Култура
МКЦ не заборава: настан по повод 60 години од катастрофалниот земјотрес во Скопје

ЈУ Младински културен центар и оваа година на 26 јули 2023 организира настан по повод годишнината од катастрофалниот земјотрес во Скопје во далечната 1963 година.
Самата институција е дел од проектот за возобнова на градот како донација од тогашните народи на Алжир и Советскиот Сојуз. Со тоа ЈУ Младински културен центар чувствува должност и потреба од потенцирање на важноста на светската солидарност кон Скопје, со што градот повторно доби нова шанса да стане културна и хумана метропола.
Во рамките на програмските активности за 60-годишнината од катастрофалниот земјотрес МКЦ предвидува реализација на повеќе програмски активности.
Предвиден е настап на скопскиот музички состав „Педро хорисонте“, младиот прогресивен бенд „Луфтанза“ и на етногрупата „Баклава“, која воедно ќе го промовира и своето најново издание со наслов „За Скопје со љубов“. Почетокот на концертите е предвиден да почне во 21 часот во паркот зад МКЦ, со бесплатен влез. На истата локација, во 20 часот, е предвиден настан со наслов „Зелениот дворец“: книжевен времеплов базиран на наградениот романот „Зелениот дворец“ од авторот Дејан Сибовски-Сибо, добитник на наградата „Пегаз“.
Во Галеријата на МКЦ е предвидена изложба на фотографии на Ристо Костовски, со наслов „Попатни одблесоци“. Ристо Костовски е роден 1954 година и активно се занимава со фотографија повеќе од 20 години, а последните 5 години го следи жанрот на таканаречената улична фотографија.
Во Галеријата 2 на МКЦ е предвидена изложба на фотографии од збирките разгледници издадени од МАРХ Македонска архитектура, од авторот на проектот Филип Конески, со наслов „Бетонско Скопје“. Изложбата е поддржана и од Град Скопје и од Министерството за култура.
По крајот на музичкиот дел, во паркот зад МКЦ е предвидена проекција на култното остварување СКОПЈЕ РЕМИКС (2012), омнибусот што ги обедини режисерите Вардан Тозија, Даријан Пејовски, Јане Алтипармаков, Саша Станишиќ, Синиша Евтимов, Борјан Зафировски, Огнен Димитровски, Бојан Трифуновски, Ѓорче Ставрески, Срѓан Јаниќиевиќ. Проекцијата е предвидена да почне точно на полноќ во паркот зад МКЦ.
Предвидена е и детска ликовна работилница со наслов „Моето Скопје: илустрирајќи го градот од соништата“ со Доротеј Нешовски во 18 часот на истата локација во паркот зад МКЦ, која е отворена за сите најмлади посетители.
Настанот е финансиски поддржан од програмата на Град Скопје за годишни културни настани во ЈУ МКЦ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Претставата „Едмонд“ денес премиерно во Битолски театар

