Во вторник на 22-ри ноември, во романската престолнина Букурешт ќе биде промовира збирката песни „Да не ми е сон“ на македонскиот писател Зоран Пејковски. Оваа поетска книга од печат излезе годинава во издание на „Дијалог“ од Скопје.

 
Станува збор за поетска книга која е вреднувана од романската книжевна критика и издавачките на Романија како највисоко поетско достигнување во 2016 година во земјите од Балканот и југоисточна Европа, што претставува уште една силна експресија да биде претставен македонскиот јазик надвор од границите на Македонија, преку која всушност се претставува македонската култура и литература во странските држави како белег на успешната приказна водена од Министерството за култура, македонските уметници и писатели да бидат присутни надвор од државата.

Богатиот поетски јазик, милозвучната лирика, неологизмите, совршенството на љубовта и ред други убавини ја разубавуваат поетската книга на Зоран Пејковски, а сите тие возвишени нитки придонесоа македонскиот јазик да се слушне и претстави во Романија во оваа земја со богата култура и традиционални вредности во кои еден период биле присутни и Рајко Жинзифов, Крсте Петков Мисирков и други македонски преродбеници.

Тој совршен спој на моќната македонска поезија, големина од еден од најплодните автори во Македонија, Зоран Пејковски, ги продолжи патиштата на претходниците Македонци кои биле во Романија и создавале. Токму и затоа „Да не ми е сон“, или како што на романски звучи „Sa nu – mi fie vis“, отвори уште едно големо поглавје на македонската литература во Европски и светски рамки. А присутноста на Пејковски, го говори токму тоа.

Инаку, поетската книга на романски јазик е препеана од Дина Чувата, а издавач на оваа импозантна, оригинална и високо етаблирана поезија е издавачката куќа на Ф. М. Чиочеа од Романија.

Што се однесува, пак, до Зоран Пејковски, тој е магистер по драматургија, и докторант на Институтот за македонска литература при Универзитетот „Свети Кирил и Методиј“ од Скопје и единствениот натуралист во македонската литература, а покрај тоа што тој е драмски писател и драматург, тој е и поет, прозаист, преведувач и публицист, но и почесен амбасадор на мирот, титула која им се доделува на забележани книжевни и уметнички имиња како нивен придонес за човештвото во Европа и светот. Всушност со оваа титула само се докажува дека Пејковски, не само што е европски поет, туку и светски, затоа што организацијата што му ја додели амбасадорската титула го забележала неговиот силен и богат книжевен израз, неговиот придонес.

Инаку, Зоран Пејковски автор е на повеќе книжевни и драмските дела, и тоа: „Атомско време“, „Тесно небо“, „Последниот чин на комедијата на смртта“, „Реликвија на светлината“, „Облак во пантолони“ (препев), „Relic of the light“, „Филозофија на смртта“, „Љубов на вересија“, „Театарот е ритам и стил“, „За животот, љубовта и смртта“, „Театарот е фабрика за соништа“, „Сон“, „Сега знам“, „Сите наши кодоши“, „Самуилово распетие“, „Херувимите на Самуиловата круна“, „Градот на јужното море“, „Со љубов кон Свети Климент Охридски“, „Да не ми е сон“, „Златна прашина“, „Избор драми – трагедии“, „Мали детски разговори“, „Апостолска чудотворност“ и ред други.

Од 1995 година е член на Друштвото на писатели на Македонија, потоа, член на Собранискиот одбор на Друштвото на писатели на Македонија, па претседател на Друштвото на писатели „Битолски книжевен круг“ од Битола. Пејковски е и член на Македонското научно друштво од Битола, и член на Управниот одбор на Македонското научно друштво, потоа тој е и главен и одговорен уредник на регионалниот информативен неделник „Јавност“, а е главен и одговорен уредник на списанието за книжевност, уметност и култура „Раст“, кое излегува во рамките на Друштвото на писатели „Битолски книжевен круг“ од Битола. Зоран Пејковски, е преведуван и препејуван на повеќе странски јазици: англиски, француски, српски, словенечки, хрватски, босански, руски, бугарски, грчки, албански, португалски, шпански, романски, полски, влашки, итн.

За својот книжевен и публицистички опус има добиено повеќе награди и признанија, меѓу кои: „За серија информации во популаризација на книгата“ на Културно просветната заедница на Македонија во 1992 година; наградата „Празник на липите“ во 2012 година, која ја доделува Друштвото на писателите на Македонија, на истоимената Меѓународна книжевна манифестација; наградата „Медијала“ на „Македонија презент“ за збирката песни „Сега знам“ во 2014 година, потоа наградата „4-ти Ноември“ на Општината Битола за книжевност и литература за 2014 година, за збирката песни „Сега знам“ и за драмскиот текст „Сите наши кодоши“, па следи наградата „Јован Котевски“ во 2016 година за збирката песни „Златна прашина“, потоа наградата „ЕРГО СУМ“ во 2016 година за популаризација и афирмација на театарскиот израз, итн./крај/мф/аш