Грчката влада побара во саботата од Меѓународниот монетарен фонд (ММФ) да го разјасни документот кој се појави на WikiLeaks, според кој претставниците на ММФ се заканувале дека ќе ја банкротираат Грција, доколку таа не се согласи со новите мерки за кастрење, кои не се дефинирани во договорот со меѓународните кредитори на Грција за добивање на третиот пакет финансиска помош во висина од 86 милијарди евра, а тоа да се случи во контекст на референдумот за останување или излегување на Велика Британија од Европската унија во јуни.

Според објавените документи, челникот на европскиот оддел на ММФ, Пол Томсен, шефот на мисијата на ММФ во Грција Делија Велкулеску и шефицата на секторот на Фондот Ива Петрова во текот на инспекциското советување на 19-ти март разгледувале како да се изврши притисок врз Атина, и се заканувале да ја банкротираат земјата, доколку таа не се согласи на новите жестоки мерки за штедење, кои не се дефинирани во меморандумот. Томсен наводно зборувал за намерата да ги заостри оцените за тоа како е спроведена програмата за реформите до јули.

„Владата на Грција бара појаснение од ММФ, дали стремежите да се создадат услови за банкротирање на Грција, набрзо по референдумот во Британија, е официјалната позиција на Фондот“, изјави портпаролката на грчката влада Олга Геровасили, во писмена изјава испратена до светските агенции.

Објавувањето на споменатата информација на интернет ресурсот познат по обелоденување тајни документи од безбедноста и дипломатијата, предизвика жестоки реакции во Атина.

Грчкиот премиер Алексис Ципрас во саботата свика итен состанок на потесниот дел од неговиот кабинет со учество на министрите за надворешни работи и за финансии, Никос Коѕијас и Евклид Цакалотос.

Ципрас, исто така, ги информирал шефот на државата Прокопис Павлопулос и претседателот на парламентот Никос Вуцис, како и ги известил европските челници и функционери, изјавил претставник на неговиот кабинет за грчките новинари. Премиерот побарал од потпретседателот на Европскиот парламент Димитрис Пападимулис да ги информира европратениците и парламентарните работни групи.

„На крајот, премиерот веднаш испрати официјален допис до Кристин Лагард“, челничката на ММФ, изјавил претставникот на кабинетот на Ципрас.

„Грција се придржува до договореното, и таа бара појаснување на позициите на ММФ. Ги информирав челниците на земји и институции за нашите позиции. Не треба никому да дозволиме да се игра со оган и да ја оставиме земјата и Европа без заштита. Некои сакаат да предизвикаат нова криза во Грција, за да влијаат врз референдумот во Британија и да ѝ наштетат на Европа“, рекол Ципрас во телефонскиот разговор со грчкиот претседател Павлопулос.

Претседателот истакнал дека по воспоставувањето на Европскиот механизам за стабилност, неговите експерти би можел да ја преземат мисијата на ММФ. Според Павлопулос, искуството и знаењата на ESM е очигледно поголемо отколку на оние во ММФ, земајќи ја предвид историјата на вториот.

Во владата во Атина сметаат дека шефот на европскиот оддел на ММФ, Томсен, константно искажува нетрпеливост кон грчката политика, рекол за агенцијата РИА неименуван извор во кабинетот на премиерот.

Треба да се одбележи и дека споменатиот извештај беше објавен токму на денот на враќањето на квартетот меѓународни кредитори во Атина./крај/мф/сн

Извор: Макфакс