Претставата „Сестрите Прозорови“, продукција на Народниот театар „Јордан Хаџи Константинов-Џинот“ од Велес, ќе биде изведена на фестивалот Охридско лето на 5.8.2020 во предворјето на црквата „Света Софија“, со почеток од 21 часот, со што  ќе биде отворена драмската програма на годинешното издание на фестивалот. Оваа продукција, чија премиера беше на почетокот на 2020, е коавторски проект на Сашо Димоски и Васил Зафирчев, според мотиви на Чеховите „Три сестри“, авторски и документаристички материјали. Костимографијата на претставата е на Раде Василев, а во неа учествуваат актерите: Кети Борисовска, Маја Љутков, Славица Манаскова, Жарко Спасовски и Фаик Мефаилости, а плакатот е на Филип Коруновски.

„Дневник: Сестрите Прозорови“ е еден од текстовите во книгата „8/4“ на Сашо Димоски. Книгата „8/4“ ќе биде претставена токму со оваа фестивалска изведба. Издавачот „Култура“ за оваа книга на Димоски вели: „Книгата ’8/4‘ на Сашо Димоски привидно ја подигнува ковид-завесата на затворените театри. Во оваа книга се раскажуваат приказни од театарски и балетски сцени, се повикуваат духови од некои театри, се препишуваат дневнички страници. Во ’8/4‘ д-р Сашо Димоски маркира (на два јазика – македонски и англиски, како и низ мноштво фотографии) значајни точки во рецентната македонска театарска стварност и го презентира личниот, авторски инструментариум, го слика сопствениот homo ludens од другата страна на завесата“.

Филмовите на Манчевски продолжуваат на фестивали во Европа и Азија.

Вечерва „Врба“ на Манчевски ќе ја има романската премиера на најстариот и најголем романски интернационален фестивал – Трансилванија во Клуж-Напока. Ова е еден од првите фестивали во светот кој ќе се одржи во услови на пандемија – филмовите ќе се прикажат пред публика на отворени простори.

Кинеската премиера на филмот ќе се случи во август на фестивалот во Пекинг. „Врба“ ќе биде прикажан во престижната официјална програма за награди.

„Врба“ го започна своето патување со светска премиера на Римскиот филмски фестивал во октомври минатата година. Оттогаш филмот беше и дел од официјалните програми на светските фестивали во Тајпеј, Талин, ФЕСТ во Белград, Бенгалуру во Индија, Синеквест во Калифорнија, Сараево, Софија, и други.

„Врба“ ја освои и наградата Најдобар филм во програмата Недела на режисерите на 40. издание на филмскиот фестивал Фантаспорто во Порто, Португалија, како и наградата за најдобар филм на камерниот фестивал на независни филмови во Велингтон, Нов Зеланд.

Инаку, во престижната програма „Под ѕвездите“ на интернационалниот филмски фестивал во Нанси, Франција, во август ќе се прикаже и претпоследниот филм на Манчевски, „Бикини Мун“. „Биину Мун“ е американско, канадско-германска копродукција во која главната улога ја игра Кондола Рашад, а Манчевски го сними во 2017.

Проектот „Патиштата на хероите“ на Македонскиот народен театар кој се занимава со откривање и поддржување на поединците чија еколошка свест придонесува за позитивни општествени промени е поддржан од програмата „Креативна Европа“ во рамките на повикот за проекти за културна соработка на Западен Балкан со вкупна сума од 395.183 евра. Oва е првпат театар од Република Северна Македонија да добие средства од програмата „Креативна Европа“ од Европската Унија.

Станува збор за комплексен проект со времетраење од две и пол години, чиј почеток се очекува во февруари следната година. Покрај МНТ како главен партнер, во проектот се вклучени уште 6 организации од кои една од Македонија (Издавачка куќа „Гаврош“) и 5 од другите партнерски земји Италија (Ла Драматурџи), Грција (Лооп Амке), Босна и Херцеговина (Студио Театар), Словенија (Институт за театарска игра) и Србија (Ехо Анимато). Секоја од организациите се занимава доминантно со производство, промоција и истражување на театарски и сценски форми.

Финален производ на проектот, во 2022 година, ќе биде премиерата на копродукцијата „Народен непријател“ на Хенрик Ибзен, во режија на Нина Николиќ, во која ќе учествуваат автори од сите партнерски земји, а во изведба на актери од ансамблот на МНТ. Инспирирано од текстот на Ибзен, претставата ќе се занимава со испитување на улогата на поединецот во општеството, важноста на неговиот глас, како и погубната вистина дека гласот на мнозинството е секогаш помоќен од оној на поединецот независно кој е во право. Премиерата на претставата ќе се случи во Македонскиот народен театар, а потоа ќе биде изведена во сите партнерски земји, како и на фестивали во Европа и регионот.

Во рамките на проектот се предвидени и други бројни програми (професионални работилници под водство на Томи Јанежиќ, изложба под водство на Џан Мариа Черво, креативни истражувања под водство на Ана Константиновиќ, издавачка дејност за деца под водство на Ника Гавровска, како и работилници од областа на современиот танц и гостувања на театарски фестивали итн).