.2025 година.
Од 23.4.2025 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 71,50 (денари/литар)
Моторен бензин ЕУРОСУПЕР БС – 98 73,50 (денари/литар)
Дизел гориво ЕУРОДИЗЕЛ БС (Д-Е V) 64,00 (денари/литар)
Масло за горење Екстра лесно 1 (ЕЛ-1) 64,00 (денари/литар)
Мазут М-1 НС 36,780 (денари/килограм)
Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) не се менуваат.
Малопродажната цена на Мазутот М-1 НС се намалува за 0,212 ден/кг и сега ќе изнесува 36,780 ден/кг.
Напоменуваме дека ова се максималните цени на нафтените деривати од 00:01 часот на 23.4.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 3,969%, кај дизелот за 3,456%, кај екстра лесното масло за 2,637% и кај мазутот зголемувањето е за 2,133%.
Курсот на денарот во однос на доларот во изминатиот период по кој беа формирани цените со претходната пресметка е понизок за 3,0273%.