Култура
Колонијата „Папрадишки мајстори“ започнува вечерва
Сликарско-копаничарската колонија „Папрадишки мајстори“ започнува во среда вечер и ќе трае до 13 август
Колонијата годинава од село Папрадиште се сели во Велес во спомен-куќите на Јордан Хаџи Константинов-Џинот и Касапови кои беа целосно реновирани пред неколку години.На оваа сликарско-копаничарска колонија која се одржува шеста година по ред ќе учествуваат 12 сликари и копаничари од Македонија, Романија, Словенија, Србија и Бугарија.„Оваа е единствена колонија што се одржува на територијата на Велес во организација на Општината. Делата што домашните и странски копаничари, сликари и скулптори ги создаваат ги оставаат на општината, но тоа не е крајната цел. Целта пред сé е промоција на Велес како културно место со традиција и вредности. Важно е што најголемиот градител Андреа Дамјанов кој со неговата тајфа градел не само во Велес туку и Балканот потекнува од Папрадиште. Првиот сликар и последниот зограф Димитар Андонов Папрадишки потекнуваат токму од таму, исто како и прочуеното семејство Зографски. Карактеристично за нив е што со нивните дела биле познати и на Балканот, затоа и „Папрадишки мајстори“ има меѓународен карактер. Уметниците доаѓаат со задоволство, а некои од нив се секоја година присутни. Уметникот Драган Периќ од Ниш дури и на своето презиме го додаде Папрадишки бидејќи најголемата инспирација ја добива од тоа село. За првпат годинава колонијата ќе се одржи во градот во спомен куќите Касапови која уште е позната и под името куќа што лебди бидејќи се наоѓа на карпа и е без темели и куќата на Јордан Хаџи Константинов -Џинот. Тие се целосно опремени за потребите на уметниците, а предноста е што и другите сликари од Велес ќе имаат можност да бидат дел од оваа колонија, “ изјави за „Макфакс“ Катица Чадиева, од одделението за култура при Општина Велес.Освен локацијата преместен е и датумот на одржување на оваа колонија, па наместо за прославата на Петровден во Папрадиште на 12 јули, уметниците ќе бидат присутни на одбележувањето на празникот на градот Св.Пантејлемон 9 август. Делата кои уметниците ќе и ги подарат на Општината ќе бидат изложени на ликовна изложба на 9 ноември по повод Денот на ослободувањето на Велес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Македонскиот стрип на фестивал во Ужице, Србија
На покана на Градскиот културен центар на Ужице(соседна Србија) ,како еден од гостите на третото издание на стрип фестивалот „УЖИЧКИ СТРИП СУСРЕТИ“ беше поканет и Томе Трајков-програм координаторот на Македонскиот стрип центар со седиште од Велес. Оваа посета е финансиски поддржана од страна на Министерството за култура на Р.С.Македонија и е дел од Годишната програма за Меѓународна соработка за 2024 г.
„Престојот во Ужице го искористив да присутните, преку посебна панел дискусија но и неформална комуникација , ги запознам со актуелната стрип сцена во Македонија . Се разбира дека акцент се даде и на долгогодишната работа на Стрип центарот на Македонија и делување во интерес на македонските автори, стрип групации и воопшто целокупната наша стрип сцена. На крај организирав стрип изложба од домашни автори , учесници на последниот Интернационален стрип салон во Велес, како најзначајна стрип манифестација(фестивал ) во светот на 9та уметност во Македонија.
Беа изложени дела на македонски цртачи од понова генерација : Славица Купенкова, Ангела Петрушевска, Евгенија Трајковска, Матеа Аризановска, Вилма Дамњановска,Елена Апостоловска, Влера Чиче, Катерина Тери Николовска (сите од Скопје) ,потоа Методија Андоновски и Анастасија Недељковска од Куманово, Оливер Цветковски од Велес и на крај Теодора Христова и Михаела Васкоска од Битола. Како сценаристи на некои од делата беа застапени Ване Трајков од Велес и Александар Стеванов од Штип.
Од другите гости на овој фестивал, повеќето реномирани стрип артисти од регионот, се слушнаа доста комплименти за талентот на изложените стрип автори, и изразена подготвеност за развивање на идна меѓународна стрип соработка ..“-нагласи Трајков
Култура
Концерти на „Macedonian Free Society“ и „Поетроника“ на последната фестивалска вечер од „Крај Вардарот Џез“
Утревечер, 27 април е третата и последна фестивалска вечер од „Крај Вардарот Џез“.
Во Едукативниот културен центар Лабораториум со почеток во 21 часот со концертен настап ќе се претстават „Macedonian Free Society“. Потребата за нов-креативен, (о)слободен, инспиративен, а во исто време предизвикувачи израз, како соработка помеѓу извонредни автори и инструменталисти, кои ја исцртуваат новата историја на македонската џез и современа музика е токму поводот за креирање на еден ваков мега состав.
Иновацијата во креирањето на музичко дело и изведба на поединечни музички преокупации и изразни форми на секој од членовите вткаени во предизвикувачка и квалитетна целина е резултатот на овој современ ансамбл. Неговите членови поединечно, или како дел од нивните матични состави нижат признанија и награди во домашен и меѓународен контекст, и тоа: Филип Букршлиев, Дени Омерагиќ и Нинослав Спировски, Владан Дробицки, Васко Бојаџиски, Гоце Наумов, Глигор Кондовски и Благојче Томевски. Месецов за ПМГ Џез, како 46 издание, излезе и првиот албум на „Macedonian Free Society“.
Веднаш потоа во 22 часот на истата локација, концерт на „Поетроника“. Еден од највозбудливите музички проекти во земјава, кој поставува нова парадигма во начинот на изведба на современа македонска поезија во форма на поетско-музички перформанс и во симбиоза со авторска електронска музика, изведена во живо. Заслужни за тоа се двајца врвни современи уметници, Оливер Митковски, еден до најголемите домашни актери, кој во изведбата го носи читачкиот (поетски, интерпретативен) дел и Андреја Ристески – Салпе, талентиран автор и продуцент, еден од водечките современи македонски електронски артисти, задолжен за музиката. Неочекувана, но благодарна комбинација, која дава силно модерен и динамичен поглед врз македонскиот поетски пишан збор.
Музиката на Андреја Салпе е квалитетна современа електронска продукција, со традиционални и џез одеци, која волшебно пронижена со искусниот вокал на Митковски фрла ново светло на познати и не толку познати стихови од нашето минато и сегашност од автори како: Ацо Караманов, Гого Ивановски, Игор Исаковски, па се до Горан Петрески, Владимир Лукаш, Оливера Ќорвезироска и Ѓоко Здравески. Квалитетот на изведбата во „Поетроника“ ги елевира песните на ново, неочекувано, неописливо атрактивно ниво и ги прави податни за ново толкување, приближувајќи ги до нова, млада публика.
Култура
Марко Бањоли во Чифте амам
На 23 април во 19 часот во Националната галерија на Македонија – Чифте амам, Скопје ќе се отвори мултимедијалната изложбата „Тркало на времето“ на истакнатиот италијански уметник Марко Бањоли.
„Со оваа изложба ја објавуваме одлуката на Советот на Остен „Земја во фокус“ на Остен Биеналето Скопје 2024 да биде Италија“, велат од Остен.
Изложбата е организирана во соработка со Зеринтија, Асоцијација за современа уметност, а со поддршка на Италијанска амбасада во Скопје и Италијанскиот културен институт во Белград.