Култура
Изложба на графики од Графичката работилница Дрезден во Прилеп

Во среда, 22 декември, во 19 часот во Ликовната галерија на Центарот за култура „Марко Цепенков“, ќе биде отворена изложба на графики од Графичката работилница од Дрезден, на којашто ќе бидат претставени 21 графика од 15 уметници, работени во бакрорез, сува игла, офсет техник
Техничките можности на графиката при спроведувањето на уметничките замисли играат посебна улога и честопати во играта меѓу печатарите и уметниците настануваат специфични изразни форми, кои не можат да произлезат на друг начин. Односот со алатките и трагите од употребените материјали исто така оставаат забележливи траги на графичкиот лист.На иницијатива на дрезденските уметници Вернер Витиг и Клаус Вајденсдорфер во 1958 г. беше основана една работилница, чија цел беше самостојно создавање на уметничка графика. Од средината на 60-тите години раководството со работилницата го преземаат професионални печатари. До ден денес тие гарантираат не само висок квалитет во најразлични постапки на печатење туку и ги упатуваат уметниците како самите да печатат. Во 1990 г. компетенциите за Графичката работилница ги презема градот и со преселбата на „Техничките збирки“ во сутеренот на градот Дрезден во 1996 г. се создаваат оптимални услови за работа. Графичката работилница се сместува на три различни места во Дрезден и се развива во меѓународно признат центар за графика. Во 2008 г. работилницата го прославува своето 50-годишно постоење.Во текот на годините и во променливи политички услови, повеќе од 600 уметници во Графичката работилница најдоа едно живо место каде можат да се повлечат, а кое им овозможува заедничка уметничка продукција и размена на искуствата меѓу колегите. Со дијалогот меѓу уметниците и печатарите се истражуваат техничките и содржинските можности на графиката и се работи на нејзино понатамошно експериментално развивање. Одделот за култура на градот Дрезден со програмите за размена кои редовно се организираат меѓу Дрезден и неговите збратимени градови, како и пошироко, не го унапредува само развојот на уметниците кои учествуваат, туку и квалитетот на графичките техники. Понудата е голема: од висок печат (дрворез, линорез, рачно редење) до длабок печат (бакрорез, сува игла, бакропис, акватинта, мецотинта, мека превлака) до рамен печат (литографија, алграфија, офсет) – широка палета на оргинални графички техники.Изборот на дела што се наоѓа пред вас сепак претставува само еден дел од избраните графички техники и нивните уметнички можности.Ќе бидат изложени делата на Еберхард Хавелкост, Елке Демрих, Хајке Вадевиц, Карла Векесер, Андреа Јоки, Удо Хауфе, Гудрун Трендафилов, Клаус Дрекслер, Улрих Ајзенфелд, Бербел Кунтше, Забине Гумниц, Мехтхилд Манзел, Макс Улих, Алмут-Софија Цилонка, Ангела Хампел, Конрад Хенкер, Катарина Кречмер и Леоноре Адлер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Објавен првиот том на Правописно-нормативниот речник на македонскиот стандарден јазик

Во издание на „Бата прес“ објавен е првиот том на Правописно-нормативниот речник на македонскиот стандарден јазик, на кој автори и редактори се осум универзитетски професори. Објавувањето на речникот е поддржано од Министерството за култура како проект од национален интерес за 2024 година.
Својата прва промоција речникот ќе ја има на годинешниот Саем на книгата во арената „Борис Трајковски“, на штандот на издавачот, во вторник, во 11.30 часот. Речникот ќе го претстават рецензентката проф. д-р Весна Костовска и авторката редактор проф. д-р Елизабета Бандиловска.
Во првиот том се поместени зборовите од буквата А до буквата Ж, а авторите (универзитетските професори) и соработниците постојано работаат, така што во наредните изданија ќе бидат обработени зборовите до буквата Ш, и правописно-нормативниот речник како плод на повеќегодишен труд ќе биде комплетиран.
Овој капитален лексикографски зафат се надоврзува на повеќето изданија од овој вид, почнувајќи првиот македонски правописен прирачник Македонски правопис со правописен речник од Блаже Конески и Крум Тошев (1950) до Правопис на македонскиот јазик во издание на Институтот за македонски јазик „Крсте Мисирков“ и издавачката куќа „Култура“ (2015 и 2017 година).
Автори и редактори на изданието се: Лидија Аризанковска, Елизабета Бандиловска, Снежана Велковска, Виолета Јанушева, Елена Јованова-Грујовска, Искра Пановска-Димкова, Симон Саздов, Људмил Спасов.
Соработници на проектот се Марија Антевска, Филип Белчев и Македонка Додевска.
Култура
Изложба ,,Менче Спировска – Визуелна фасцинација со Загреб“ во Загреб

