Култура
Хуманитарен концерт за Турција и Сирија во „Јадро“
Утре, со почеток од 12 часот, во КСП „Центар Јадро“, ќе се одржи хуманитарен концерт за погодените семејства од катастрофалните земјотреси, во кои загинаа повеќе од 50.000 луѓе во Турција и Сирија.
Од КСП „Центар Јадро“ велат дека како и сите други граѓани во Македонија со големо жалење ја примиле тажната вест.
„Нашата установа, која е плод на колективна грижа и солидарност, чувствува обврска да им даде поддршка на оние што се најпогодени од оваа природна катастрофа. Во ова тешко време веруваме дека секој придонес во каква било форма е од огромно значење за двете земји“, велат организаторите на хуманитарниот настан.
Им изразуваме огромна благодарност на музичарите што несебично ја поддржаа оваа иницијатива.
На канцерот ќе настапат повеќе музичари.
Хана Корнети
Хана Корнети е пејачка, писателка, читателка, гледачка, надежна вештица, повремена градинарка и пропаднат левичар. Првото укулеле го добива подарок по неколкумесечното кенкање и несуптилни алузии. Укулелето го сака бидејќи е релативно едноставен инструмент, кој истовремено произведува убав, специфичен звук. Пред сѐ, укулелето е одлична придружба за она што Хана сака да го прави со својата музика – да раскажува приказни.
музички проект „Фортуна“: Марија Каева – вокална солистка,
музичарка и текстописец, Владан Дробицки – трамбонист,
Дино Милосављевиќ – тапани
Марија Каева е вокална солистка, музичарка и текстописец, како и радиоводител со петнаесетгодишно искуство. Музичкиот проект „Фортуна“ – зад кој стои потпишана заедно со Владан Дробицки, создаваат вистински носач на звук на пролетта! Песните на Фортуна“, освен што може да ви го разубават денот со мекиот вокал, радосните звуци и паметно режирана електроника – тие истовремено еманципираат за заматената зелена оска околу која би требало да се врти светот. Дробицки е тромбонист во оркестарот на Националната опера и Балет и воедно многу добро познат на музичката џез-сцена, кој се занимава и со музичка продукција. На концертот ќе ги придружува тапанарот Дино Милосављевиќ.
Трио: Драган Теодосиев – тапани, Филип Букуршлиев –
електрична гитара, Јордан Костов – хармоника
Драган Теодосиев е активен тапанар на македонската сцена веќе две децении. Со музика се занимава од најрана возраст, а своето музичко образование го има стекнато во средното музичко училиште и на џез-академијата во Штип. Активно работи со бендовите: Shock Troopers, Svetlost + Odron Ritual Orchestra, Cobalt Code Unit, Time Out, Sarah Mace, Miss Machiko’s Jazz Ensemble, Shikachi Ensemble, Invisible Fence Quartet, а соработува и со Јордан Костов, Тони Китановски, Сашо Поповски. Има настапувано во цела Европа, а бил дел и од музичкиот состав на театарска група при организацијата „Мадам Фортуна“ со седиште во Антверпен, Белгија, и работел на повеќе интернационални проекти. Во минатото настапувал и снимал со познати македонски метал имиња, како Aeon Arcanum, Mindfist и Victim Yield.
Гитаристот и композитор Филип Букршлиев е добитник на наградата за најдобар млад џез-музичар. Букршлиев е еден од најактивните и најплодни припадници на новата генерација македонски џезери, кој за краток период создаде богата дискографија. Тој се појави на домашната музичка сцена како фронтмен на „Фајтинг виндмилс“, а во последните години повеќе се фокусира на џезот и импровизирањето. Како еден од најбараните македонски џез-гитаристи, неговото име се појавува на 20-ина изданија во изминатите пет години.
Јордан Костов дипломирал на Факултетот за музичка уметност во Скопје на одделот за хармоника. Неговата музика е под влијание на world music, класичните средновековни мајстори и длабоко се поврзува со музиката од Македонија. Имал настапи на многубројни фестивали, меѓу кои и Fusion Ethno Fest во Белград, Spancir fest во Вараждин, Културен центар Umblock во Солун, Sarajevo Jazz Festival, џез-фестивалот во Кавадарци, Охридско лето и многу други. Костов има изработено и музика за многубројни театарски и филмски проекти во Азија, Европа и во Јужна Америка. Повеќе за работата на Јордан Костов можете да најдете на неговата веб-страница https://yordankostov.com/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Со „Оче наш“ и доделувањето награди завршува годинешниот „Синедејс“
Со доделувањето на наградите во Официјалната и СЕЕ селекција се затемнува платното на овогодинешниот Cinedays. По седум интензивни филмски денови публиката имаше можност да погледне повеќе од 50 филмови, но за наградите на фестивалот се натпреваруваат осум во официјална конкуренција и шест во СЕЕ селекцијата.
