Култура
Распишан конкурсот за драмски текст за наградата „Коле Чашуле“

Македонскиот народен театар, следејќи ја стратегијата за поттикнување и за промовирање на македонското драмско и театарско творештво, распиша конкурс за доделување на награда за драмски текст „Коле Чашуле“ за 2011 година. Наградите подразбираат соодветен паричен износ, а МНТ ќе го постави првонаградениот драмски текст во рок од две години по завршување на конкурсот. „Сакаме да поттикнеме и промовираме нови драмски автори за нови драмски дела. Конкурсот ќе трае 60-на дена, а жири-комисијата е во состав Братислав Димитров, драматургот на МНТ кој е и претседател на жири комисијата, Јелена Лужина и Венко Андоновски. Ќе имаме публикација на првите три наградени драми која својата промоција ќе ја доживеат на почетокот на фестивалот „Војдан Чернодрински“. Книгата ќе биде издадена и на англиски јазик“ изјави директорот на МНТ, Дејан Лилиќ„Англиското издание се планира да биде промовирано во театрите и фестивалите кои се партнери на МНТ. Планирани се десетина промоции во странство каде сакаме МНТ да стане репрезент на современата драма. „Вејка на ветрот“ е првиот македонски модерен драмски текст напишана од Коле Чашуле, па оттука и наградата го носи ова име. Овој текст цврсто е врзан за историјата на МНТ. “, изјави уметничкиот директор на МНТ, Дејан Пројковски. „На конкурсот може да се јави пиеса која има добра приказна и добри ликови, но не е добро напишана. Во следната фаза треба да се вклучи или самиот автор на таа пиеса или да се земат некои драматурзи кои ќе работат на финализирање на драмскиот текст. Добро е некои искуства кои се проверени во светот да ги примениме, бидејќи и пиесата има своја технологија на создавање.“ изјави драматургот Братислав Димитров. Она што исто така се очекува да се случува во МНТ во април е дебатата насловена „Македонски народен театар како културален феномен“ на која се поканети да учествуваат околу 20 културолози, естетичари, театролози.„Од оваа дебата се планира да произлезе зборник кој ќе биде појдовна точка во согледување на изработката на новата стратегија за МНТ. Се планира и влегувањето во новата зграда што би претставувало сериозна културна и естетска трансформација на МНТ,“ истакна Пројковски. крај/сж
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
„Јон Вардар против Галаксијата“ овој викенд на Grossmann Fantastic Film & Wine Festival во Словенија

Првиот македонски долгометражен анимиран филм „Јон Вардар против Галаксијата“ во сценарио и режија на Гоце Цветановски ќе биде прикажан на 21. издание на Фестивалот за Фантастични филмови и вино во Љутомер, Словенија. Проекцијата е закажана за сабота, 5 јули во Домот на културата.
Интересно е што фестивалот, покрај внимателно селектираната програма од жанровски филмови, има и посебен фокус на виното. Посетителите ќе имаат можност да дегустираат различни вина за време на фестивалските настани, создавајќи уникатно искуство кое ги спојува филмот и винската култура.
„Овој фестивал за мене има посебно значење, затоа што во 2016 година гостував со краток анимиран филм и тогаш ја имав честа да се запознаам со Јан Харлан, продуцентот на Стенли Кјубрик – еден од моите омилени режисери, чие влијание може да се забележи во повеќе сцени од ‘Јон Вардар’“, изјави режисерот Гоце Цветановски.
Култура
Марко Виденовиќ и „Мевлем“ вечерва на „Бит-фест“

Битолското културно лето „Бит фест“, вечерва во Офицерскиот дом во Битола со почеток во 21:00 часот, ќе биде домаќин на прекрасна вечер во која музиката низ Проектот „Мевлем“ ќе зборува за љубовта, болката и надежта…
Проектот „Мевлем“, претставува уникатен спој на авторска музика и поезија од композиторот и поет Марко Виденовиќ, кој наиде на извонреден прием и сериозен одек меѓу публиката и културната јавност, како во земјава така и надвор од неа.
Со секој од досега реализираните концерти, „Мевлем“ не само што ја потврдува својата уметничка автентичност, туку и се етаблира како проект со исклучителен емотивен и социјален капацитет. Неговата досегашна реализација покажа дека публиката, без оглед на културниот контекст, препознава искреност, длабочина и убавина.
Музичкиот состав „Мевлем“ е составен од музичарите: Памела Велкова – виолина, Верица Ајтовска – виола, Енис Аљи – виолончело, и самиот автор Марко Виденовиќ – пијано и глас, кои досега концерти одржале во: Загреб, Белград, Скопје, Битола, Охрид, Гевгелија и Велес.
Во вечерашната програма се вбројуваат композиции кои се специјално создадени за проектот „Мевлем“ и претставуваат иновативен пристап кон камерната музика и современата поезија.
„Мевлем“ е повеќе од концерт – тој е уметничка исповед, место каде поетскиот збор не се чита туку се чувствува, каде што музиката не се слуша туку се доживува. Создаден од композиторот и поет Марко Виденовиќ, овој проект е интимен дијалог помеѓу музиката и зборот, меѓу солистите и тишината, меѓу публиката и нејзините најдлабоки емоции.
Композициите, инспирирани од лична и колективна болка, љубов, надеж и тишина, се изведуваат од музичари кои со секој тон ја раскажуваат таа внатрешна вистина. Влијанието што овој проект го има врз публиката е од оние ретки, длабоки уметнички впечатоци што долго остануваат со човекот.
„Мевлем“ во својата суштина има потреба – да се понуди лековитост преку уметноста, да се овозможи допир со нешто исконско, нешто што ги надминува жанровите и формите.
„Целта никогаш не беше само да се приреди концерт, туку да се отвори простор за уметнички дијалог, за разбирање и заедништво. Резултатите од тоа не се само мерливи преку број на публика, аплаузи или медиумски интерес – туку преку тишината меѓу две композиции, преку солзите по последниот акорд, преку луѓето што приоѓаат по концертот не за да честитаат, туку за да споделат своја приказна. А токму тоа, всушност, беше и крајната цел“, вели Марко Виденовиќ, автор на Проектот „Мевлем“, кој вечерва ќе биде претставен пред публиката во Битола.
Култура
Концертна промоција на албумот „Егрерор“ на „ФИН проект“ и Тања Царовска

Концертната промоција на албумот „Егрерор“ на Никола Стојковски (ФИН Проект) и Тања Царовска ќе се одржи денеска со почеток во 20:30 часот во Куршумли ан.
На концертот, како гости ќе настапат и Петар Христов (саксофон и кларинет) и Горан Трајкоски – Готра, на пијано Билјана Петровска, бас и контрабас Андреа Мирческа, како и Илија Јовчев – виолина, Ева Ристеска – виолина, Ангела Винтовска – виола, Александар Ицковски – виолончело.
Албумот „FIN Project Orchestra“ е издаден во декември 2022 година од М-Сол Рекорд и е поддржан од Министерството за култура на Р.С. Македонија. Следуваше „FIN Project – Contemplation“ кој е издаден во јануари 2024 година.
Музичкиот материјал на албумот е подготвен во соработка со кларинетистот Петар Христов. А, како последно издание во 2024 година, FIN Project во соработка со светски реномираниот композитор и продуцент на извонредната Лиза Жерар, Марсело Ди Франсиши, го објави „Indie Monastery – One Big World (remixes)“ каде како вокален интерпретатор се појавува иранската дива Бахар Шах.