Култура
„Булфрогс балет“ со прв лауреат на Европското балетско гран при 2024

Млади балерини од интернационалното училиште за балет „Булфрогс балет“ (Bullfrogs Ballet) во Скопје освоија прво место на Европското балетско гран при, кое се одржа во Виена.
Под менторство на уметничката директорка на училиштето, Александра Никифоровски, и балетскиот педагог и поранешна балетска солистка, Елена Митевска, ученички на возраст од 8 до 18 години, го освоија првото место во јуниорската категорија професионалци: групни кореографии – класичен балет на престижното Европско балетско гран при, кое се одржа во Виена, Австрија, од 6 до 9 февруари годинава.
Учениците изведоа фрагмент од балетот „Сон на летната ноќ“, според кореографската адаптација на Александра Никифоровски, според Џорџ Баланшин. Освен првото место во категоријата во која настапија, со 92,33 поена, групната кореографијата беше и третата најбодирана изведба во рамките на целиот натпревар, односно во сите категории, од страна на шестчлената жири-комисија, составена од врвни професионалци.
Европското балетско гран при е реномиран меѓународен балетски натпревар, кој се одржува секоја година во Виена, на кој учествуваат млади балетски уметници од целиот свет. Натпреварувачите се поделени во две категории – професионалци и рекреативци, како и според возраста.
Ова е второ учество на балетски ученици од училиштето „Булфрогс балет“ на престижниот европски натпревар. На првото учество во 2023 година ученичките Елена Василевска (12) и Виола Имери (13 години) со дуетот „Пицикато“ освоија трет лауреат во категоријата класичен балет за тинејџери (teens professional).
„Покрај групната кореографија, некои од нашите ученици се натпреваруваа и во соло категории и настапија со разни варијации од класичниот балет. Во секоја од категориите тие настапија со сериозна конкуренција и јас многу се гордеам што котираа релативно високо, но и личните резултатите им се подобри од минатогодишните. Особено сум среќна што и навдор од официјалниот дел од натпреварот добивавме и пофалби од балетските мастери и жири-комисијата за нашата работа, што за мене е индикатор дека со посветена работа, верба и истрајност и на тимот педагози и на младите балерини можеме да стигнеме многу далеку“, изјави Никифоровски.
„Булфрогс балет“ е интернационално училиште за балет основано во 2009 година, кое спроведува балетско образование за деца и млади од предучилишна возраст, основно и средно образование. Во тгекот на годините „Булфрогс балет“ има продуцирано десет балети и над 25 одиграни претстави, еден документарен филм, пет драмски претстави, 18 летни балетски школи, како и повеќе од 20 работилници, мастер-класи и едукативни предавања.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Затворен 13. „Џифони Македонија“ – избрани најдобрите филмови на фестивалот

Шведскиот филм „Престолонаследникот и враќањето на Тиранинот“ од Торд Даниелсон е најдобар кај јуниорите (шесто до деветто одделение), а рускиот „Од почеток“ од Полина Кондратева е најдобар за кадетите и сениорите (прва до четврта година средно) на 13. „Џифони Македонија“, што заврши синоќа.
Вообичаено, по изгледаните филмови во повеќе категории, жирито на фестивалот кое се состои од сите негови учесници, гласаат за наградите на фестивалот.
Кај јуниорите, најдобар краток ученички филм е прогласен „Безвредна борба“ (Combat de merda) од Нико Ферари и Таина Арагонес (Шпанија). Најдобар краток филм е „Метеора“ на Микеле Бучи од Италија.
Во категоријата на кадети и сениори најдобар ученички филм е „„Доста е!“ од Јоханес Брандвајнер и Ана Хилтгартнер (Австрија). Најмногу гласови за категоријата краток филм освои „Андромеда“ од Ана Меликјан (Русија). Најдобар анимиран краток филм е прогласен „17 часот“ од Флака Коколи (С. Македонија / Косово).
Неда Стојановиќ, Јана Петрушевска и Бисера Чоневска се првите учеснички на „Џифони Македонија“, избрани за наредното издание на „Џифони експериенс“ во 2026 година.
На последната вечер што се одржа во киното „Фросина“, видовме што креирале учесниците на фестивалот во изминатите денови, на нивните работилници. Мјузикл, фотоизложба, кратки филмови… го видовме раскошниот талент на нашите џифонци, предводени од нивните ментори. Фестивалот се одржа под мотото „Да се стане човек“.
Давиде Русо, директорот за институционална соработка на „Џифони експериенс“ му се заблагодари на тимот на „Џифони Македонија“ за добрата работа.
– Ги поздравувам италијанските учесници и поздрав до Дарко Башески, едниот дел е дрвено пиперче што се верува дека носи среќа, а другиот дел е симбол на градот Џифони. Благодарение на финансиската поддршка од Италијанското Министерство за култура, а од оваа година и италијанската агенција за млади, го организираме фестивалот и подобро – рече Русо.
Ви благодарам за целата поддршка и за големата мотивација. Џифони фестивалот е голем извор за мотивација и инспирација. Тие џифонци што ја посетуваат Италија го знаат тоа, истакна Дарко Башески, директор на фестивалот „Џифони Македонија“ во поздравниот говор.
Во изминатите шест дена Скопје беше домаќин на 400 учесници од Македонија, како и 30-ина од Италија, Швајцарија, Данска, Романија, Србија, Косово и Црна Гора. Младите учесници од другите земји се сместени во фамилиите на нивните врсници од Скопје.
Култура
„Танец“ ја заокружи својата балканска турнеја

