До крајот на истражувањата не ќе биде можно точно да се утврди кој е закопан под тумбата Каста крај древниот град Амфиполис, недалеку од Солун, но не може да се исклучи ниедна од верзиите, дури и онаа дека таму се наоѓа гробницата на славниот војсководец Александар Македонски, изјави раководителката на истражувањата на споменатиот археолошки локалитет Катерина Перистери, претставувајќи ги во саботата во грчкото министерство за култура резултатите од ископувањата во периодот 2012 до 2014 година.

Откривањето на големата гробница кај Амфиполис се смета за најголемото археолошко откритие последните децении. Комплексот со дијаметар од 158,4 метри, опкружен со мермерен ѕид во должина од 497 метри, е украсен со мозаици, каријатиди и неговиот влез го чуваат две сфинги. Истражувањата започнаа во 2012 година, но од август 2014 година откако стана јасно дека станува збор за последното почивалиште на некоја важна личност од периодот и најверојатно од непосредното опкружување на најпрославениот цар на древните Македонци, грчката јавноста секојдневно е информирана за откритијата.

Во текот на ископувањата и откритијата, во саботата зборуваа Перистери, археологот Михалис Лефантзис и инженерот Димитрис Енлгезос, кој го претставуваше техничкиот аспект на работите на наоѓалиштето.

Дискусијата, којашто предизвика огромен интерес поради што биле преполнета салата за состаноци на министерството за култура, траеше цели четири ипол часа, иако првично не биле претпоставени толку прашања за археолозите.

Сепак, според оцената на медиумите, Перистери даде главно општи одговори и претпазливо ги избегнуваше конкретни податоци кои би можеле да доведат барем до некаква главна верзија, што би можело да предизвика бурни реакции од колегите.

„Вие знаете дека најтешко од се’ е самиот почеток. Овие истражувања ќе ни дадат увид во она што сите го очекуваме“, изјави Перистери.

Минатата сабота грчкиот министер за култура Костас Тасулас изјави дека во најголемата древна гробница откриена кога и да е на територијата на денешна Грција, се откриени прикази од секојдневниот живот се откриени на колонади. Прецизираше дека во текот на чистењето на столбовите, откриени се прикази на луѓе, предмети и садови, откако во август годинава археолозите влегоа во овој голем тумул со опсег од 500 метри.

Тие слики би можеле да помогнат во утврдувањето на идентитетот на таинствениот покојник кој е погребан во оваа гробница, а чии останки беа пронајдени на почетокот од ноември. Коските на покојникот се испратени на анализа која првично треба да го утврди неговиот пол и возраста, додаде Тасулас.

Кон половината на ноември, светските медиуми посветија големо внимание на откритијата во таинствената гробница од времето на Александар Македонски, чиешто откритие пред неколку месеци ги предизвика шпекулирањата дека станува збор за почивалиштето на славниот владетел.

Според нив, пронајдените останки се на црвенокос маж, кој според археолозите, сигурно бил славен воен командант. Раскошната градба на некрополата упатува на заклучокот дека станува збор за славна личност која уживала голем углед во заедницата, бидејќи градењето морало да чини толку многу, што не можел да го финансира секој.

Првичните анализи на коските откриени минатата седмица во подземната крипта покажуваат дека станува збор за маж со средна височина, светол тен и црвеникава коса, што остава можност дека се во прашање можеби останки на голем војсководец. Според историските записи, Александар Македонски имал сини очи и црвеникаво-златеста коса. Археолозите во изјавите за медиумите велат дека од досегашните ископувања покажуваат дека едно е сигурно – оти покојникот бил многу важен војсководец.

Натамошните ископување ќе треба да покажат дали лицето чии останки се пронајдени во гробницата во Амфиполис потекнува од Тракија којашто опфаќа и дел од денешната североисточна територија на грчката држава, а тестот на ДНК може да покаже дека бил член на кралско семејство, бидејќи ќе биде споредена со ДНК-та од коските на таткото на Александар, Филип Втори Македонски. Тие анализи ќе траат осум месеци и резултатите не се извесни поради лошата состојба на коските на Филип Втори.

Во гробницата во Амфиполис, стотина километри од Солун, која датира од IV век пред Христа, се пронајдени симболи од Александар Македонски и досега е најголемата од тој период. Телото било положено во ковчег кој низ вековите се распаднал. Коските биле пронајдени во и надвор од гробот сместен во најдлабоката комора од гробницата. Наоколу биле расфрлани и разни украсни предмети од тој период. Покрај коските во криптата биле пронајдени и остатоци од примитивни завртки кои го зацврстувале дрвениот ковчег, како и стаклените делови украсите од ковчегот.

Гробницата во Амфиполис ги подгреа страстите на тамошната јавност дека станува збор за почивалиштето на Александар Македонски или некој член на неговото семејство. Според преданието, Александар Македонски умрел во Вавилон, денешен Ирак, 323 година пред Христа, но не е утврдено каде е погребан. Грчкото министерство за култура ја отфрли пред извесно време таквата можност, но убедува дека нема сомнение оти станува збор за гробница на некој влијателен, како што наведува – Македонец.

Некои од светските научници, пак, сметаат дека во гробницата може да се погребан еден од најблиски луѓе на Александар – Неарх, кој ги водел неговите војски назад од Индија во денешен Ирак, а бил роден според преданијата во Амгиполис.

Точната локација на гробот на Александар е една од најголемите мистерии на светската археологија. Некои сметаат дека најверојатно е погребан во Александрија. Неговата жена Роксана и синот Александар по неговата смрт биле протерани во Амфиполис и таму убиени заедно со неговата мајка и братот, велат преданијата, што според некои грчки археолози укажува на тоа дека во споменатата гробница се наоѓаат нивните останки.

Коските откриени во Амфиполис се испратени на анализа. Телото било положено во ковчег кој низ вековите се распаднал. Коските биле пронајдени во и надвор од гробот сместен во најдлабоката комора од гробницата. Наоколу биле расфрлани и разни украсни предмети од тој период.

Ископувањата во ова место, стотина километри од Солун, започнаа во 2012 година, а две години подоцна грчките археолози објавија дека утврдиле оти станува збор за голем комплекс кого го чуваат две безглави сфинги со височина од 1,5 метар и е обиколена со 500-метарски мермерен ѕид.

Од почетокот на ископувањата во гробницата се пронајдени и две мермерни каријатиди. Тие го потпирале внатрешниот влез во гробницата и се во истата скулпторска техника како и сфингите пронајдени на главниот влез. Двете имаат испружени раце во симболичен гест да го одбутнат оној кој би се обидел да ја сквернави гробницата, толкуваат археолозите. Во внатрешноста е откриен мозаик, кој го прикажува грабнувањето на Персефона, ќерката на Зевс.

Ископувањето на наоѓалиштето грчките медиуми го следеа дури и со секојдневни телевизиски извештаи. Археолозите продолжуваат да го истражуваат ридот на кој е откриена гробницата, бидејќи веруваат дека таму се наоѓаат и други тајни и можни гробници./крај/мф/сн

Извор: Макфакс