Култура
Декоративната пластика на османлиските споменици во Македонија
Изложбата „Декоративна пластика од исламските сакрални споменици“ од синоќа е поставена во Музејот на Македонија
Станува збор за изложба на фотографии на кои се презентирани триесетина скулптурални елементи од повеќе сакрални исламски објекти во Скопје, Битола, Куманово, Тетово и Прилеп. Објектите се изградени во 15 и 16 век. „Изложбата опфаќа дел од богатото и разновидно културно богатство во Македонија со акцент на градителското наследство врзано со исламската религија. Заради посебното примање на Бог и светот, без ликовни претстави и персонификација на видливиот свет, апстракцијата доминира како визуелно средство и придонесува за едно специфично творештво кое, зависно од материјалот што се употребува, најчесто е во релјефна форма“, рече во воведот на отворањето на изложбата Мери Аницин Пејоска, директорка на Музеј на Македонија.Османлиските освојувања на балканските земји се одвивале во време кога Османлиското царство го достигнало својот подем, а неговата уметност ја доживувала својата најголема зрелост и процут. Најзначајните објекти од исламската архитектура изградени во Република Македонија содржат и влијанија од Византиската и Ориенталната архитектура, како и уметнички и градителски традиции на локалното население, кои доаѓаат до израз преку учеството на домашните мајстори.На отворањето на изложбата м-р Зоран Павлов, раководител на сектор во Управата за заштита на културното наследство, го објасни значењето на поставката.„Изложбата е значајна бидејќи на едноставен начин доближува еден елемент од нашето културно наследство којшто досега не бил доволно третиран. Декоративната пластика, која ја обработуваат авторите, е елемент којшто беше запоставуван и при обработката на архитектурата во целина, меѓутоа со оваа изложба преку каменот и мермерот авторите успеваат да ни го доловат богатството на орнаменти, на арабеската, на флоралните и геометриските мотиви“ – нагласи Зоран Павлов.Автори на концептот за изложбата се Борче Топуковски и Татјана Канчевска Смичковска, кустоси-историчари на уметност во Одделот за уметност при Музеј на Македонија. Подготовката на изложбата „Декоративна пластика од исламските сакрални споменици“ траела шест месеци. Проектот е финансиран од Министерство за култура со Програмата за 2010 г.Како гостин на отворањето на изложбата, со изведба на една нумера на инструментот неј, настапи Абази Ахија, претставник од Исламската верска заедница, која помогна во реализацијата на проектот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.
Култура
Изложба: „Четирите мајстори на модернизмот“
Град Скопје и ЈУ Културно Информативен Центар ќе отпочнат со реализација на Европскиот проект CreArt 3, со активноста „Европски месец на креативноста“ на 10 мај во галеријата Империјал 1 – ЈУ Културно Информативен Центар, каде што до крајот на месец мај ќе биде отворена групната изложба насловена: „Четирите мајстори на модернизмот“
Учесници: Теодора Андоноска, Мартин Буровски, Илина Василеска, Сергеј Јордановски, Камелија Каламерникова, Манели Крстиќ, Сара Милошевска, Ивона Петрова и Никола Тренов, сите студенти од четврта година на студиската програма Сликарство на Факултетот за ликовни уметности, Универзитет „Св. Кирил и Методиј“ – Скопје, во класата на проф. Слободанка Стевческа.
Изложбата „Четирите мајстори на модернизмот“ е воспоставена во чест на основоположниците на Факултетот за ликовни уметности од Катедрата за сликарство, професорите Петар Мазев, Родољуб Анастасов, Димитар Кондовски и Душан Перчинков.
Изложбата ќе биде отворена до 20.04.2024 година.