Четвртото издание на Skopje Design Week оваа година ќе се одржи од 23. до 28. септември во Куршумли Ан  под мотото „Четврта смена“.   

Skopje Design Week ќе биде обвиткан со елегантен француски шмек од причина што оваа година Франција се јавува како земја во фокус. Претставени ќе бидат 10 реномирани дизајнери и француски дизајн студија.  Француските дизајнери ќе бидат дел од целокупната програма и разменуваат искуства и визии со локалните експерти, а најавена е нивна посета на македонски фабрики за да се стимулира соработка.  

Практичните работилници ќе бидат зголемени и во квалитет и во квантитет со директна поврзаност и вмрежување со деловната субјекти. Новина е гастро талент зоната на Горење, а музичката програма ќе вистински поклон за публиката.

Инаку, пријавувањето на компании, нови брендови, млади иноватори, дизајнери и институции, за учество во годинешниот SDW, е во тек. Сите оние кои сакаат да ја запознаат јавноста со своите новитети, бараат и нудат конкретни можности за вмрежување, се во потрага по вистински партнери за соработка, имаат можност до 20 јули да се пријават во најразлични категории. Целта и оваа година е да го насочи креативниот потенцијал во унапредување на економската клима и општеството. Четвртата смена е најавена од организаторите како досега најдобро издание.

Оваа година продолжува соработката на SDW и винарската визба „Тиквеш“ што почна лани со меѓународниот повик за дизајн на етикета на врвно македонско вино чиј конкретен резултат беше лансирањето на пазарот на виното „Шардоне“ со етикета која ја освои првата награда на авторката Дијана Димитриевска.

„Задоволни од резултатите од минатогодишниот конкурс, со задоволство ја продолжуваме  соработката со SDW. Оваа година одиме чекор понапред со тоа што од креативците во земјава и светот, преку меѓународен повик, ќе побараме  интегрално решение за брендирање на нашиот нов автентичен производ – гроздовиот мед. На ваков начин, сакаме да креираме уникатен идентитет на овој природен и исклучително здрав производ кој и досега го произведувавме, но не комерцијално. Поради сѐ поголемата побарувачка, сметаме дека треба да го направиме препознатлив и достапен за потрошувачите во Македонија и пошироко“, изјави Елена Младеновска Јеленковиќ, маркетинг менаџер во винарската визба „Тиквеш“.      

Конкурсот ќе биде отворен до 5-ти септември оваа година, а изборот на најдобро решение за брендирање на новиот производ ќе го изврши меѓународно жири. Наградата за најдобро решение изнесува две илјади евра.крај/мф