Култура
Од сабота Бит Фест
На шестото издание на „Бит Фест“, кое почнува во сабота (25 јуни) и ќе трае до 27 август ќе продефилираат стотина уметници кои ќе бидат дел од досега најбројните настани, преку 120
На шестото издание на „Бит Фест“, кое почнува во сабота (25 јуни) и ќе трае до 27 август ќе продефилираат стотина уметници кои ќе бидат дел од досега најбројните настани, преку 120, и тоа од сите области на уметноста и културата вклучувајќи театарски претстави, концерти од областа на класичната музика и оперски концерти, фолклорни концерти, етно, џез и рок концерти, ликовни и графички изложби, современи уметности, поетски вечери,саеми на книга и други мултумедијални проекти.„Бит Фест“ и оваа година останува под мотото на отворено културно лето кое промовира реномирани уметници и независна културна сцена и ќе биде домаќин на гости од Франција, Белгија, Италија, Велика Британија, Русија, Словачка, Полска, Бугарија, Турција, Хрватска како и бројни учесници од Македонија.Специфичноста на „Бит Фест“, а воедно и со тоа и неговата препознатливост, ја дава токму моментот што во негов состав се организираат десетина фестивали од сите културни и уметнички сфери со што се излегува во пресрет пред се на независната и алтернативна уметничка сцена. Така, битолското културно лето во јули и август ќе ги реализира Фестивалот на музика и традиција „Локум Фест“, Фестивалот за современи уметности „Акто“, „Илинденски денови“, Поетскиот фестивал „Поетски синтези“, Фестивалот на асоцијацијата „615“, Младинскиот Арт фестивал „Битола отворен град“ и „Шут фест“.Целта на „Бит Фест“ е да се даде можност на најразновидна и алтернативна културна сцена и истата да се приближи до сите генерации, но и да се привлечат љубителите на културата од соседните земји и пошироко, што пак се покажа како реалност на изминатите фестивалски изданија. Токму затоа речиси сите настани во организација на „Бит Фетс“ остануваат бесплатни, а организаторите се надеваат дека преку уметноста ќе придонесат за развој на културниот туризам во Македонија.Културното лето се реализира со целосна подршка и учество на Центарот за Култура Битола, Заводот и Музеј на град Битола, Универзитетската библиотека „Св. Климент Охридски“ и Битолскиот Театар, а покровител на културното лето и овојпат е градоначалникот на општина Битола, Владимир Талевски.Свеченото отварање на „Бит Фест“ е на 25 јуни, сабота, со почеток во 21 часот во античкиот театар Хераклеја со настап на гудачкиот камерен оркестар АРКО и изведба на филмска музика „Плачот на виолината“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Македонскиот филм „Неми филмови“ меѓу најдобрите анимирани кратки дела за 2025 според „Animation Magazine“
Kраткометражен анимиран филм „Неми Филмови“ на режисерот Крсте Господиновски е вклучен во изборот на Animation Magazine за најистакнати анимирани кратки филмови во 2025 година.
Во текстот „Избор на познавачот: Субјективен критички преглед на најдобрите кратки анимирани филмови за 2025 година“, авторот Крис Робинсон – долгогодишен уметнички директор на Меѓународниот фестивал за анимиран филм во Отава – го наведува филмот како едно од најзначајните остварувања во годишниот преглед.
Робинсон го оценува „Неми Филмови“ како дело што се издвојува по визуелниот јазик, атмосферата и авторскиот пристап, особено преку неговата stop-motion естетика и внимателно развиена визуелна нарација. Како влијателна фигура во светот на независната анимација, неговата препорака се смета за важен сигнал за квалитет и релевантност на филмот.
Култура
Сорентино и филмот „Југо Флорида“ со Андрија Кузмановиќ на репертоарот на „Синедејс“
Денес, на претпоследниот ден од 24 издание на фестивалот Синедејс, во киното Фросина, со почеток од 20 часот ќе биде прикажан филмот “Помилување” во режија на славниот италијански режисер Паоло Сорентино. Филмот “Помилување” ја имаше својата светска премиера на 82 издание на Венецискиот филмски фестивал, со што се отвори и 82-та Мостра. Токму на овој фестивал, актерот Тони Сервиљо ја доби наградата “Волпи” за најдобар актер, а филмот беше номиниран за “Златен Лав”.
На истата локација, во 22.30 часот ќе биде прикажан филмот “Југо Флорида” во режија на Владимир Тагиќ, каде главната улога ја остварува популарниот српски актер Андрија Кузмановиќ. За ова остварување, актерот ја добива наградата “Срце на Сараево” за најдобра улога на Сараевскиот филмски фестивал во 2025 година.
Од останатите филмови на вечерашниот репертоар на фестивалот, во Денснг салата на МКЦ следи и краткиот филм “Зајак” во режија на Ханис Багашов кој се здоби со наградата Најдобар филм на фестивалот на краток филм Дримшорт во Струга и “Еден од оние денови кога Хеме умира” во режија на Мурат Фиратоглу. Во Кинотеката, ќе биде прикажан филмот “За Ева” краткиот филм во режија на Бојан Василев и “Вена” во режија на Кјара Флајшхакер.
Билети за фестивалот може да се набават на официјалната страница www.cinedays.mk.
Култура
Комичното оперско ремек-дело „Севилскиот бербер“ на 13 декември на сцената на Националната опера и балет
На 13 декември 2025 година, со почеток во 20.00 часот, на сцената на Националната опера и балет ќе се изведе комичното оперско ремек-дело „Севилскиот бербер“ од Џоакино Росини – опера која со својата духовитост, динамика и незаборавни арии со децении ја плени домашната и светската публика.
Изведбата е под диригентската палка на Џанлука Мартиненги (Италија), режијата е на Урсула Хорнер (Австрија), сценографијата на Марија Ветероска, а костимографијата на Марија Пупучевска. Концерт-мајстор е Јане Бакевски, а хор-мајстор Ѓурѓица Дашиќ.

Во солистичката екипа ќе настапат: Роберто де Кандиа (Италија), Николина Јаневска, Чанг Ванг (Кина), Владимир Саздовски, Јанoш Носек (Полска), Злата Тошевска Димовска, Драган Ампов, Кристијан Антовски, Никола Чедомировски, чембало: Анастасија Грговска заедно со хорот и оркестарот на МОБ.

„Севилскиот бербер“ е едно од најпрепознатливите дела на Росини – автор кој со својата музичка виртуозност и карактеристични брзи, ритмични фрази создава неповторлива енергија на сцената. Блеска со брзи дијалози, духовитост и незаборавни музички моменти, меѓу кои се истакнува славната арија „Largo al factotum“, со која Фигаро повеќе од два века го освојува светот. Делото ја раскажува љубовната приказна полна со неочекувани пресврти, тајни планови и духовити недоразбирања, претставени во препознатливиот Росиниев стил – брз, жив и раскошен.

