Иновативен модел на искуствено учење во кое студентите ќе може активно да ја искусат бизнис околината преку работење на реални проекти за реални компании, воведе Seavus Едукативниот и Развоен Центар (SEDC).

Првиот бизнис симулатор во Македонија кој има за цел да ја зголеми вработливоста кај студенти беше промовиран во четвртокот во просториите на SEDC.

Станува збор за уникатен модел за напредна практична обука на студенти, дизајниран според специјална тренинг програма каде тие добиваат реални работни улоги во рамки на симулирани бизниспроцеси надгледувани од менторска компанија.

Директорот на Seavus Едукативниот и Развоен Центар, Весна Иваноска рече дека во работата на бизнис стимулаторот се вклучени партнерски компании кои ќе ангажираат студенти да работат на талентирани реални проекти

„SEDC ќе го следи индивидуалниот развој за секој студент и ќе им има подготвени комплетни портфолија за студентите кои ќе им ги дава на партнерски компании кои сакаат за брзо време да регрутираат кадри“, рече Ивановска.

Таа информираше дека првиот тим, кој ќе стартува со искуственото учење,  е составен од 12 најдобри студенти од академијата на СЕДЦ кои биле интервјуирани и од партнерските компании, за кои ќе работат на два реални проекти.

Ивановска рече дека просторијата во која е сместен бизнис симулаторот е конципирана да биде топло катче во кое студентите ќе се чувствуваат како дома заедно со своите тренери.

„Одиме сериозен чекор понатаму во градењето на толку потребните ИТ професионалци кои во Бизнис симулаторот, покрај теоретските и техничките компетенции, ќе искусат и усвојат вештини за работа во реални бизнис процеси, после кои ќе бидат целосно спремни  да одговорат на потребите на компаниите“ изјави Иваноска.

Проектот е поддржан од Програмата за зголемување на пазарната вработливост (Increasing Market Employability – IME) на Швајцарската Агенција за развој и соработка (SDC) имплементирана од Swisscontact (Швајцарска фондација за техничка соработка) во партнерство со ПРЕДА Плус.

Катерина Штокер, заменик директор на делегација и кооперација нa швајцарската амбасада во Скопје, истакна дека СЕДЦ Бизнис Симулаторот е прв од овој вид во Македонија и регионот кој комбинира обука и бизнис пракса како иновативно решение за клучните предизвици на ИТ секторот – а тоа се потребите за професионалци со специфични вештини кои треба да ги пресретнат бизнис потребите на ИТ компаниите.

„Швајцарија е горда што ја поддржува оваа иницијатива и преку тоа им овозможува на младите луѓе да добијат брз пристап до релевантни вештини и клучни работодавци од динамичниот ИТ сектор во Македонија”, рече Штокер.

Борче Јанкулоски, директор на Пред Плус рече дека софтерската и ИТ индустија во Македонија е модем и вакви бизнис симулатори се еден од начините да се спречи одливот на мозоци од Македонија.

  “Подобрената соработка меѓу образовните институции и бизнисите од индустријата за софтвер и ИТ услуги е клучна за развој на вештини и квалификуван кадар според потребите на пазарот на работна сила кој придонесува за поголема вработливост на младите и жените“, рече Јанкуловски.

Бизнис симулаторот е завршна фаза во рамки на едногодишните Академии на SEDC. Во овие програми учесниците, организирани во функционални тимови, влегуваат во системот на бизнис симулација на конкретен проектен циклус под менторство на една од вклучените компании.

Комплексноста на проектите, степенот на независност и динамичниот мониторинг на прогресот ќе бидат одредени од ментор компанијата, а ќе бидат обезбедени и постојаниот надзор, административната и логистичка поддршка. /крај/