Претставата „Едмонд“ според текстот на Дејвид Мемет, а во режија на Оливер Мицевски, денес премиерно ќе биде одиграна на големата сцена на Битолскиот народен театар. Се работи за петта по ред премиера за оваа година. Директорот Васко Мавровски вели дека во периодот септември 2024 / јуни 2025, е постигнат е апсолутен рекорд на премиерно изведени претстави, 12, а следи и премиерата на “Рибарски караници” која ќе се одигра на 25.07.
„Во овој период одиграни се 129 претстави, или на секои 2.5 дена се изведувала по една претстава. Во салите на НТБ, не посетиле 25.141 гледач, или во просек сме имале по 194 гледачи по претстава“, рече директорот Мавровски.
„ Јас сум радосен што работам овде, бидејќи не сум работел во земјава од 2011, и е убаво да се работи на својот јазик. Ние имавме многу убави осум недели работа и веруваме дека завршивме одлична работа. Беше задоволство да се работи со талентираниот ансамбл на Народен Театар Битола, предводен од Огнен Дранговски, еден од најдобрите актери во Македонија и Балканот. Верувам дека ЕДМОНД ќе стане значајна точка во несомнено богатата историја на Народен Театар Битола“, рече режисерот Оливер Мицевски.
Претставата го следи вртоглавото / спирално патување на бизнисменот Едмонд Бурк и неговите кошмарни 48 часа во њујоршкото подземје, каде што барајќи возбуда и среќа, од баналноста на неговата канцеларија и монотон семеен живот завршува како убиец и подоцна како затвореник, најверојатно осуден на доживотен затвор. Богат со многу параболи, референци на Хамлет и Библијата, прошаран со несекојдневно брутален јазик и агресивни сцени, главното прашање коешто Едмонд го отвора е прашањето на слободата. Што е слободата всушност? Дали потрагата по слобода прави всушност, незабележително да станеме робови на својата (потрага по) слобода. Дали откажувањето / лимитирањето на своите желби го олеснува патот кон слободата? Не случајно, мотото на Едмонд е : “Внимавај што посакуваш.”
Покрај Дранговски во претставата играат Валентина Грамосли, Соња Михајлова, Марјан Георгиевски, Ана Грамосли, Борче Ѓаковски, Александар Стефановски, Филип Мирчевски, Викторија Степановска-Јанкуловска и Маја Андоновска-Илијевски. Сценографијата е на Валентин Светозарев, костимографијата на Благој Мицевски, а музиката на Марјан Неќак.
Култура
Скопско лето: В понеделник џез концерт на Ѓорги Шаревски трио во Сули ан

Дирекцијата за култура и уметност на Скопје в понеделник повикува на џез концерт на Ѓорги Шаревски трио во Сули ан со почеток во 20.30 часот. Покрај Шаревски, ќе учествуваат и Акира Накамура од Окинава, Јапонија на тапани и Оливер Јосифовски на контрабас.
„Извонредна интеркултурна соработка, каде што триото на Георги Шаревски се обединува со еминентниот јапонски тапанар Акира Накамура за динамичен настап што умешно ја обединува источната прецизност со европската џез естетика.Предводено од македонскиот гитарист и композитор Георги Шаревски, фокусот на ова посебно трио се автентични авторски композиции, прецизна меѓусебна комуникација и соврмени хармонски структури. Со приклучувањето на Накамура и неговиот изразен ритмички јазик и смела импровизациска визија, овој исклучителен настап претставува возбудливо музичко патување исполнето со спонтаност, експлозивна енергија и бесконечен грув“, велат од Дирекцијата за култура и уметност.
Публиката ќе има можност да слушне внимателно избрана програма составена од авторски композиции, кои ги прошируваат хоризонтите на современиот џез израз.
Култура
Џез концерт на 30 јуни – Георги Шарески Трио во Сули ан

Во рамки на програмата на Скопско лето на 30 јуни (понеделник) во 20:30 часот во Сули ан (Стара Чаршија) ќе се одржи концерт на Георги Шарески Трио.
Организаторите велат дека овој концерт претставува извонредна интеркултурна музичка соработка, каде што триото на македонскиот гитарист и композитор Георги Шарески се обединува со врвниот јапонски тапанар Акира Накамура, како и со истакнатиот контрабасист Оливер Јосифовски. Настапот нуди динамична комбинација на автентични авторски композиции, ритмичка прецизност, импровизација и бесконечен џез грув.
Програмата опфаќа внимателно избрани композиции кои ја истражуваат границата помеѓу современиот џез и традиционалната музика, исполнета со енергија, спонтаност и иновативност. Ова е прво гостување на Акира Накамура во Македонија – музичар со светска кариера, кој има соработувано со имиња како Хироми Уехара, David Fiuczynski и BIGYUKI.
Билетите се продаваат по цена од 400 денари, и можат да се набават на влезот од Сули ан, на денот на настанот и онлајн преку платформата Купи карти: https://www.karti.com.mk/skopsko-leto.nspx.