Култура
Костадиновска-Стојчевска: Со попуст од 50 проценти за секоја влезница културата ја правиме подостапна за младите

Министерката за култура Бисера Костадиновска-Стојчевска денеска во својот кабинет се сретна со претставници на Универзитетското студенско собрание, при што беше потпишан меморандум за соработка меѓу Министерството за култура и Универзитетското студентско собрание при Универзитетот „Св. Кирил и Методиј“ во Скопје.
„Со меморанудум е уреден студентски попуст од 50 проценти на влезниците за сите студенти што имаат индекс со заверен семестар за влез и следење на програмите на националните установи од областа на културата“, рече министерката за култура во изјавата за медиумите.
Костадиновска-Стојчевска информира дека со овој меморандум се опфатени сите национални установи во Република Северна Македонија. Таа потенцира дека меморандомот нуди повеќе придобивки за студентите и додаде:„Студентите ќе имаат еднаква можност за достапност на културната сцена, ќе се зголеми нивното присуство во културните установи, ќе имаат можност да ги посетат сите културни настани во Република Северна Македонија што ги организираат сите национални установи во државата, ќе помогнеме за олеснување на нивниот стандард, нешто од што беше потегната и оваа иницијатива“.
Министерката за култура потенцира дека студентите, односно младите, се во фокусот од почетокот на нејзиниот мандат. Министерката потсети дека и во новиот закон за култура, кој е во подготовка, се предвидуваат работни места, категории со нула работно искуство, односно со таа регулатива ќе им се овозможи на младите веднаш да имаат услови за вработување во националните установи. „Поради големиот дефицит на стручни кадри, пратениците во Собранието поднесоа и закон за измена на Законот за игрите на среќа, со што ќе ги стипендираме дефицитарните кадри. Со тоа студентите што би биле стипендирани преку оваа програма веднаш ќе може да бидат вработени во некоја од националните установи од областа на културата“, рече Костадиновска-Стојчевска.
Министерката за култура изрази благодарност до студентите за иницијативата и порача дека таа како министерка и целата Влада остануваат посветено да работат на подобрување на студентскиот стандард и на програмите што обезбедуваат подобра иднина и оставрување на правата и потребите на младите луѓе.
Претседателот на Универзитетското собрание, Александар Николовски, поздравувајќи ги професионалноста на министерката за култура и соработката со Министерството, истакна дека потпишувањето на меморандумот е потврда на нивните заложби за поддршка на студентите во државата и дека оваа соработка придонесува за подобрување на студентскиот стандард, за поттикнување на критичкото размислување и унапредување на културната, историската и уметничката свест кај младите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Претставата „Едмонд“ денес премиерно во Битолски театар

Претставата „Едмонд“ според текстот на Дејвид Мемет, а во режија на Оливер Мицевски, денес премиерно ќе биде одиграна на големата сцена на Битолскиот народен театар. Се работи за петта по ред премиера за оваа година. Директорот Васко Мавровски вели дека во периодот септември 2024 / јуни 2025, е постигнат е апсолутен рекорд на премиерно изведени претстави, 12, а следи и премиерата на “Рибарски караници” која ќе се одигра на 25.07.
„Во овој период одиграни се 129 претстави, или на секои 2.5 дена се изведувала по една претстава. Во салите на НТБ, не посетиле 25.141 гледач, или во просек сме имале по 194 гледачи по претстава“, рече директорот Мавровски.
„ Јас сум радосен што работам овде, бидејќи не сум работел во земјава од 2011, и е убаво да се работи на својот јазик. Ние имавме многу убави осум недели работа и веруваме дека завршивме одлична работа. Беше задоволство да се работи со талентираниот ансамбл на Народен Театар Битола, предводен од Огнен Дранговски, еден од најдобрите актери во Македонија и Балканот. Верувам дека ЕДМОНД ќе стане значајна точка во несомнено богатата историја на Народен Театар Битола“, рече режисерот Оливер Мицевски.
Претставата го следи вртоглавото / спирално патување на бизнисменот Едмонд Бурк и неговите кошмарни 48 часа во њујоршкото подземје, каде што барајќи возбуда и среќа, од баналноста на неговата канцеларија и монотон семеен живот завршува како убиец и подоцна како затвореник, најверојатно осуден на доживотен затвор. Богат со многу параболи, референци на Хамлет и Библијата, прошаран со несекојдневно брутален јазик и агресивни сцени, главното прашање коешто Едмонд го отвора е прашањето на слободата. Што е слободата всушност? Дали потрагата по слобода прави всушност, незабележително да станеме робови на својата (потрага по) слобода. Дали откажувањето / лимитирањето на своите желби го олеснува патот кон слободата? Не случајно, мотото на Едмонд е : “Внимавај што посакуваш.”
Покрај Дранговски во претставата играат Валентина Грамосли, Соња Михајлова, Марјан Георгиевски, Ана Грамосли, Борче Ѓаковски, Александар Стефановски, Филип Мирчевски, Викторија Степановска-Јанкуловска и Маја Андоновска-Илијевски. Сценографијата е на Валентин Светозарев, костимографијата на Благој Мицевски, а музиката на Марјан Неќак.
Култура
Скопско лето: В понеделник џез концерт на Ѓорги Шаревски трио во Сули ан

Дирекцијата за култура и уметност на Скопје в понеделник повикува на џез концерт на Ѓорги Шаревски трио во Сули ан со почеток во 20.30 часот. Покрај Шаревски, ќе учествуваат и Акира Накамура од Окинава, Јапонија на тапани и Оливер Јосифовски на контрабас.
„Извонредна интеркултурна соработка, каде што триото на Георги Шаревски се обединува со еминентниот јапонски тапанар Акира Накамура за динамичен настап што умешно ја обединува источната прецизност со европската џез естетика.Предводено од македонскиот гитарист и композитор Георги Шаревски, фокусот на ова посебно трио се автентични авторски композиции, прецизна меѓусебна комуникација и соврмени хармонски структури. Со приклучувањето на Накамура и неговиот изразен ритмички јазик и смела импровизациска визија, овој исклучителен настап претставува возбудливо музичко патување исполнето со спонтаност, експлозивна енергија и бесконечен грув“, велат од Дирекцијата за култура и уметност.
Публиката ќе има можност да слушне внимателно избрана програма составена од авторски композиции, кои ги прошируваат хоризонтите на современиот џез израз.
Култура
Џез концерт на 30 јуни – Георги Шарески Трио во Сули ан

Во рамки на програмата на Скопско лето на 30 јуни (понеделник) во 20:30 часот во Сули ан (Стара Чаршија) ќе се одржи концерт на Георги Шарески Трио.
Организаторите велат дека овој концерт претставува извонредна интеркултурна музичка соработка, каде што триото на македонскиот гитарист и композитор Георги Шарески се обединува со врвниот јапонски тапанар Акира Накамура, како и со истакнатиот контрабасист Оливер Јосифовски. Настапот нуди динамична комбинација на автентични авторски композиции, ритмичка прецизност, импровизација и бесконечен џез грув.
Програмата опфаќа внимателно избрани композиции кои ја истражуваат границата помеѓу современиот џез и традиционалната музика, исполнета со енергија, спонтаност и иновативност. Ова е прво гостување на Акира Накамура во Македонија – музичар со светска кариера, кој има соработувано со имиња како Хироми Уехара, David Fiuczynski и BIGYUKI.
Билетите се продаваат по цена од 400 денари, и можат да се набават на влезот од Сули ан, на денот на настанот и онлајн преку платформата Купи карти: https://www.karti.com.mk/skopsko-leto.nspx.