Српската влада се откажа од купопродажниот договор за металуршкиот комбинат „Железара Смедерево“ за којашто беше заинтересирана американската челичарница „Esmark Inc“, изјави во вторникот на специјалната прес-конференција премиерот Александар Вучиќ кој рече и дека таквата одлука била „тешка“ и е донесена од „повеќе причини“.

„Не добивме гаранции дека ќе го задржат нашиот обртен капитал или дека нема да бидат потрошени сите суровини по што фабриката би била напуштена“, изјави српскиот премиер Александар Вучиќ.

Моменталните резерви од суровини во железарницата се процените на 170 милиони американски долари. Српската влада, покрај стравувањето дека потоа комбинатот би бил напуштен како непрофитабилен со образложение за лошите состојби на пазарите, исто така, бараше во првите девет месеци да го контролира протокот на суровини, нарачките и продажбите на челикот, со што не биле согласни претставниците на американската компанија.

Според непотврдените информации кои претходно се појавија во белградските медиуми, од „Esmark Inc“ генерално одбиле да и’ гарантираат на владата на Србија работење на железарницата во долгорочна перспектива и имале намера да го намалат бројот на работниците.

Сепак, според Вучиќ, тоа нема да биде крајот на смедеревската железарница, пренесува Танјуг.

„Во понеделник одиме на јавен повик за потпишување на менаџерски договор, бидејќи никогаш не сме умееле да заработуваме пари, никој никогаш во Србија тоа не го знаел. Очекувам до крајот на март Железарницата да почне да работи со зголемен капацитет и до крајот на годината да почне да работи и втората печка“, рече Вучиќ.

Смедеревската фабрика, којашто датира од 1913 година а од 2003 година беше во сопственост на американската корпорација „U.S. Steel“, се покажа како непрофитабилна и беше на работ на затворање. Проектираниот капацитет на комбинатот изнесува 2,2 милиони тони челик годишно, и според процените на српското министерство за финансии неговиот удел заедно со компаниите поврзани со неговото производство во тамошниот бруто домашен производ (БДП) би можел да биде меѓу 1,2 и 1,5 отсто.

Српската влада бара стратешки партнер за докапитализација на железарницата во Смедерево кој би добил удел од 80,01 отсто во компанијата. Американската „Esmark Inc“ беше единствената која ги задоволуваше критериумите од тендерот кој беше објавен на 9-ти јануари. Поединостите од условите за продажбата не беа објавени, но во медиумите се претпоставуваше дека државата ќе ги преземе сите долгови на комбинатот. Истовремено беше објавено дека владата ќе ги заврши преговорите со новиот сопственик до крајот на јануари, но двете страни до овој период не успеале да се договорат.

Оценувајќи ја ситуацијата, премиерот Вучиќ на прес-конференцијата изјави дека Србија „не ја загубила ниту битката, ниту војната“ за оваа фабрика. „Сакаме да го зголемиме производството во железарницата од сегашните 320 тони на милион тони годишно, а во ноември ќе ја пуштиме во погон втората печка и ќе го зголемиме производството за 1,5 милиони тони“, рече.

„Железара Смедерево“ е позната во регионот како производител на челични производи за топол и ладен валан челик и лим. Со години оваа фабрика е еден од најголемите проблематични во Србија, нанесувајќи му на буџетот повеќе од 100 милиони долари загуба на годишно ниво, а нејзините долгови се проценуваат на повеќе стотици милиони долари.

За да го избегне затворањето на комбинатот, владата на Србија во 2012 година го откупи од американската „U.S. Steel“ за симболична сума од еден долар. Оттогаш, српските власти се во потрага по стратешки партнер за компанијата. Имаше неколку обиди таа да биде продадена на тендер, а еден од главните кандидати се сметаше дека е руски „Уралвагонзавод“, но зделката не се оствари. Можното затворање или стечај на комбинатот, во кој се вработени околу пет илјади работници, има големо знаење за социјалната стабилност на Србија./крај/мф/сн

Извор: Макфакс