Македонија оваа година ги виде Мориконе, Дали, Џорџ Бенсон, Дајана Крол, триото на Чик Кориа… Она што ја одбележа светската културна сцена оваа година дефинитивно се жените писатели и поместувањето на многу стереотипи

Јануари беше во знакот на изложбата „Ентропа“ поставена во Советот на Европа во знак на шестмесечното претседателство на Чешка со Европската унија. Многу од земјите-членки беа навредени на чешката смисла за хумор и концептот на авторот Давид Черни. Во неговата пазл-композиција Бугарија беше претставена како турски тоалет, Полска осамна претставена со свештеници како веат знаме на хомосексуалците, додека Холандија беше претставена потопена целосно во вода и единствено што се гледа притоа се муслиманските минариња. Франција беше сведена на паролата „Штрајк“, додека на картата на Луксембург стоеше натписот „распродажба“.

Февруари – „Јужниот ангел“, колосалната скулптура на бел коњ на авторот Марк Волингер беше поставена во Кент, Англија.

Март – илјадници Кубанци го посетија Museo de bellas artes во кој за првпат беше претставена современата уметност од САД. Изложбата насловена „Челзи во посета на Хавана“ опфати дела од триесетина уметници од њујоршкиот кварт Челзи.

Април – изложба на цртежи од Вилијам Блејк во музејот Тејт во Лондон, на која за првпат беа претставени девет дела кои биле дел и од неговата прва изложба во 1809 година во Сохо, Лондон.

Мај – Британското поетско друштво ја доби првата жена претседател, Керол Ен Дафи. Таа ја воспостави наградата „Тед Хјуз“ за Њујорк и ќе се доделува годишно во текот на десетте години од мандатот на Дафи од хонорарот што таа како поет-лауреат традиционално го добива од британската кралица.

Јуни – Прочуениот британски графити и герила уметник Бенкси, чиј идентитет е се‘ уште непознат, тајно ја организира[e и постави најголемата изложба од своите дела во Градскиот музеј во Бристол (Bristol’s City Museum & Art Gallery).

Јули – почина Пина Бауш, германската кореографка чие дело внесе револуционерни промени во областа на современиот танц. Таа беше уметнички директор на танцовиот театар Вупертал и беше позната по авангардните кореографии во кои правеше спој на танцот, звукот и фрагментираните наративи, а соработуваше и со филмските режисери Федерико Фелини, Педро Алмодовар и Вим Вендерс.

Август – Лондонската кралска опера (Royal Opera House) одлучи да ја оживее сезоната со поинаков вид на музичко-сценско дело. Јавноста  се запозна со креативниот дел од создавањето на операта, а како дел од развојот на либретото беа вклучени дел од членовите на друштвената мрежа Твитер.

Септември – Германската писателка со потекло од Романија, Херта Милер, ја доби Нобеловата награда за литература. Престижното признание го доби за нејзината литературна обработка на искуствата од комунистичката диктатура на Чаушеску.

Октомври – Британската авторка Хилари Мантел е овогодишната добитничка на Британската награда за литература – Букер, за романот „Замокот на волците“, приказна за политичките интриги во периодот на владеењето на Хенри VIII.

Ноември – Француската авторка со сенегалско потекло, Мари Ндиај, е добитничка на најпрестижното француско книжевно признание Гонкур за книгата „Три моќни жени“ и е првата жена добитничка на Гонкур од 1998 година, како и првата црна жена која ја добила оваа награда.

Декември – Престижната британска награда за современа уметност Тарнер (Turner) оваа година му е доделена на шкотскиот умтеник Ричард Рајт, за неговата ѕидна фреска во барок стил.