Националниот ансамбл за народни игри и песни „Танец“, триумфално ја заврши својата Балканска турнеја, оставајќи зад себе трага од воодушевена публика и силни емоции.
Со наслов „Ритамот на душата, бојата на традицијата“, турнејата го потврди статусот на „Танец“ како ненадминат амбасадор на македонската култура.
Оваа турнеја не беше само серија настапи, туку и културна мисија. Таа успеа да ја премости географската оддалеченост, да поврзе генерации и да ја претстави виталноста и убавината на македонскиот фолклор.
Концертите во Валпово (Хрватска), Крањ (Словенија), Виена (Австрија) и Лакташи (Босна и Херцеговина) „Танец“ ја воодушеви публиката со енергични кореографии и раскошни носии, пренесувајќи ја богатата македонска култура и традиција. Експлозијата на бои и звуци, од нежните звуци на тамбурите до моќните удари на тапаните, создадоа магична атмосфера што ги спои гледачите и изведувачите во еден ритам.
Турнејата претставуваше повеќе од обични концерти-тоа беше културна мисија која ги поврза Балканот и Европа. Играорците, пејачите и оркестарот маестрално пренесоа порака за виталност, убавина и културно богатство кое заслужува светско внимание. Секој настап беше доказ дека традицијата не е само минато, туку жива, пулсирачка сила.
Со овој голем триумф, Ансамблот „Танец“ ја зацврсти својата позиција како еден од најзначајните чувари и промотори на културното наследство на Македонија.
„Срцето на Македонија чука во ритамот на нашите ора и песни. Каде и да одиме, носиме дел од таа душа и таа топлина“.
Култура
Диригентката Дијана Имери-Илкоска била дискриминирана од поранешниот директор Котевски

Комисијата за спречување и заштита од дискриминација (КСЗД) утврди дека диригентката Дијана Имери Илкоска била жртва на директна дискриминација во областа на работата и работните односи од страна на Александар Котевски, поранешен в.д. директор на НУ Филхармонија.
Случајот датира од почетокот на годинава, кога работниот однос на Илкоска не бил трансформиран од определено на неопределено време иако ги исполнувала условите. Само неколку дена подоцна, таа добила забрана за влез во институцијата, а нејзиниот уметнички профил бил избришан од официјалната веб-страница на Филхармонија.
Во своето мислење, КСЗД утврдила дека Котевски не дал оправдување за прекинот на постапката за трансформација на договорот, ниту за измената на ставот дека постои потреба од вработување на неопределено време. Дополнително, ограничувањето на влезот на Илкоска во институцијата било спроведено без легитимна цел, а бришењето на нејзиниот профил не може да се сведе на техничка грешка, бидејќи било направено токму по нејзината јавна реакција.
Комисијата заклучува дека преземените дејствија биле директно насочени кон Илкоска, ставајќи ја во понеповолна положба во однос на колегите, што претставува дискриминација согласно Законот за спречување и заштита од дискриминација.
КСЗД препорача Котевски во рок од 30 дена јавно да ѝ се извини на диригентката. Доколку не постапи по оваа препорака, Комисијата најавува барање за покренување прекршочна постапка пред надлежен суд.