Економија
ССК: Приватниот сектор во фокусот на ЦЕФТА недела 2016
Сојузот на стопански комори на Македонија (ССК) е панелист на конференцијата ЦЕФТА Недела 2016 – CEFTA WEEK 2016, која годинава се одржува во Подгорица, по повод 10 годишнината од формирањето и потпишувањето на ЦЕФТА договорот.
Главна тема на ЦЕФТА неделата за 2016 година е важноста од имплементирањето на ЦЕФТА договорот, со посебен акцент на приватниот сектор.
„ЦЕФТА договорот имаше за цел да придонесе во стимулирањето на економскиот развој, олеснување и зголемување на трговијата помеѓу земјите членови и нивно интегрирање во глобалната економија. Во насока на зголемување на трговската размена потребно е поголемо вклучување на приватниот сектор во активностите и мерките за елиминирање на одредени нетрговски бариери, а вклучувањето на градежните услуги, дистрибутивните, потоа услуги за животна средина, како и рекреативни, културни и спортски услуги, ќе значи дополнителен стимул и можност за зголемување на трговијата и економската соработка помеѓу земјите членки на ЦЕФТА договорот. Области кои се предмет на либерализација се и деловните и професионални услуги, потоа туристички, комуникациски, образовни, здравствени, финансиски, како и транспортни услуги“, рече извршниот директор на ССК, Митко Алексов, како говорник на панел дискусија: „Подобра инволвираност на приватниот сектор во мониторирање на имплементацијата на ЦЕФТА договорот“.
Во првите две години од потпишувањето на договорот во периодот 2006 – 2008 година, Република Македонија со земјите од ЦЕФТА 2006 остваруваше 28% од вкупната надворешно трговска размена (2,1 милијарди американски долари), потоа следеше период на намалување и стагнација, а годинава размената со земјите членки на ЦЕФТА договорот е на ниво од 10,7% од вкупната надворешно трговска размена. Сличен е трендот и со останатите земји, бидејќи помеѓу 60-70% од својата надворешно трговска размена ја остваруваат со Европската Унија.
ЦЕФТА Договорот е потпишан на 19 декември 2006 од страна на Албанија, Босна и Херцеговина, Република Бугарија, Република Хрватска, Република Македонија, Молдавија, Црна Гора, Романија, Србија и Косово. Романија, Бугарија и Хрватска се приклучија кон Европската унија, со што се повлекоа од ЦЕФТА. Главните цели на Договорот за основање на Централноевропскиот договор за слободна трговија (ЦЕФТА) се усогласување на економските односи меѓу државите преку развој на трговијата, комерцијалните активности, зголемувањето на животниот стандард и обезбедување на подобри можности за вработување, како и зголемување на продуктивноста со цел постигнување на финансиска стабилност./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.