Економија
Светскиот совет за злато ја покрена расправата за реформа на пазарот на златото
Светскиот совет за злато (WGC) ја започна расправата за реформа на стотина година старата формула за пресметка на цената на благородниот метал на лондонскиот пазар.
„Светскиот совет за злато доби силна поткрепа за клучните принципи на реформите. Се наоѓаме на почетокот од процес кој ќе резултира со реформирана и модернизирана референтна цена на златата, а со самото тоа и со поширок дијапазон од учесници на пазарот“, се вели во соопштението на извршната директорка на WGC, Натали Демпстер издадено по состанокот одржан во Лондон на кој било дискутирано за промените, пренесе AFP.
Притоа се нагласува дека никој од учесниците на лондонскиот состанок не смета дека постојниот модел треба да биде отфрлен. „Постигнат е многу јасен консензус дека корисниците сакаат реформа а не нов модел“, одговори Демпстер на прашање на Reuters.
Светскиот совет за злато во Лондон организираше дебата за моделите за модернизацијата на ткн Лондонска формула за цената на златото (London Gold Fix). На собирот учествувале 34 претставници на сите сектори од индустријата, на централни банки, банки – добавувачи и на берзите. Меѓу клучните точки на дневниот ред била „потребата од единствена, сигурна, референтна цена“, се наведува уште во соопштението на WGC.
Лондонската формила за цената на златото влијае на трансакциите во износи од милијарди долари поврзани со златото ширум светот, а секој ден точно во 10,30 часот по лондонско време ја одредуваат четирите банки – британските „Barclays“ и „HSBC“, канадската „Scotiabank“ и француската „Societe Generale“. Сите четири банки се членки на Компанијата за утврдување на цената на златото, а ја договараат двапати дневно. Германската „Deutsche Bank“, исто така, беше членка на оваа групација, меѓутоа годинава истапи од неа.
Постапката започнува со ткн спот цена на златото којашто се темели на важечките пазарни цени за договорите за физичката испорака на овој благороден метал. Четирите банки потоа објавуваат дали се заинтересирани да го купат по таа цена којашто може да варира во зависност од односот на понудата и побарувачката. Потоа се одредува и цената.
Системот во текот на 2014 година западна во криза, откако британските регулатори и пресудија на „Barclays“ казна во висина од 26 милиони фунти, односно 33 милиони евра, откако поранешен нејзини трговец призна дека се обидел да манипулира со цената.
Цените на златото повремено забележуваат посилни осцилации, бидејќи металот се смета за сигурно вложување особено во периодите на геополитички превирања. Така, изминатите седмици златото засилено се купуваше поради разгорувањето на насилствата во Ирак. Минатата седмица, така, цената на златото на лондонскиот пазар скокна на највисокото ниво во последните три ипол месеца, од 1.334,06 долари за унца.
Аналитичарите на движењата на пазарите сметаат дека реформата би можела да ја поткрене пазарната цена на златото. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.