Култура
Гламурознo отвoрање на киното Синеплекс – Џејмс Бонд докажа дека е бесмртен
Со премиери на филмовите „Небесен пад“ , односно новото продолжение на филмот за британскиот таен агент Џејмс Бонд и филмот „Животот на Пи“ вечерва беше отворено новото Синеплекс кино во Скопје во Скопје сити мол.
Актери, политичари, бизнисмени, новинари и многу познати лица од македонската елита дојдоа на отворањето на киното за да ги проследат премиерите на овие филмови, минувајќи на црвениот тепих, исто како што се проследуваат светските филмски премиери.
Официјалното отворање на киното го означија актерите Сашко Коцев и Јелена Јованова и посакаа кината низ Македонија во иднина да бидат отворани со македонски филм.
Британскиот агент со коден број 007 не ги остави рамнодушни посетителите на премиерата на овој филм во Македонија.
Новото продолжение на Бонд ја прикажува војната на агент со агент или како што се вели во филмот „војната меѓу сенките“. И во овој филм Бонд докажува дека може и знае да преживее и тогаш кога сите мислат дека е мртов.
Иако со својата „смрт“ може да ја напушти службата на лесен начин, тој сепак одлучува да се врати и да им приреди прекрасно филмско доживување на гледачите.
Дво и полчасовниот филм не дозволува да ви биде досадно во ниту еден момент, исполнет e со акција, хумор и убави жени.
Во улогата на Бонд се појавува актерот Даниел Крег, а негов соперник кој Бонд треба да го уништи го глуми актерот Хавиер Барден.
Со отварањето на новото кино во Скопје, граѓаните ќе имаат можност да ги следат сите европски премиери во истиот момент кога се гледаат во Европа.
„Визијата е да направиме навика кај луѓето да почнат да живеат поевропски да почнат да посетуваат повеќе настани, да следат светски блокбастери и да не бидат ништо подолу од луѓето во Европа“ вели Игор Станковиќ, сопственик на MCF Films и генерален директор на Cineplexx Macedonia.
Киното има девет сали со современа 3Д опрема, а цените на картите ќе се движат од 120 до 160 денари, додека цените за 3Д проекциите ќе бидат 180 денари. Менаџерите најавуваат попусти на картите, фамилијарни пакети, пакети за деца./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Гоце Цветановски со специјална награда во Белград за придонес во филмската уметност и индустрија
Македонскиот режисер и сценарист Гоце Цветановски доби специјална награда за придонес во филмската уметност и индустрија на 19. издание на Српскиот фестивал за фантастични филмови, еден од најзначајните регионални фестивали посветени на жанровскиот и авторскиот филм.
Свеченото отворање на фестивалот се одржа во Културниот Центар во Белград, во присуство на бројни филмски автори, професионалци и љубители на фантастичниот филм. На настанот присуствуваше и директорот на македонскиот Културно-информативен центар во Белград, Васко Шутаров.
Наградата на Цветановски му беше врачена по проекцијата на оскаровецот „Поплава“, по што следеше панел-дискусија на тема иднината на анимираниот филм во регионот. На панелот, покрај Цветановски, учествуваа и истакнатите автори Растко и Ивана Чириќ, Никола Мајдак и Алекса Гајиќ, кои разговараа за предизвиците, новите технологии и можностите за регионална соработка во современата анимација.
При примањето на наградата, Цветановски се наврати на своите почетоци и емотивната врска со фестивалот:
„Мојата прва награда во кариерата ја добив токму на овој фестивал, за краткиот игран филм ‘Мал дисконтинуитет во време-просторот’ во 2014 година. Затоа ова признание за мене носи особена емоционална и професионална вредност.“
Наградата доаѓа како признание за долгогодишната авторска работа на Цветановски и неговиот придонес во современиот филм, со посебен акцент на фантастичниот и анимираниот жанр.
Култура
Во Центарот за култура „Трајко Прокопиев“ втора меѓународна изложба на уметничка фотографија „Мотус 2025“
Здружението за промоција на интелектуални, мултикултурни и спортски вредности – Мотус од Куманово, преку својот Фото клуб – Мотус, во период од 18 декември (четврток) 2025 во просториите на Центар за култура „Трајко Прокопиев“ во Куманово, ќе ја организира втората Меѓународна изложба на уметничка фотографија Мотус 2025.
На изложбата ќе бидат изложени пеесетина фотографии. Учество зедоа 249 автори од 50 земји.

Финансиер на изложбата е Општина Куманово, преку програмата за подршка на културни манифестации за 2025 година, а истата е под патронат на Меѓународната Федрација на Фотографска Уметност (ФИАП 2025/393), (Фото Сојуз на Македонија (ФСМ 2025/003) и Меѓународна Фото Асоцијација Дунав (ДИПА 2025/054).
Изложбата ќе биде отворена на 18 (четврток) декември 2025 во 19:30 часот во просториите на Центар за култура „Трајко Прокопиев“ во Куманово.
Култура
„Интер(но)фејс“ на Борис Шемов во „Мала станица“
На 18 декември 2025 година, со почеток во 20.00 часот, во Мултимедијалниот центар „Мала станица“, во рамките на програмските активности на Националната галерија, ќе биде отворена изложбата „Интер(но)фејс“ на уметникот Борис Шемов, курирана од д-р Ана Франговска.
„Интер(но)фејс“ е мултимедијален проект кој се фокусира на односот меѓу човекот и вештачката интелигенција, на улогата на јазикот како визуелно, идеолошко и комуникациско средство, како и на пост-интернет естетиката како нова културна реалност. Преку различни медиумски форми – текстуални интервенции, видео-содржини, алгоритамски и дигитални процеси – изложбата отвора прашања за моќта, контролата, технологијата и трансформацијата на субјектот во современиот дигитален контекст.
Насловот „Интер(но)фејс“ упатува на двојната природа на интерфејсот – како техничка површина на комуникација меѓу човекот и машината, но и како внатрешен, идеолошки простор во кој се преговараат значењата, одлуките и позициите на моќ. Изложбата го третира интерфејсот не само како функционален медиум, туку како критичка зона на судир меѓу човечкото искуство и алгоритамската логика.
Проектот се надоврзува на актуелните уметнички и теориски дискурси за постхуманизмот, визуелната култура и дигиталната медијација на реалноста. Во таа рамка, „Интер(но)фејс“ ја поставува вештачката интелигенција не како неутрален технолошки алат, туку како активен фактор во креирањето на современите културни, политички и етички релации.
Изложбата „Интер(но)фејс“ може да се посети во периодот од 18 до 24 декември 2025 година во Мултимедијалниот центар „Мала станица“, Национална галерија, Скопје.

