Култура
В недела почнува Фестивалот на џез, ворлд и современа музика во Велес

Првото издание на Фестивалот на џез, ворлд и современа музика ќе се одржи од 4 до 10 септември на неколку локации во Велес, а публиката ќе може да проследи уникатни настапи на македонски артисти од разни жанрови и уметнички сфери.
Фестивалот почнува в недела, 4 септември, во Спомен-костурницата во Велес, со концерт на Енес Беговски на хенг драм, потоа следува театарско-музичкиот перформанс „Чекална 4“, во кој учествуваат Фаик Мефаилоски, Сашко Костов, Славчо Коцев, Андреа Мирческа и Петар Христов. Вечерта ќе ја заокружи настапот на дарк фолк-музичкиот состав „Перија“. Програмата на 4 септември е бесплатна и почнува од 20 часот.
Во претстојните денови концерти и арт-перформанси ќе имаат и: Сашко Костов, „Такси конзилиум“, Дина Јашари и другарите, „Летечки пекинезери”, „Едит поинтс“, „Бопхедс”, Шамба и театарот „Сенки и облаци“. Домаќини ќе бидат градската пивница „Паб“ и Театарот „Ј. Х. К. Џинот“ од Велес. Детаљната програма се наоѓа на следниот линк.
„Велешката публика важи за една од најерудираните кај нас, будно ги следи културните случувања и не испушта претстава во театар. Убедени сме дека овој фестивал ќе ѝ понуди едно поинакво уживање и ќе прерасне во традиција. Фестивалот на џез, ворлд и современа музика го создадовме тргнувајќи од фактот дека на Велес му недостигаат настани со поинаква уметничка вредност, случувања што со задоволство би ги посетувале самите ние. Сфативме дека не може само да сме жедни за културно квалитетна програма, тука дека треба самите да преземеме нешто. Идејата беше да направиме фестивал на кој би била пласирана квалитетна оригинална музика и да вклучиме и други видови уметност (видеопроекции, театарски перформанс, проекции на масло и вода). Главни виновници се Борче Пејчев, Славчо Коцев, Сашко Костов, Фаик Мефаилоски и многу драги пријатели кои помогнаа во организацијата на самиот фестивал“, изјавуваат од „Арт генератор“, кој е организатор на фестивалот.
Главен покровител на Фестивалот на џез, ворлд и современа музика е Општина Велес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Награда во Еквадор за „Јон Вардар против галаксијата“

Првиот македонски анимиран долгометражен филм „Јон Вардар против Галаксијата“ ја освои наградата за најдобар долгометражен филм на 9. Филмски фестивал во Портовјехо, Еквадор.
Фестивалот се истакнува по својата програма која промовира иновативни и храбри филмски дела од целиот свет. Ова е четврта фестивалска проекција на филмот во Латинска Америка, по претходните успешни учества во Аргентина и Бразил.
„Чест ми е што Јон Вардар ја продолжува својата галактичка одисеја низ Латинска Америка, тоа е признание не само за нашата екипа, туку и за целата македонска анимација. Топлината и љубопитноста на оваа публика совршено се поклопуваат со бунтовниот и хумористичен дух на филмот“, вели режисерот Гоце Цветановски.
Балканскиот хумор, сатиричниот тон и универзалните теми на филмот ја освојуваат и латиноамериканската публика.
Филмот е во сценарио и режија на Гоце Цветановски, арт директор е Михајло Димитриевски – Тхе Мичо, продуцент е Алан Кастиљо, а главните улоги ги толкуваат Жарко Димоски, Емилија Мицевска и Дамјан Цветановски.
Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.