Филм
Фестивалите се заштитници на филмската уметност
Фестивалите се заштитници на филмската уметност и нудат специфична и разновидна програма која што не може да се види секој ден во кино-салите.
Ова е заклучокот од работилницата што се одржа во петок, 5ти декември, во Кинотека на Македонија, во рамки на 4. Меѓународен фестивал за анимиран филм „Анимакс Скопје Фест“, на тема „Филмските фестивали-поттик и потреба“.
На работилницата говореше, Дорис Бауер од Австрија, која е член на жирито на „Анимакс Скопје Фест“ и има децениско искуство во областа на филмските фестивали и меѓу другото е ко-основач на австрискиот филмски фестивалски форум.
Според неа, во последните години на европско ниво, филмските фестивали растат, а кино-салите изумираат. Се продуцираат многу филмовии и фондовите издвојуваат средства за филмови, вели таа, но никој не мисли на публиката и како филмот да биде виден и прикажан од што поголема публика.
Бауер вели дека денес кино-салите „продаваат“ начин на живот со продажбата на пуканки и кока кола, а не влезници за филмовите што ги прикажуваат.
Токму поради тоа, заклучи Бауер, филмските фестивали се неизоставен и многу важен дел од филмската индустрија. Филмовите што добиваат награди на домашни фестивали гостуваат надвор од земјата и така се промовираат и стануваат познати.
Исто така, фестивалите нудат разноликост. Според Бауер, кината нудат ограничен репертоар, и тоа најчесто се холивудски блокбастери, додека на фестивалите има одбрана и специфична програма на филмови кои што не може да се видат во кино. Како пример таа ги наведе фестивалите за кратки филмови, за документарни филмови, и токму фестивалите како „Анимакс Скопје Фест“.
Еден од заклучоците на работилницата беше и тоа дека фестивалите имаат многу важна може да се рече функција за покажување на разновидноста и богатството на филмската уметност.
Освен тоа тие нудат можност за дискусија и дебата на публиката и филмските професионалци. Едноставно, рече гостинката од Австрија, тие ги поврзуваатлуѓето.
„Со новите технологии сега може да гледате филм на вашите мобилни телефони и таблети, но тоа не е уметност“.
Бауер на крајот рече дека до сега има одлични импресии од „Анимакс Скопје Фест“ и дека е многу задоволна од програмата што била прикажана на вчерашното отворање. Имало микс од уметност, но и од комична содржина, што наишло на одличен прием на публиката во Кинотека. Се надева дека и следните два дена, 5-ти и 6-ти, ќе биде прикажана одлична програма.
Бауер е главен куратор на меѓународната програма за фикција и документаристика при VIS Vienna Independent Shorts, портпаролка на австрискиот филмски фестивалски форум, филмски куратор и ко-директор на филмскиот фестивал за краток филм Еспресофилм. Студирала политички науки при Универзитетот во Виена. Од 2006 година таа е генерален директор на независната продавница за изнајмување ДВД, ФилмГалерија 8½, во Виена. Во 2008 година, таа станува ко-основач на годишниот фестивал на краток филм Еспресофилм кој нуди отворени филмски проекции во 8та област на Виена, и ја обавува оваа функција до денес. Во 2012 година станува ко-основач на австрискиот филмски фестивалски форум.крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Светска премиера на „Киука – Пред летото да заврши“ во Кан – филмот е копродукција помеѓу Грција и Македонија
„Киука – Пред летото да заврши“ (Kyuka Before Summer’s End) во режија и по сценарио на Костис Харамуданис, кој е реализиран како билатерална копродукција помеѓу Грција и Северна Македонија и е поддржан од Агецијата за филм на Република Северна Македонија, својата светска премиера ќе ја има на Канскиот филмски фестивал како дел од 32. издание на програмата ACID, што ќе се одржи од 15 до 24 мај оваа година. На „Куика“ му е доверена честа да ја отвори оваа програма.
„Лист продукција“ е македонски копродуцент на дебитантскиот филм на режисерот Харамуданис со Марија Димитрова и Игор Иванов како копродуценти, а Херетик од Грција е главен продуцент со Данае Спатхара, Јоргос Карнавас и Константинос Контовракиси како продуценти.
