Култура
„Поколенија“ на АКТО_4
Четвртото издание на Фестивалот за современи уметности АКТО_4 оваа година ќе се одржи од 12 до 16 август на различни локации низ Битола
Како и досега, фестивалот ќе понуди интернационални тетарски перформанси, визуелни уметности од новиот бран артисти во современата уметност од Македонија и регионот и различен пристап кон уметничките форми и простори на изразување, социјални форуми и дебати на темата „Поколенија“. Наcтаните на фестивалот во Битола ќе се одвиваат на покриви, во напуштени објекти: хотели, стари куќи, згради, автобуската станица, Офицерскиот дом и други локации кои ги поврзуваат различните генерации низ времето.Оваа година на АКТО ќе гостуваат звучни музички имиња – едни од носителите на новата српска сцена „Repetitor“, „Actor One“ (Грција), потоа ќе се одржи промоција на новиот албум на „Bei the Fish“ за првпат во Битола и многу други.Атракцијата на АКТО_4 оваа година се Германците Das-Helmi куклен тeатар од Берлин.
Das-Helmi куклениот театар е создаден од берлинската формација Punktheatre, G-Ppunk Weiser Sektion. „Немавме актери па создадовме кукли“. Das Helmi своите корени ги влечат од берлинската панк сцена во деведесеттите. Се формирале на почетокот на милениумот како експеримент.
„Repetitor“ е формиран во зимата 2005 година во Белград кога Ана-Марија Цупин им се приклучи на Милена Милутиновиќ и Борис Властелица кои претходно беа дел од „The Spleeners“. Желбата за правење песни на мајчин јазик и свирење беше голема, па така веќе на почетокот на 2006. Repetitor ги забележува своите први настапи. Следуваат низа концерти низ Белград, но и во Суботица, Нови Сад, Зрењанин, Панчево, Ниш, Врање, Скопје, Загреб, Осиек, Бања Лука, Пула… Минатата година го издадоа долго очекуваниот деби албум „Sve što vidim je prvi put“. Модерно рокенрол издание кое освојува со својата енергија и непосредност. Popboks.com го нарекува најважен уметнички исчекор во српската популарна музика во новата историја.
„Actor One“ е музички проект на John Dimas и Ison. Стационирани се во Солун, а работат како диџеи на свои одделни електронски проекти носејќи ја денс музиката понапред заедно со веќе оформените „NON Collective“. Делејќи ја истата страст за музика што се базира на house и detroit groove, тие почнуваат да работат заедно пред околу една година и создаваат сопствени електронски денс звуци.Деби албумот на „Actor One“ – „Golden Girl” беше издаден во ноември 2008 за Bloop recordings и беше поддржан од страна на многу артисти меѓу кои и Hell, Agoria и Heidi. Исто така, една нивна трака ќе биде дел од компилацијата International Deejay Gigolos. Нивните уникатни диџеј сетови со четири грамофони се презентирани на разни подиуми во Грција и во странство. Врвни се нивните изведби на Reworks фестивалот како и на Nuits Sonores фестивалот во Франција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Во Кинотека ќе биде прикажан грчкиот филм „Што ако“
Грчкиот филм „Што ако“ (What If) во режија на Христофорос Папакаљатис, ќе биде прикажан вечер во 20 часот во Кинотека.
Прикажувањето на филмот е дел од тековната серија проекции на грчки филмови на Амбасадата на Грција, со наслов „Ајде да се запознаеме“, иницијатива која има цел да ја приближи публиката до современата грчка кинематографија.
Филмот „Што ако“ е трогателна романтична драма од креаторот на светски признатата серија на „Нетфликс“ – Маестро во сина. Дејството на филмот се одвива во Атина во периодот на економската криза и ја следува приказната на Димитрис, 33-годишен ерген, кој живее навидум обичен живот. Една вечер, кога неговото куче, женка германски овчар со име Лоунсом, го поттикнува да излезе, Димитрис се соочува со клучна одлука: да излезе или да остане дома. Ако излезе, ќе ја запознае Христина, љубовта на својот живот; ако остане дома, ќе ја пропушти шансата да ја сретне. Филмот ги истражува вечните прашања за судбината, вистинската љубов и изборот прикажувајќи го истовремено и влијанието на сериозната економска криза врз луѓето и личните односи. Истата приказна е раскажана од две перспективи.
Влезот за проекцијата во Кинотека е бесплатен по принципот прв дојден – прв услужен. Филмот е наменет за лица над 16 години, информираат од амбасадата.
Култура
Почина Кетрин О’Хара
Почина Кетрин О’Хара, легендарна актерка и ѕвезда на серијата Schitt’s Creek и култните филмови Бубимир и Сам дома. Имала 71 година, а веста ја потврдила нејзината менаџерка, пренесе „Пипл“. Засега не се соопштени дополнителни детали.
О’Хара е родена во Торонто во 1954 година и кариерата ја започнала во легендарниот комичарски театар Second City, а потоа стекнала голема популарност со телевизиската емисија SCTV, за која освоила и награда „Еми“.
Филмската публика ја памети по улогите во Бубимир, Сам дома и Сам дома 2, како и по бројни филмови на режисерот Кристофер Гест. Глобална популарност доживеа со улогата на Моура Роуз во Schitt’s Creek, за која во 2020 година освои „Еми“, „Златен глобус“ и награда SAG.
Последните години гостуваше во серии и филмови, меѓу кои The Last of Us и Argylle.
Зад себе ги остави сопругот Бо Велч и нивните два сина.
Фото: скриншот од филмот „Сам дома“
Култура
Почина поетот и преведувач Тихомир Јанчовски
На 58-годишна возраст денеска во Скопје почина поетот и преведувач Тихомир Јанчовски.
Веста за неговото прерано заминување ја соопшти Друштво на писателите на Македонија, изразувајќи длабоко жалење за загубата на еден од најзначајните современи македонски автори и педагози.
Од Друштвото информираат дека за точниот датум и час за испраќање последен поздрав ќе следи дополнително известување.
Јанчовски беше поет, писател, преведувач, професор, музичар, издавач, автор на над триесет книги, пред сè поезија, преводи и (поетски) романи, како и една книга историја („Историја на православното монаштво на територијата на денешна Република Македонија“, Сигмапрес, Скопје, 2010).
Избори од неговата поезија се преведувани и објавувани во различни литературни списанија, застапен е во голем број антологии, а четири од неговите книги се преведени на други јазици. Преведуван е на англиски, француски, словачки, хрватски, албански, босански, грчки, германски, српски, полски, грузиски, персиски и италијански јазик. Тихомир Јанчовски, со својата автентичност и креативност останува еден од најомилените наставници на повеќе генерации средношколци во гимназијата „Орце Николов“, во меѓународното училиште „Нова“ и во Американската гимназија во Скопје.

