Култура
„ОСФАФ 2009“ – Интернационален филмски фестивал
На 23 и 24 октомври, со почеток во 20 часот, во Кинотеката на Македонија ќе се одржи 22. издание на Интернационалниот филмски фестивал „ОСФАФ“, фестивал на алтернативен и студентски филм
Програмата поделена на две одделни проекции опфаќа 30 филмови. На фестивалот беа пријавени 114 филмови од 20 земји од светот. Жирито е во состав: Илинденка Петрушева (Македонија), Томислав Готовац (Хрватска), Станимир Трифонов (Бугарија), Миле Гроздановски (Македонија) и Виктор Иванов (Македонија) му додели Гран при за најдобар филм на „Вежбата“ од Роберт Лоример од Велика Британија. Првата награда му е доделена на Благоја Стојковски (Македонија) за „Неуспешен лет“, втора на Владимир Илиев (Бугарија) за „Кавга“ и трета награда за „96 скалила“ на Петре Чаповски (Македонија). Наградата за најдобра режија му припадна на Сакари Макела од Финска за филмот во „Добро и зло“, за најдобро сценарио на Сања Христовска, Енвер Џемал и Никола Стојчевски за „Легенда за една љубов (Македонија), најдобра улога за Џошуа Хеик за „Ангел од виножитото“ (Германија), за најдобра анимиран филм наградата „Ане Василевски“ му е доделена на Ричард Меитерн од Естонија за „Забрането ловење риба“.„ОСФАФ“ се одржува веќе четврта година по ред од кога беше возобновен. Фестивалот е во организација на Академскиот кино клуб од Скопје, и е помогнат од Филмскиот фонд на Македонија и од традиционалните партнери на „ОСФАФ“. Фестивалот е одлична можност македонската публика да ги види најновите студентски и непрофесионални филмски остварувања на автори од целиот свет. Како и минатите изданија, така и овој пат, организаторите на фестивалот се надеваат дека ќе ги задоволат очекувањата на фановите на независниот филм, и на пошироката филмска публика која сака да види интересно парче краток филм.Влезот за проекциите е бесплатен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Македонскиот филм М со ново гран при, овој пат во Шведска
Македонскиот филм М, во режија на Вардан Тозија, а во продукција на „Фокус покус“, ја освои главната награда за најдобар филм на интернационалниот фестивал на жанровски филм Light Till Dark во Оребро, Шведска.
„Овој филм носи нова перспектива на еден познат жанр. Филм со силни актерски изведби и сензитивна режија. Тоа е прекрасен филм, еднакво визуелно и тематски. Филм кој нè остава со надеж, но и скршено срце“, беше образложението на интернационалното жири.
Фестивалот Light Till Dark е фестивал чија селекција обединува нови и класични филмски дела од областа на фантастиката, научната фантастика и хоророт. „Целта на овој фетивал е да се промовираат жанровски филмови, но и да се откриваат нови дела, кои не стигнуваат во широка дистрбуција“, изјави Даниел Лундстен, директорот на фестивалот.
М не запира со својата фестивалска турнеја. Следни проекции ќе се одржат на почетокот на декември, каде што М ќе ги има својата холандска и финска премиера во рамките на официјалните селекции на фестивалот Eastern Neighbors во Хаг и Интернационалниот скандинавски филмски фестивал во Хелсинки.
Култура
Прва читачка проба на претставата „Народен пратеник“
Првата читачка проба на претставата „Народен пратеник“ од Бранислав Нушиќ, во адаптација и режија на Егон Савин започна денес, а асистент на режија е Шенај Мандак.
Во претставата играат: Александар Микиќ, Дарја Ризова, Тони Михајловски, Јордан Симонов и Тања Кочовска. Како сценограф се потпишува Весна Поповиќ, костимограф е Роза Трајческа – Ристовска, а преводот е на Загорка Поп-Антоска Андовска.
Овој „Народен пратеник“ е трета постановка на познатата драма на Бранислав Нушиќ. Првата постановка премиерно е изведена на 8 мај 1945 година, во режија на Тодор Николовски, и таа е втората поставена драма на сцената на МНТ. Поставена е уште еднаш – 24 април 1993 година, во режија на Димитрие Османли. Таа е една од најпосетените и најдолговечни претстави: се игра до 2008 година, со вкупно 188 изведби. Режисерот Савин и авторот Нушиќ се неминовен и неизоставен дел од МНТ. Егон Савин се враќа во МНТ по подолг период – ова е негова трета претстава во театарот, претходно ги има поставено „Злосторство и казна“ (1994) и „Лаж и паралаж“ (1996). Бранислав Нушиќ, пак, е еден од најпоставуваните автори на сцената на МНТ.
Во 80 години постоење, од 1945 година до денес, поставени се осум негови дела со вкупно шеснаесет постановки од повеќе режисери и во различни верзии.
Култура
Изложба на Јана Манева-Чупоска во Истанбул
Јана Манева-Чупоска изложува во Истанбул во Македонскиот центар. Отворањето на изложбата е на 27-ми среда во 19.00 часот.
Манева-Чупоска ќе излага цртежи од циклусот „Љубовници во пандемија“. Насловот има алегорична конотација и алудира на надежта и потребата на човекот кон подобро утре. Преку фигуративните композициски ликовни претстави, колажни експерименти авторката Јана Манева – Чупоска ја пренесува нејзината психолошка и емотивна состојба во време на корона кризата, но и покрај официјалното завршување на вирусот кај човекот остави длабоки психолошки траги на страв и несигурност.
Изложбата се состои од триесеттина дела, цртежи и колажи изработени во комбинирана техника молив, јаглен, акрил и темпера и еден диптих во поголем формат изработен во техника акрил.
Изложбата е финансирана од Министерството за култура и туризам на Р.С. Македонија како изложба од национален интерес за 2024 година.