Економија
Забрзани постапките за издавање лиценци за угостителска дејност и за продажба на алкохол

Министерот за економија Беким Незири на прес-конференција во четврток ги презентираше новите процедури пропишани во правилници за издавање на лиценци за вршење на угостителска дејност и за продажба на алкохолни пијалаци.
„Во насока на континуирано подобрување на бизнис климата, односно создавање и одржување на партнерски однос со бизнис заедницата, со цел побрз економски раст и развој и подобар животен стандард за нашите граѓани, Министерството за економија изготви правилници, со кои роковите за издавање на лиценците се намалуваат од 15 на четири дена, доколку документацијата е потполна, односно на седум дена за добивање на лиценца или Решение за одбивање, доколку деловниот субјект не поднесе комплетна документација или ако постојат формални недостатоци“, изјави министерот Незири.
Новитет во процедурата за издавање на лиценците е тоа што, по доставување на барањето од страна на деловниот субјект, новиот рок за обработка на предметот е три дена, четвртиот ден таа ќе биде потпишана и подготвена за врачување. За некомплетна документација и утврдени формални недостатоци, барателот во рок од три дена треба да го дополни недостатокот, а останатите рокови се стандардни – три дена за изработка на лиценцата и еден ден за нејзино потпишување, односно вкупно седум дена. Во случај барателот да не ги достави потребните документи во определениот рок, седмиот ден се издава Решение за одбивање на барањето.
Доколку Министерството не одговори во законски предвидениот рок од седум дена, подносителот на барањето има право во рок од три работни дена од истекот на тој рок да поднесе ново барање за донесување на решение. Новитет ќе биде и дневното ажурирање на прегледот на лиценци на веб страната на Министерството за економија, со моментален статус на лиценцата на деловниот субјект.
„Главните придобивки од донесувањето на овие правилници се двојно, односно тројно забрзување на постапката и доследно почитување на роковите превидени со Законот за општа управна постапка, Законот за угостителска дејност и Законот за трговија, олеснување на процедурата без губење време на чекање на неопходните лиценци, ефикасност во решавањето на барањата од страна на деловните субјекти, ефективност во работењето на службите кои работат на издавање на лиценци, професионализација на администрацијата, целосна транспарентност при процесот на издавање на лиценци и редовно ажурирање на прегледот на лиценцирани субјекти, односно одбиени барања“, информира министерот Незири. /крај/со/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Славески со ИФЦ: соработка за унапредување на дигиталните финансии и финансиската вклученост

Гувернерот на Народната банка, Трајко Славески, ја оствари својата прва средба со претставникот на Меѓународната финансиска корпорација (ИФЦ) во земјава, Висар Перани. На средбата се разговараше за можностите за соработка меѓу Народната банка и ИФЦ во повеќе области, вклучително и во рамките на проектот на ИФЦ насочен кон унапредување на дигиталните финансиски услуги и поттикнување на финансиската вклученост во регионот.
Проектот се спроведува во контекст на стратегиските определби на ИФЦ за создавање напреден и одржлив дигитален финансиски екосистем, заради поддршка на иновациите, градење капацитети кај давателите на финансиските услуги и за развој на конкурентна и сеопфатна околина.
Во текот на разговорот, беше истакната важната улога на Народната банка во дигиталната трансформација на финансискиот систем преку современа регулатива и активности што ја поттикнуваат иновацијата. Посебен акцент беше ставен на новата правна рамка во платежната сфера, којашто овозможи отворање на пазарот за нови даватели на услуги и поттикнување на финтек-иновациите.
Гувернерот Славески ја нагласи подготвеноста на Народната банка за унапредување на соработката со ИФЦ, особено во делот на поддршката за давателите на платежните услуги во натамошната интеграција со платните системи на Европската Унија, по членството во СЕПА, како и во развојот на инстант плаќањата и подготовката на новата среднорочна стратегија за развој на платниот систем.
Претставниците на ИФЦ го нагласија значењето на усогласувањето на регулативните рамки со меѓународните стандарди и поттикнувањето партнерства помеѓу банките, финтек-фирмите и приватниот сектор.
Средбата претставува важен чекор кон унапредувањето на партнерските односи меѓу Народната банка и ИФЦ, заради зајакнување на финансискиот екосистем и промовирање на финансиската вклученост, велат од НБРМ.
Економија
Дурмиши за новата потрошувачка кошничка: ќе служи за градење политики поврзани со минималната плата и ќе се усогласи со европските стандарди

На четвртата седница на Економско-социјалниот совет, министерот за економија и труд, Бесар Дурмиши ја истакна важноста од повторното активирање на трипартитниот дијалог меѓу Владата, синдикатите и работодавачите, кој претставува суштински механизам за социјална кохезија и економски напредок. Тој ги поздрави новите претставници на Конфедерацијата на слободни синдикати, со што, како што рече, се враќа легитимитетот на Советот.
Министерот информираше дека е успешно завршена постапката за утврдување на репрезентативноста на синдикатите – прашање што подолг период го блокираше нормалното функционирање на ЕСС. Воедно, се предложени измени на Законот за работни односи, со кои прагот за репрезентативност се намалува од 10 на 5 проценти, со цел да се поттикне поинклузивен и плуралистички социјален дијалог.
Дурмиши го претстави и процесот за изработка на нова, официјална методологија за пресметка на потрошувачката кошничка, заснована на проверливи и релевантни податоци од Анкетата за потрошувачка на домаќинства, спроведена од Државниот завод за статистика. Новата кошничка ќе служи како основа за градење политики поврзани со минималната плата и социјалните трансфери и ќе биде усогласена со европските стандарди.
Економија
Трипуновски: Откупните цени за пиперката се зголемени – прва класа ќе се откупува по 45 денари за килограм

Откупните цени за пиперката се зголемени – прва класа ќе се откупува по 45 денари за килограм, изјави министерот за земјоделство, шумарство и водостопанство, Цветан Трипуновски.
„На состанокот се договорија откупните цени по класи за пиперката. За прва класа откупната цена на пиперката изнесува 45 денари, за прва-втора класа е 35 денари, за втора класа откупната цена изнесува 20 денари, а за трета класа откупната цена ќе биде 15 денари”, појасни министерот.
Тој посочи дека тоа се почетните цени со кои што ќе започне откупот на пиперката за реколтата 2025 година.
„Пиперката во Македонија се одгледува во два региони – струмичкиот и прилепскиот регион. Бербата треба да биде во договорен период за да не се соочиме со зголемена количина на берба на пиперка во текот на денот и да имаме застој во откупот”, додаде министерот Трипуновски.
Министерот истакна дека оваа година откупните цени за пиперката се зголемени во однос на минатата година.
„Текот на откупот ќе го следиме преку Државниот инспекторат за земјоделство. Како Министерство стоиме на располагање, а трендот на зголемување на земјоделското производство треба да продолжи и понатаму”, посочи тој.