Во македонскиот КИЦ во Загреб во рамките на програмата по повод 145-годишнината од постоењето на Музејот на уметности и занаети – Загреб, на 13-ти мај ќе биде отворена изложбата ,,Менче Спировска – Визуелна фасцинација со Загреб“ на една од најзначајните македонски графичарки, Менча Спировска. На изложбата ќе бидат претставени речиси непознати дела за хрватската јавност создадени во 1950-тите години во Загреб.
Изложбата се реализира како заеднички проект на загребскиот Музеј на уметностите и занаетите и македонскиот Културно-информативен центар во Загреб по повод 145-годишнината од основањето на загребскиот Музеј за уметности и занаети. Директорката на македонскиот Културно-информативен во Загреб, Мими Ѓоргоска Илиевска, ги потврди заложбите на директорот на Музејот за уметности и занаети, Сањин Михелиќ дека со оваа изложба се промовираат вредностите на меѓународната соработка и културните врски меѓу Хрватска и Македонија, кој потенцираше дека во годината кога ја одбележуваат 145-годишнината од постоењето на Музејот ќе следи уште една исклучителна изложба на фотографии од студиото на семејството Арсовски во соработка со македонскиот Културно-информативен центар во Загреб и Музејот на Град Скопје.
Изложбата насловена ,,Менче Спировска – Визуелна фасцинација со Загреб“ за првпат го претставува комплетниот уметнички опус на Менче Спировска создаден за време на нејзиното студирање во Загреб, кој што се чува во фондовите на Музејот на уметности и занаети. Централно место на изложбата е нејзиното до сега неизложено дело од областа на графичкиот дизајн, „Концептуален дизајн за рекламна туристичка брошура на Загреб“, кое сега за првпат ќе биде изложено во целост, создадено за време на нејзините студии на поранешната истакната Академија за применети уметности во Загреб, којашто оставила значаен траг во развојот на уметноста, дизајнот и визуелната култура во Хрватска.
Изложбата го прикажува и придонесот на македонските студенти на загрепската уметничка сцена во 1950-тите, а Менче Спировска зазема посебно место како посредник на културните и естетските вредности на двете земји.
Култура
Ретроспективна изложба на Анета Светиева во Даутпашиниот амам

Националната галерија го најавува претставувањето на творештвото на Анета Светиева. Изложбата ќе биде поставена во Даут пашиниот амам до крајот на месец август, а официјалното отворање ќе биде на 21 мај 2025 (среда), во 20 часот.
Ретроспективната изложба на Анета Светиева е дел од програмата на Националната галерија за сеопфатно презентирање на македонските современи уметници кои ја креираа нашата ликовна сцена. Проектот ја следи монографијата за Светиева издадена 2023 година, со што се заокружува долгогодишното следење и истражување на богатиот творечки опус на еден од најзначајните македонски скулптори.
Сложеното, комплексно, иновативно и креативното творештво на Анета Светиева, го поставува нејзиното дело на самиот врв не само на македонската ликовна сцена, туку и на една пиширока платформа која ги преминува границите на регионот.
Во почетокот на седумдесеттите , поинаквите видувања не само на формата, на појавниот облик, туку и на некои суштински прашања во однос кон делото, беа причина критиката да ги дефинира скулптурите на Анета Светиева (веќе во нејзините првични настапи) како дела со јасен концептуален и изведувачки проседе, вон од тогашните вообичаени јазички модели. Тие блескави мигови вон од општите стилски движења и веќе контурирани шеми, создаде еден индивидуален пробив во скулпторската материја. Нејзиниот самостоен пластички исказ кој се наметна со силината на автентичноста надвор од главните актуелни текови, го иницира внатрешното битие на делото, неговата вибрација што реагира на живиот дух на времето како знак на современоста. Внатрешните диктати се генерирани од изворите на нејзиниот интерес за етносот, фолклорот и печената земја како исконските артефаки, како прилози на делување на еманципираниот човечки дух. Нејзиното творештво е во темелен дијалог со етнолошката ризница и обичаите на Балканот и пошироко, врз кои што ги гради сопствените митолошки пејзажи и ги воскрснува колективните митови до степен на универзалното. Во нејзините форми, материјализираната идеја се наметнува со убедливо сведоштво за густо, слоевито преплетување на уметноста на сегашниот миг и оние слоеви кои можат да се разбудат во секој творец. Тој спој е кај Анета реализиран и нагласен и во него е содржан и одговорот на круцијалното прашање за потеклото и слоевитото значење на нејзиното дело. Во каталогот за изложбата во Белград, 1984, Анета кажува : “Моите размислувања, некој флуид …и порано, веке во првите чекори, беа насочени кон овој свет на митот како автохтоност, автентичност, како мој идентитет искажан со синтагми, со секвенци од разновидните области и начини на сфаќањето на животот на мојот народ, на мојата почва и поднебје. Се е поврзано на некој начин.”