Со неколкуте успешни гостувања на врвни солисти и камерни ансамбли, фестивалот „Охридско лето“ вчеравечер навлезе во втората половина од годинешната 61-ва концертна сезона со звуците на харфата и уметницата Елоиз Карлин-Џонс која настапи во рамките на Француската вечер на фестивалот.

Француската вечер на „Охридско лето“ е традиционален настан 14 години и секое лето на публиката ѝ ги носи најдобрите уметници од Франција.

Прогласувајќи ја вечерта за отворена, амбасадорот на Република Франција во Република Северна Македонија, Сирил Бомгартнер истакна дека во изминатите четиринаесет години француското културно присуство во земјава има своја летна престолнина, а тоа е Охрид.

Младата француска харфистка Елоиз Карлин-Џонс преку јасноста и умешноста на звукот на харфата покажа дека е врвен уметник кој совршено владее со инструментот.

„ Првпат сум во Охрид, и тоа е навистина голема чест. Програмата беше разновидна, составена од оригинални дела напишани за харфа, но и транскрипции, како на пример Бах. Таа беше специјално направена за фестивалот. Првата половина од концертот беше исполнета со танци, а втората со песни. Поради неверојатната акустика, чувствував како музиката што ја свирам го исполнува просторот, рече Карлин-Џонс.

Таа призна дека изминатиот период од пандемијата кога светот беше парализиран, бил тежок и за уметниците.

Во рамките на Скопско лето, утре, со почеток во 20.30 часот, во Музејот на македонската борба, ќе се одржи концерт со наслов „Вечер со руски романси“.

Ќе се изведуваат соло песни од руски автори, а учествуваат: Македонка Петреска – сопран, Ивона Огненовска – мецо-сопран, Елена Васова – сопран, Сара Јанева – мецо-сопран, Марија Ѓеорѓиевска – сопран, Фјола Исеини – сопран, Маријана Бошковска – мецо-сопран, Билјана Камчева – сопран и Давид Миладинов – баритон. Музички соработник и водител е м-р Елена Силјановска.

Романса е жанр на естетско доживување на човечките емоции. Во време на прагматизам и материјализам руските романси нè навраќаат на чувствата и продуховеноста. Концерти на руски романси во НОБ во организација на корепетиторот и селекторот во Македонија за меѓународниот натпревар, м-р Елена Силјаноска, се одржуваат во фоајето на НОБ од 2014 година. Годишниот концерт на руски романси имал најмногу публика во последните 3 години. Минатата година првпат концертот влезе и во прогамата на Скопско лето. Учествувале повеќе од 40 млади македонски вокалисти – студенти и ученици од образовни институции во земјата. Концертот е присутен и во македонскиот етер (ТВ „Наше ТВ“, снимено 2 концерта – 2016 и 2017). Концертите имаат свој карактеристичен перформанс. Освен изведба на композициите, присутен е наративен дел – едукативен и емотивен – поврзан со историја, стил, композитори, поети, изведувачи. Во програмата, покрај класични дела, вклучени се и романси непознати за македонската публика.

Концертот ќе се одржи во согласност со протоколите за одржување настани, а влезот ќе се регулира со билети по фестивалска цена од 200 денари, кои ќе може да се купат пред почетокот на концертот на влезот на Музејот.

В сабота ќе се одигра театарска претстава СМРТТА НА ДАНТОН со почеток во 20.30 часот во Центарот за култура во Кисела Вода – „КВК кино“. Автор на претставата е Георг Бихнер, а е во продукција на ЈОУ Дом на културата КВК Скопје, во копродукција со Театар „Фабрика“. Рeжисер е Андреј Цветановски, сценограф и костимограф – Сергеј Светозарев, асистент на режија – Борјан Стојков, а играат: Григор Јовановски, Дамјан Цветановски, Сергеј Димовски, Тони Денковски, Александар Михајловски, Ане Блажовски, Наталија Теодосиева, Марија Кондовска, Кристина Гиева.

Во рамки на фестивалот „Скопско лето“, утре ќе се одржи концерт со наслов „Шопен, поетот на музиката – музички бисери за пијано“, со почеток во 20:30 часот во Музејот на македонската борба.

Изведувачи на концертот се Даница Стојанова – пијано, Нита Груби, Бобан Мирковски и Сара Кесковска, к.г. – пијано.

Концертот ќе се одржи согласно протоколите за одржување настани и во продажба ќе бидат пуштени ограничен број билети. Истите ќе може да се купат онлајн на karti.com.mk и пред почетокот на настанот на влезот на објектот по фестивалска цена од 200 денари.