Економија
Volkswagen ID.4 е светски автомобил на годината!
„World Car of the Year 2021“ е Volkswagen: Новиот и целосно електричен ID.4 преовлада над силната меѓународна конкуренција на интернационалните „World Car Awards“- наградите за автомобили. Светската награда „World Car of the Year“ ја доделуваат повеќе од 90 меѓународни автомобилски новинари од 24 земји, кои гласаат за најдобрите иновации на светскиот пазар.
![]()
Особено сме задоволни што нашиот ID.4 е прогласен за Светски автомобил на годината“, вели Ралф Брандштетер, извршен директор на патнички автомобили на Volkswagen. „Не само затоа што е една од најважните награди за автомобили во светот – туку затоа што жирито ја истакна одличната идеја на одличниот тим на Volkswagen. Модел за клучните пазари на Европа, Кина и САД ја носи нашата електрична офанзива низ целиот свет. Убедлив автомобил, одлична идеја – и награда за Светски автомобил на годината? Тоа нам ни звучи одлично!“, додаде Ралф Брандштетер.
Возилата што ги исполнуваат условите за наградата Светски автомобил на годината мора да бидат произведени во најмалку 10.000 единици годишно и да бидат понудени на најмалку два континента.
„Наградата Светски Автомобил на Годината претставува голем успех за целиот ID тим“, вели Томас Улбрих, член на бордот за развој на брендот Volkswagen. „Успеавме да развиеме автомобил што ја започнува системската промена во електро-мобилноста во најважниот светски сегмент на компактни теренци и нуди одлична секојдневна употребливост. Со него, ID.3 и со претстојните ID модели, правиме иновативна електрична мобилност на пазарот, со волумен кој е достапен за сите“.
Жирито ја пофали грижата за еколошката средина без испуштање на директни емисии, како и иновативните карактеристики на ID.4. На пример, иновативниот дисплеј за аугментирана реалност, достапен опционално. Може да проектира важни информации на ветробранското стакло, како што се насоките од системот за навигација. Возачот ги гледа овие информации во 3D, со јасен приказ за насоките во просторот пред него на оддалеченост од три до десет метри пред возилото. Ова значи дека дисплејот е совршено интегриран во реалниот надворешен свет. Кога адаптивниот темпомат (ACC) или системот за помош при патување (Travel Assist) се активни, возилото пред ID.4 е светлосно обележано на главниот дисплеј со одредена брзина за да може да се задржи потребното растојание.
ID.4 исто така поставува стандарди во дигитализацијата. Автомобилот може да добива редовни ажурирања и нови функции преку интернет. Volkswagen е првиот производител во сегментот кој го нуди ова. Возилото секогаш да биде ажурирано.
Со стекнувањето на оваа награда, на 17-тото доделување на наградата „World Car of the Year“, ID.4 ја продолжува успешната приказна на Volkswagen на овој натпревар. Не само што е добро прифатен од светските новинари, туку и од клиентите. Volkswagen планира да испорача околу 150 000 ID.4 во светот оваа година. Електричната офанзива претставува основен елемент на стратегијата „ACCELERATE“ на Volkswagen. Компанијата планира да претставува барем еден нов и целосно електричен модел на пазарот секоја година.
Поради пандемијата КОВИД 19, оваа година церемонијата на доделување на наградите за „World Car of the Year“ се одржа дигитално. Можете да се погледнете на YouTube.com/worldcartv.
Во Македонија, ID.4 официјално ќе започне со продажба во мај.
Volkswagen добитници на наградата „World Car of the Year“:
2009: Golf (World Car of the Year)
2010: Polo (World Car of the Year)
2011: up! (World Car of the Year)
2013: Golf (World Car of the Year)
2021: ID.4 (World Car of the Year)
(ПР-текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
ЕВН Македонија учествуваше на 14-тиот Меѓународен форум за енергетика и одржлив развој
Високи претставници на ЕВН Македонија земаа активно учество на 14-тиот Меѓународен форум за енергетика и одржлив развој, кој оваа година се одржа во Скопје под мотото „Од цели кон акција: Напојување на иднината со одржлива енергија“.
Настанот се организираше од Министерството за енергетика, рударство и минерални суровини во соработка со Канцеларијата на Програмата за развој на Обединетите нации УНДП и петте регионални комисии на ОН.
На отворањето се обрати министерката за енергетика, рударство и минерални суровини, Сања Божиновска, која истакна: „Енергетската отпорност денес значи способност системот да издржи, да се прилагоди и да продолжи да функционира, дури и во услови на неизвесност и геополитички потреси.“
Тридневниот форум обедини над 500 учесници од 70 земји, вклучувајќи и претставници на влади, меѓународни организации, финансиски институции, како и експерти и претставници од бизнис зедницата.
