Култура
Почнува 17. издание на „Локум фест“ – музика и традиција

Со промоција на новиот албум на групата „Баклава“ на 18 јули во 20.30 часот, на платото на Офицерскиот дом – КИЦ Битола, ќе почне „Локум фест 2023“, а вечерта продолжува со музика, која ни доаѓа од соседна Грција и Loxandra Ensemble – Λωξάντρα во 21.30 часот.
„Оваа година првпат имаме ‘Локум фест – оф програма’, првата вечер во ‘Вино бар буре’ на ‘Магнолија’ со ‘Баклава’ и гостите од Грција. Нашата пасија за откривање на традиционалните музички спомени и звуци на конзулска Битола ни ги носи нашите битолчани од Њујорк, Elias ladino ensemble, а соработката со Државниот архив – Битола ни донесува прекрасна изложба на фотографии од музичкиот живот на битолските Евреи. Втората вечер ја затвораме со познатиот македонско-словенечки мајстор на саксофон Васко Атанасовски и промоција на неговиот албум на балканска музика „Мелем“, со пејачката Добрила Грашеска.
Дружбата продолжува во хотелот „Театар“ со латиномузика, поезија, закуска, дружба… Последната вечер на 20.7 е резервирана за старата битолска чаршија, каде што ќе се случува фестивалското крешендо. Ќе се распостелеме покрај пешачката улица крај Драгорот, со ракотворби, локуми, турско кафе, добра храна и радост… Ќе уживаме во мајсторијата на Вевки Амедов и неговите „Јужни звезди“ славејќи ја ромската култура, а токму оваа вечер ги имаме специјалните гости од партнерскиот фестивал „Резонатор“ од Данска, кои со поддршка на MOST music ги имаме во Битола. Групата Ypek Yolu или Патот на свилата е харизматична спојка на традиционална анадолска народна музика и фанк фјужн, музика која има една единствена цел – да ве разигра и опушти… Традиционално, ќе се дружиме сите три фестивалски вечери со ЗУР „Македонски ракотворби“, крушевски и битолски локум, со презентации на рачно изработени производи и, секако, кафе“, велат организаторите на настанот.
Фестивалот се реализира со средства на Министерство за култура, Општина Битола, „Пред плус фондацијата“, Амбасадата на Р. Словенија во Скопје, Генералниот конзулат на Р. Грција во Битола, КИЦ „Битола“, како и многубројни пријатели и поддржувачи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Голдберг варијациите“ на Бах во изведба на Дино Имери – утре во Виена

Македонскиот пијанист Дино Имери, еден од највпечатливите уметници на својата генерација, утре (13 јуни) ќе настапи во Виена – глобалниот и историски центар на класичната музика. На програмата е капиталното дело на Јохан Себастијан Бах – „Голдберг варијации“, кое ретко се изведува на концертните сцени низ Европа, токму поради неговата исклучителна сложеност и длабочина.
Концертот ќе се одржи во престижниот „Бехштајн Центрум“ во Виена, во организација на Амбасадата на Република Северна Македонија, со поддршка од Македонско-австрискиот бизнис клуб и компанијата SSB Infrastructure-Austria.
Ова дело, коешто Имери премиерно го изведе во Скопје во рамки на „Недела на Бах“, привлече големо внимание од публиката и критиката. Програмата бара техничка виртуозност и уметничка зрелост, а само мал број пијанисти во светот се осмелуваат да го стават во својот концертен репертоар.
„Настап во Виена е сон на секој уметник. Особено ми е чест да ги изведам ‘Голдберг варијациите’ – едно од најмонументалните дела на класичната литература, на сцена пред публика која секојдневно слуша врвни уметници и програми. Работев на ова дело повеќе од пет години. Искрено им се заблагодарувам на Н.Е. г-дин Освит Росоклија и на поддржувачите на концертот – без нив оваа реализација немаше да биде можна“, изјави „волшебникот на пијаното“ Дино Имери пред настапот.
Концертот е со слободен влез и отворен за сите љубители на класичната музика.
Култура
Фестивалот Credence Dance почнува на 16 јуни

Третото издание на фестивалот Credence Dance започнува на 16 јуни, а ќе трае до 21 јуни со програма конципирана тематски, Вечери на класичен балет и Вечери на современ танц.
Фестивалот оваа година има и дополнителна програма која ќе се состои од работилници и трибини. На програмата се фрагменти од бисерите на класичното наследство „Лебедово езеро“, „Рајмонда,“„Копелија“, „Дон Кихот“, „Силфида“ и други.
Освен тоа во делот на модерниот и современиот танц премиерно ќе бидат изведени дела на Игор Киров, Бојан Мицов, Џонс Хинг, Франциско Руиз и Јована Петровска кој кореографите наменски ги подготвија за фестивалот.
Овогодинешниот Credence Dance фестивал ќе понуди ексклузивни гости од Кина, САД, Италија, Франција, Германија, Велија Британија итн. Ова е исклучителна и ретка можност да се видат овие уметници на домашна сцена.
Во рамки на фестивалот традиционално ќе биде врачена Наградата за трајни вредности во танцовата уметност. Настанот се одржува во Националата опера и балет.
Фестивалот е поддржан од Министерството за култура и Универзитетот „Св Кирил и Методиј“, Скопје. Влезот е слободен.
Култура
Во Москва излезе „Пиреj“ од Петре М. Андреевски

Романот „Пиреj“ излезе од печат во Москва на инициjатива на Олга Панкина, познат популаризатор на македонските културни вредности во Русија. Таа го преведе уште во 2008 година, го обjави издавачката куќа „Феникс“, Скопjе. Како што обjаснува Панкина, романот на руски веднаш предизвика интерес каj публиката, но сепак книгата не можеше да допре до широк круг рускоjазични читатели. Сметаjќи го романот на основоположникот на современата македонска проза Петре М. Андреевски за ремек дело, таа си постави за задача да го преобjави во Москва.
Оваа година идеjата jа поддржа Центарот за книга „Рудомино“ со коj Олга Панкина плодно соработува веќе петнаесет години (Центарот за книга има обjавено творби на над 20 македонски автори).
Ова издание на „Пиреj“ е многу квалитетно (368 страни, тврд повез) и изгледа современо. На корицата има фрагмент од сликата „Стара куќа“ на Олга Панкина. Блескав предговор за книгата напиша Венко Андоновски, коj даде за руска читателска публика основни информации за историјата која е заднина на личната драма на едно македонско семејство од почетокот на ХХ век, семејството на Јон и Велика, jа подвлече актуелноста на романот и го нарече како најголем македонски бестселер на сите времиња.
Тукушто обjавениот роман веќе заживее своj книжевен живот – почна да стекнува читатели. Минатата недела, од 3 до 7 jуни, беше презентиран на Саемот на книга на Црвениот плоштад во Москва на штандот на издавачот Центар за книга „Рудомино“.