Грчките функционери прават сé што е во нивна моќ за да позајмат 15 милијарди евра и така да го избегнат банкротот кој ѝ се заканува на државата, а најголемата надеж ја полагаат во Кина и во Русија, пишуваат во саботата грчките и германските медиуми.

Грчкиот неделник Карфи објави, повикувајќи се на владини функционери, дека Грција се надева на заем од Кина во износ од 10 милијарди евра, како аконтација за користење на пристаништето во Пиреа во иднина и влог за идните вложувања во грчката железничка мрежа.

Друг атински неделник, Агора, кој исто така се повикува на владини извори, пак, пишува дека Атина се надева на заем од Русија во износ меѓу 3 и 5 милијарди евра, коишто би биле предвложување за надоместоците во врска со добивката од користењето на планираниот гасовод, познат под работниот наслов „Турски тек“.

Овој гасовод кога ќе биде изграден ќе го донесе рускиот природен гас до турско-грчката граница. Грчкиот премиер Алексис Ципрас во текот на неодамнешната посета на Москва со рускиот претседател Владимир Путин разговараше за можноста за продолжување на гасоводот на грчката територија, од каде што гасот преку Македонија и Србија би се испорачувал до Унгарија и другите земји од централниот дел на Европската унија кои беа опфатени со откажаниот проект „Јужен тек“.

Германскиот неделник Der Spiegel, објави наведувајќи како извор висок функционер во владејачката грчка коалиција на радикалната левица Сириза, дека споменатиот договор меѓу Русија и Грција би можел да биде потпишан уште во вторник. Грчкиот министер за енергетика минатата седмица најави дека Атина на Москва би ѝ го вратила заемот по 2019 година, кога се очекува ставање на гасоводот во целосно функционирање. Меѓутоа, германскиот весник вели дека станува збор за прашања кои во моментов се без одговор, односно дали Европската унија ќе го одобри тој договор и дали постои воопшто начин да се ослободат пари за проектот за кој тврди дека сé уште не е одобрен.

Меѓутоа, на пишувањето на Der Spiegel, веднаш во петокот со демант реагираше портпаролот на Кремљ, Дмитриј Песков, кој јасно укажа дека Москва воопшто не разговарала за авансно плаќање на изградбата на гасоводот, во висина до 5 милијарди евра.

„Не, нема да има. Путин на прес-конференцијата (со Ципрас – з.м.) самиот кажа дека никој не барал помош. Секако, прашањето за енергетската соработка беше третирано. Нормално, во рамките на разговорите на високо ниво е договорено дека на експертско ниво ќе се врши разработување на сите прашања поврзани со соработката во сферата на енергетиката, а Русија не вети финансиска помош, бодејќи тоа и никој не го бараше“, изјави Песков во саботата во интервјуто за радиото Business FM.

Грчката влада со месеци преговара со партнерите од еврозоната и меѓународните доверители за да се избори за последната транша од кредитот од рамките на меѓународната финансиска помош во износ од 7,2 милијарди евра. Овие средства се неопходни за да се избегне банкрот на државата, поради што би морала да излезе од еврозоната, па поради бавноста во постигнувањето на договорот, Атина се сврти кон алтернативни извори на финансирање. /крај/мф/сн

Извор: Макфакс