Првиот човек на ЕВН Македонија, Волфганг Маиер се обрати за време на сесијата посветена на „Финансирање на енергетската ефикасност и обновливите извори“. Тој истакна дека нема зелена транзиција без силни, паметни и модерни дистрибутивни мрежи.
„Не можеме да градиме зелена енергетска иднина на мрежа од 20-ти век. Надградените и модерни мрежи се суштински за интегрирање на обновливата енергија, но тоа доаѓа со многу висока цена. Затоа, меѓународните фондови, поволните заеми и стабилната регулаторна рамка се клучни за да се остварат неопходните инвестиции.“
Менаџерот во ЕВН Македонија Електроснабдување, Беркант Шен, зборуваше за улогата на ЕВН во развојот на инфраструктурата за полнење на електричните возила во државата, со што директно се придонесува кон забрзување на електричната мобилност и заштитата на животната средина.
Во фокусот на годинешната водечка глобална платформа за унапредување на одржливата енергија се енергетската транзиција, новите технологии и пазарот, производството на енергија, како и меѓународната соработка за енергетска сигурност.
Економија
Од полноќ нови цени на горивата
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,59% во однос на одлуката од 29.10.2025 година.
Од 31.10.2025 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 73,50 (денари/литар)
Моторен бензин ЕУРОСУПЕР БС – 98 75,50 (денари/литар)
Дизел гориво ЕУРОДИЗЕЛ БС (Д-Е V) 70,00 (денари/литар)
Масло за горење Екстра лесно 1 (ЕЛ-1) 69,50 (денари/литар)
Мазут М-1 НС 36,057 (денари/килограм)
Малопродажната цена на Екстра лесното масло за домаќинство на (ЕЛ-1) се зголемува за 2,00 ден/лит.
Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) и на Мазутот М-1 НС не се менуваат.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 3,480%, кај дизелот за 1,760%, кај екстра лесното масло за 5,965% и кај мазутот зголемувањето е за 3,830%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,0496%
Економија
СДСМ: Предлог-буџетот за 2026 година е признание за економската неспособност на Владата
Предлог-буџетот за 2026 година е признание за економската неспособност на Владата, велат од СДСМ.
„По усвојувањето на Предлог-буџетот за 2026 година СДСМ изразува сериозна загриженост за насоката по која се движи фискалната политика и нејзините последици врз граѓаните и стопанството. Наместо ветената „строга фискална дисциплина“, Владата предлага дефицит од 3,5% од БДП и со тоа повторно директно го прекршува фискалното правило утврдено во Законот за буџети, кое поставува лимит од 3%. Не станува збор за дисциплина, туку отстапување од законската рамка што ќе ја платат граѓаните и економијата. Особено е проблематично што Владата буџетската рамка од 374,7 милијарди денари приходи и 413,9 милијарди денари расходи ја нарекува „развојна“, а истовремено ги намалува капиталните инвестиции. Со предлог-буџетот за 2026 година тие се планираат на 40,5 милијарди денари – речиси 7 милијарди помалку од 47,3 милијарди денари кои беа утврден со ребалансот за 2025 година“, велат од партијата.
Од СДСМ велат дека на денот на усвојување на предлог-буџетот, реализацијата на капиталните расходи изнесувала само 44,94%. „Со екстремно слаба реализација, тврдењето дека „капиталните проекти ќе бидат главен двигател на растот во 2026 година“ е контрадикторно и признание за неспособност“, смета СДСМ.
Проекцијата за раст на економијата (БДП) од 3,8%, велат од СДСМ, дополнително ја разоткрива суштината на промашените фискални политики на Владата.
„Станува збор проекција базирана на потрошувачка, поддржан со најавено зголемување на плати и пензии. Кога ова се случува во услови на намалени капитални расходи и во отсуство на структурни реформи, тогаш оправдано се поставува прашањето: дали се најавува уште една година во која економските промашувања се маскираат со краткорочни, популистички потези? Оваа буџетска стратегија за наредната година нема да донесе корист ниту за граѓаните, ниту за стопанството, затоа што ова ќе значи повисоки трошоци за камати, ново задолжување, притисок врз даночната база и истиснување на продуктивните инвестиции. Загрозената продуктивност на стопанството ќе донесе само повисоки цени на услуги и производи, односно намалена можност за реално зголемување на животниот стандард на граѓаните. Зголемените платите и пензиите ќе потонат во растечката месечна потрошувачка за основните животни потреби. Со Предлог-буџетот за 2026 година Владата не нуди развој, туку маска за економски промашувања“, обвини СДСМ.

