Култура
По настапите во САД и Франција, уникатно музичко патување со младата вокалистка Натали Зарин во „Станица 26“

На 28 март, вторник, со почеток во 21 часот, на сцената во ноќниот клуб „Станица 26“ зпрвпат ќе настапи младата вокалистка Натали Зарин. Ова уникатно целовечерно музичко изненадување, со наслов „Рапсодија 26“, е замислено како фузија на разни музички жанрови и звуци, повеќе и помалку познати на нашата сцена, обоени со иновативен призвук.
„Овој музички проект нуди нов и препознатлив звук, кој ги спојува елементите на поп, соул, електроника и денс-музика. Креираме оригинални аранжмани на веќе познати мелодии, преработени во уникатен стил и создаваме нов звук. Така, се обидуваме да допреме до публиката и да создадеме едно ново и незаборавно искуство. Нашата музика е спој на разни жанрови, кои ги рушат конвенционалните граници“, вели Зарин, која на сцената ќе настапи со поддршка на музичарите: Никола Бочваров на бас-гитара, Александар Ванчовски на тапани, Петар Лукиќ – клавијатури и Иван Петровски – гитара.
Музичкото патување ќе биде отворено со оригинална музика од „Авија“ (инструментална верзија). Прв акт: „Габриел“, потоа, следуваат изведби на песните: „Чувствувам љубов“, „Засекогаш повеќе“, „Треска“, „Роден да умре“, „Во состојба на интоксикација“. По интермецото со Париз од „Авија“ (инструментална верзија), следува втор акт: „Панаме“ и песните: „Не плачи за мене Аргентина“, „Прекрасниот остров“, „Боем“, „Тебе ти е редот“, „Повлечи се“ и „Ми недостигаш“. И трети акт „26“ и мелодиите: „Подготвен или не/не сакам да знам“, „Чекори една мичлја во моите чевлиж“, „Ќе преживеам“ и „Не е во ред, но добро е“.
Натали е ново име на македонската музичка сцена, а вокалната техника ја образова на Факултетот за музичка уметност во класата на професор Борис Трајанов.
Во 2018 и 2019 година се доусовршила на приватниот истражувачки универзитет – Музичкиот конзерваториум The New School во Њујорк. Претходно, има посетувано и часови по глума во студиото на Ивана Чабак во Лос Анџелес (2016/2017).
Минатата година, за време на нејзиниот престој во Париз, Франција, има настапувано во клубот Le Piaf и во прославеното кабаре-бар Boeuf Sur le Toit.
Во Соединетите Американски Држави досега имала неколку настапи во живо, помеѓу кои во Town Hall Ptown, Tin Pan Alley late night show и на „Училишна ноќ“ во Лос Анџелес.
Досега има настапувано и со оркестарот на Национална опера и Балет во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Филмот „Мајка“ на Теона Стругар-Митевска утре во Венеција ја отвора програмата „Хоризонти“

Денес, 26 август 2025 година, се одбележуваат 115 години од раѓањето на Мајка Тереза во Скопје. Веќе утре, 27 август, токму во пресрет на овој значаен јубилеј, на 81. меѓународен филмски фестивал во Венеција, ќе се одржи светската премиера на филмот „Мајка“ (Mother) на Теона Стругар-Митевска.
Филмот ќе ја има честа да ја отвори престижната програма „Хоризонти“ (Orizzonti) на фестивалот, која е посветена на најновите авторски и уметнички тенденции во светската кинематографија.
„Мајка“ е инспириран од животот на Мајка Тереза прикажувајќи ја Колката во 1948 година во моментот кога таа ја носи клучната одлука да го напушти манастирот и да им се посвети на сиромашните.
Филмот е копродукција на Северна Македонија, Белгија, Шведска, Данска и Босна и Херцеговина. Во главните улоги настапуваат светски познатите актерки Нуми Рапас и Силвија Хукс заедно со Никола Ристановски, Лабина Митевска и други.
Официјалната премиера ќе се одржи на 27 август во 16 часот во Sala Darsena во рамките на фестивалот во Венеција.
Култура
Австралиска премиера за „Јон Вардар против галаксијата“ во срцето на Сиднеј

Првиот македонски долгометражен анимиран филм „Јон Вардар против галаксијата“, во режија на Гоце Цветановски, ќе ја има својата австралиска премиера на Sydney Science Fiction Film Festival – најголемиот филмски фестивал во Австралија посветен на научната фантастика.
Шестото издание на фестивалот ќе се одржи од 3 до 5 октомври во центарот на Сиднеј во престижниот комплекс Event Cinemas George Street. Филмот на Цветановски е во трка за наградата Рон Коб за најдобар игран филм – именувана по легендарниот концептуален уметник Рон Коб (Ron Cobb), кој остави траен белег во светската кинематографија со својата работа на филмски класици како Осмиот патник, Војна на Sвездите и Враќање во иднината.
„Фантастиката за мене отсекогаш била средство да зборувам за реалноста. Среќен сум што австралиската публика и македонската дијаспора ќе имаат можност да го проследат филмот на големото платно. “ изјави режисерот Гоце Цветановски.
Сценариото на филмот го потпишува Гоце Цветановски, арт директор е Михајло Димитриевски – Тхе Мичо, а директор на анимација е Димитар Ѓоргиев. Продуценти на филмот се Алан Кастиљо, Ева Конрад, Браќа Калинови и Ладо Шкорин. Во главните улоги настапуваат Жарко Димоски, Дамјан Цветановски и Емилија Мицевска. Другите улоги ги толкуваат Филип Трајковиќ, Тони Денковски, Атанас Атанасовски, Слаѓана Вујошевиќ, Мартин Ѓоргоски, Елена Тарчуговска и Бојана Тосковска.
Култура
Гала Матевска за песната „Студ“ ја доби наградата „Енхалон“ на Струшките вечери на поезијата

Гала Матевска за песната „Студ“ ја доби наградата „Енхалон“ за најдобра песна прочитана од млад автор на Струшките вечери на поезијата.
Одлуката ја донесе тричлена жири-комисија во состав: Стефан Костоски (претседател), Никола Ѓелинчески (член) и Пепи Стамков (член).
„Песната „Студ“ на Гала Матевска изобилува со цврсти поетски слики за кревкоста на телото и тежината на душата. Сликите на месечини што висат од прстите, напукнати коски и облаци над планините ја претвораат природата во огледало на внатрешниот свет. Поетесата не се одмерува со планините во метри, туку со денови, генерации и таги. Времето тече и се преклопува, минатото и сегашноста се судруваат, а вистината се открива преку болката и сеќавањето. Во сржта на оваа песна има мешавина од спротивности: тишина што зборува, неподвижност полна со движење, тага испреплетена со убавина. „Белите океани“ симболизираат и минато и иднина, а последната слика – студот на друго лице што студи на своето – ја нагласува блискоста и оддалеченоста што постојат истовремено. Лирична и искрена, песната ја носи борбата со сопствената тежина, но и потрагата по светлина и возвишеност“, стои во одлуката на жири-комисијата.
64-тите Струшки вечери на поезијата завршија синоќа со меѓународниот поетски митинг „Мостови“ и врачување на највисоките фестивалски признанија, „Златен венец“ на словачкиот поет Иван Штрпка , „Браќа Миладиновци“ на македонската поетеса Јулија Величковска и „Мостови на Струга“ на поетот Матеуш Шимчик од Полска.