Култура
Фестивалот на полски филм „Висла“ на МФФ Киненова
Со проекцијата на филмот „Брижит Бардо, засекогаш“ во режија и по сценарио на Лех Мајевски од викендов почна претставувањето на полската кинематографија во рамките на фестивалот Киненова.
Станува збор за второ издание на полскиот филмски фестивал „Висла“, кој во партнерство со МФФ Киненова од 13 до 18 октомври во Скопје ќе ги прикаже и филмовите: „Опасни Господа“ во режија на Мачеј Кавалски, „Под површината“ во режија на Јацек Блавут, „25 години невиност: Случајот на Томек Коменда“ во режија на Јан Холубек.
Во „Брижит Бардо, засекогаш“, Мајевски го прикажува периодот на средината на 20-от век во Народна Полска. Главниот лик, Адам живее со својата мајка, а таткото бил пилот од Втората светска војна и подолго време никој нема слушнато ништо за него. Не е познато дали тој останал во Англија или се вратил во земјата и се крие за да избегне прогон. Од него пристигнуваат пакети и разгледници, но Адам, кој никогаш не го видел својот татко, се сомнева дека пакетите ги испраќа некој друг.
„Опасни господа“ на Мечеј Кавалски ја раскажува приказната заТадеуш Бој-Зелењски, Виткаси, Џозеф Конрад и Бронислав Малиновски кои се будат по многу пијана ноќна забава, никој на ништо не се сеќава, а ситуацијата не ја подобрува ниту лешот на непознат маж пронајден на подот. Згора на тоа, државните обвинители чукаат на вратата од куќата и тука е почетокот на неволјата…
Јацек Блавут во „Под површината“ не враќа во 1940 година, додека сојузничките војници френетично се евакуираат на плажите во Данкерк, полската подморница ОРП Орзел тргнува на опасна мисија во Северното Море. На линијата на движење ќе наиде на подводни мини, воздушни бомбардирања и непријателски бродови. Екипажот мора да се соочи со зголемена физичка и ментална исцрпеност. Но, вистинскиот непријател е невидлив, скриен во клаустрофобичната внатрешност на бродот…
„25 години невиност“ – режисерското деби на Јан Холубек е трогателна трилер – драма базирана на вистински настан во Полска. Филмот ја раскажува приказната за животот на Томаш Коменда – млад човек погрешно осуден на 25 години затвор за силување и убиство на тинејџерка. Филмаџиите се обидуваат да најдат одговори на прашања кои и денес ги мачат сите. Како можеше ова да се случи? Зошто еден невин човек мораше да чека 18 години во ќелија за правда.
Целта на фестивалот „Висла“ е да ја претстави полската култура во странство и да ја промовира полската кинематографија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.