„Имавме прекрасен фестивал и буквално „Се гледаме од другата страна“ со сите предизвици кои ни следеа во подготвителниот период. Филмската магија не покори и нас како организатори и гостите кои беа бројни и на ова издание. Сега сме во очекување на имињата на добитниците на наградите кои вечер ќе ги соопштат жири комициите во двете конкуренции“ – вели Маргарита Арсова програмски координатор на фестивалот.
По завршувањето на церемонијата на доделување на награди вечерва на репертоар е филмот „Оче наш“ на Горан Станковиќ, во кој македонски копродуценти се Огнен Антов и Стојан Вујичиќ од Dream factory.
„Филмот се бави со едно многу специфично место, место во кое во име на верата и духовноста, насилството се користи како оправдување за помош. Прва работа која ме наведе да размислувам за идеја на овој филм беше снимка од претепување во манастир во Црна Река. Таа снимка се појави во 2009 година, а контрадикторноста на сцената на сурово тепање на човек, со удирање на глава од икона на ѕид сосема ме збуни и вознемири. Од таму тргнав. Се разбира не би сакал да се генерализира на сите заедници кои пружаат духовна поддршка“ – вели режисерот Станковиќ.
Македонската страна на продукцијата во самиот филм ја претставуваат екипата сниматели на звук: Игор Поповски – Нивеа, Дејан Михајловски, Дарко Бошковски, Александар Ристевски и Горан Стаменков и брилијантниот Тони Михајловски:
„Тони е блескав актер со исклучително богата кариера и многу ми беше инспиративно да работам со него“ – дополнува режисерот Станковиќ.
Покрај Михајловски, во филмот играат: Вучиќ Перовиќ, Горан Марковиќ, Дадо Ќосиќ, Лазар Тасиќ, Јасна Жалица, Тони Михајловски, Ненад Хераковиќ …
Филмот ја имаше својата премиера на 50 јубилејно издание на престижниот филсмки фестивал во Торонто, а со него се завтора и вечерашниот Cinedays. По проекцијата, следи диџеј сет на Кунгфулиш, односно Ненад Стефановски од музичкиот состав Фулишгрин.
Култура
Македонскиот филм „Неми филмови“ меѓу најдобрите анимирани кратки дела за 2025 според „Animation Magazine“
Kраткометражен анимиран филм „Неми Филмови“ на режисерот Крсте Господиновски е вклучен во изборот на Animation Magazine за најистакнати анимирани кратки филмови во 2025 година.
Во текстот „Избор на познавачот: Субјективен критички преглед на најдобрите кратки анимирани филмови за 2025 година“, авторот Крис Робинсон – долгогодишен уметнички директор на Меѓународниот фестивал за анимиран филм во Отава – го наведува филмот како едно од најзначајните остварувања во годишниот преглед.
Робинсон го оценува „Неми Филмови“ како дело што се издвојува по визуелниот јазик, атмосферата и авторскиот пристап, особено преку неговата stop-motion естетика и внимателно развиена визуелна нарација. Како влијателна фигура во светот на независната анимација, неговата препорака се смета за важен сигнал за квалитет и релевантност на филмот.
Култура
Сорентино и филмот „Југо Флорида“ со Андрија Кузмановиќ на репертоарот на „Синедејс“
Денес, на претпоследниот ден од 24 издание на фестивалот Синедејс, во киното Фросина, со почеток од 20 часот ќе биде прикажан филмот “Помилување” во режија на славниот италијански режисер Паоло Сорентино. Филмот “Помилување” ја имаше својата светска премиера на 82 издание на Венецискиот филмски фестивал, со што се отвори и 82-та Мостра. Токму на овој фестивал, актерот Тони Сервиљо ја доби наградата “Волпи” за најдобар актер, а филмот беше номиниран за “Златен Лав”.
На истата локација, во 22.30 часот ќе биде прикажан филмот “Југо Флорида” во режија на Владимир Тагиќ, каде главната улога ја остварува популарниот српски актер Андрија Кузмановиќ. За ова остварување, актерот ја добива наградата “Срце на Сараево” за најдобра улога на Сараевскиот филмски фестивал во 2025 година.
Од останатите филмови на вечерашниот репертоар на фестивалот, во Денснг салата на МКЦ следи и краткиот филм “Зајак” во режија на Ханис Багашов кој се здоби со наградата Најдобар филм на фестивалот на краток филм Дримшорт во Струга и “Еден од оние денови кога Хеме умира” во режија на Мурат Фиратоглу. Во Кинотеката, ќе биде прикажан филмот “За Ева” краткиот филм во режија на Бојан Василев и “Вена” во режија на Кјара Флајшхакер.
Билети за фестивалот може да се набават на официјалната страница www.cinedays.mk.

