На 4 септември (петок) во 12.00 часот, Кинотеката на Македонија свечено ќе бидат пуштени во употреба новите депоа за чување на националниот фонд на аудиовизуелни добра кои се изградени во сутеренот на административниот дел на Кинотеката

Реализацијата на овој проект е прва фаза од капиталниот проект на Министерството за култура за Обнова и ревитализација на Хавзи-пашините конаци. Имајќи ја предвид комплексноста и огромното значење на проектот за Обнова и ревитализација на Хавзи-пашините конаци, реализацијата на истиот е поделена во неколку фази.Со пуштањето во употреба на новите депоа за чување на националниот фонд на аудиовизуелни добра е завршена првата фаза во која националната филмска продукција ќе добие адекватен простор за чување, а со тоа и истиот ќе биде заштитен, и фондот ќе биде префрлен од Хавзи-пашините конаци во новите депоа. Со новите депоа Кинотеката за првпат во своето 35-годишно постоење се стекнува со оптимални услови за чување на националната продукција, изработени според сите градежно-технички стандарди и според стандардите за чување филмови препорачани од светската асоцијација на филмски архиви – ФИАФ. Со тоа Македонската кинотека се вбројува во малкуте светски кинотеки кои ги исполнуваат стандардите за чување филмови.Бидејќи адекватното чување на филмската лента е еден од основните предуслови во заштитата на аудиовизуелното богатство, ова е огромен чекор во заштитата на истото, со што македонските филмски материјали ќе добијат соодветен третман. Во употреба ќе бидат пуштени 5 разладни комори наменети за чување на националната филмска продукција, негативи и архивски копии, со капацитет од 12 000 филмски кутии. Со оваа зафатнина на простор за депонирање, Кинотеката ќе биде обезбедена со простор за чување на соодветните материјали за наредните 30 години. Покрај просториите за чување на филмски артефакти, Кинотеката ќе добие и работни простории: лабораторија за чистење филмови и фото-лабораторија на црно бел процес, пикерај (техничко одделение за отстранување на физичките недостатоци на филмската лента), две простории – филмска монтажа за 35мм и 16мм филмови, електронска монтажа за преглед и обработка на филмовите снимени на елетронски начин (видео и дигитал), како и простории во кои ќе биде сместен филмскиот каталог (податоците за националната филмска продукција) и базата на податоци.Депоата свечено ќе ги пушти во употреба министерката за култура Елизабета Канческа – Милевска, во присуство на гости од пошироката културна и општествена јавност како и претставници на кинотеки од странство: Југословенска кинотека, Романска кинотека, Бугарска кинотека, Словенечка кинотека, Албанска кинотека, Чешка кинотека, Хрватска кинотека, Грчка кинотека… По свеченоста, ќе биде отворена изложба „Движење“ во авторство на Роберт Јанкулоски, а ќе бидат прикажани и ексклузивни архивски материјали од филмскиот архив на Кинотеката, програма составена од најзначајните филмски материјали кои ги поседува Кинотека на Македонија: снимките на Манаки и документарниот филм „Македонија во слики“ на Арсениј Јовков (1923), во пијано придружба на Дарко Мариновски.Вечерта, со почеток во 20 часот, ќе биде прикажана селекција на македонски филмови од почетокот на македонското организирано филмско производство, односно „Македонски филмски прегледи“ (1947 – 1951) кои се реставрирани од страна на вработени во Кинотеката.