„Киука – Пред летото да заврши“ е приказна за едно трочлено семејство, кое како и секое лето, плови со својата едрилица до островот Порос, каде што таткото Бабис и децата Константинос и Елса, кои се веќе на прагот пред полнолетството, го минуваат годишниот одмор. Додека пливаат, се сончаат и создаваат нови пријателства на островот, децата случајно ја запознаваат Ана, жената што ги родила и ги напуштила уште во најраното детство, со што ќе почне едно горко-слатко патешествие на созревање под летното сонце, а долгогодишната огорченост на Бабис избива на површина.
Програмата на ACID (Association for the Distribution of Independent Cinema – Асоцијација за дистрибуција на независен филм) на Канскиот филмски фестивал е креирана во 1993 година и прикажува 9 долгометражни филма, фикција и документарци. Овие филмови се избираат од стотиците пристигнати филмови од цел свет од страна на петнаесетина филмаџии, членови на асоцијацијата.
Снимањето на филмот се одвиваше во октомври 2022 година во Атина и на островот Порос, а постпродукцијата се работеше на релација Атина – Скопје.
Главните улоги во филмот ги играат Симеон Цакирис, Елса Лекаку, Константинос Георгопулос, Афродита Капокаки и Елена Топалиду.
Македонската екипа во овој филм ја сочинуваат Михаил Димитров, Игор Поповски и студиата за постподукција „Аудио хаус“ и „Слобода филм“.
Филм
Утре се отвора четвртиот Фестивал на грчки филм
Утре, на 7 април 2024 година, во 20 часот, во Кинотеката на Северна Македонија (Никола Русински 1, Скопје 1000) ќе биде отворено четвртото издание на Фестивалот на грчки филм. На отворањето ќе биде прикажан кусометражниот филм „Тишината на рибата кога умира“ на Василис Кекатос (2019, 19′), а потоа долгометражниот филм „Не би сакал да сум непристоен, но треба сериозно да разговараме“ на Јоргос Георгопулос (2019, 99′).
Ова се две црни комедии во кои што идејата за смртта се прикажува со доза на хумор. Филмот „Тишината на рибата кога умира“ учествуваше на некои од најважните фестивали како Sundance, а Василис Кекатос е еден од најважните претставници на кусометражните филмови со многу награди, вклучително и Златна палма во Кан.
Фестивалот е во ко-организација на Амбасадата на Грција во Скопје и Меѓународниот филмски фестивал Киненова спонзориран од фирмите Armos Balkan и Mermeren.
Влезот е бесплатен.
Култура
Во февруари 50-годишен јубилеј на Кинотека: Старите вредности во нови контексти
Пред 5 децении е формирана македонската кинотека. Честитки за сето она што досега го направила оваа значајна културна установа. Една од основните дејности на филмскава институција е да го прикаже сето она што го има, и ново и старо; ова второто во нови контексти и изданија. Тоа ќе биде карактеристика на програмата на најкусиот месев во годината – февруари. Календарски, ќе трае 29 дена. Ете можност да се види сето она што кинотеката го подготвила за февруарските денови.
Ќе се стартува со премиерна проекција. Со филм кој има наслов СЛОБОДА. Тоа е краткометражен филм во омнибус формат, чијшто автор е филмскиот критичар Златко Ѓелески. Веднаш потоа враќање децении наназад. Ќе бидат проектирани неколку архивски филмски записи од 1912 до 1952. Тоа се дел од новопримените кино-материјали што кинотеката ги прибра во текот на изминатата година.
Кинотека се решила, враќајќи се децении наназад, да потсети на филмовите создадени во 40-тите, 50-тите, 60-тите, 80-тите, 90-тите и 2000-тите. Режисерите се од различни земји – Италија, Франција, Германија, Шведска, САД. Ставени се во различни контексти, во нови програми. Всушност, станува збор за циклуси на Великаните на фестивалот на филмската камера БРАЌА МАНАКИ и пократок цилкус филмови на францускиот режисер на т.н. француски нов бран Луј Мал.
Во исклучително богатата кинотечна понуда се и неколку филмови на чехословачкиот режисер, оскаровецот Јан Кадар.
Она што е многу интересно, многу потребно за да се знае и запамети, се петте документарни македонски филмови со етнолошка содржина. Во нив е забележана традицијата, обработени се народни и религиозни обичаи од средината на 20-тиот век. Во четири од нив Вера Кличкова, пионерот на етнолошкиот филм кај нас, е сценарист, режисер или консултант.
Филмофилите ќе бидат почестени да го видат сигурно еден од најозборуваните лански филмови – НАПОЛЕОН на Ридли Скот. Во различните оценки за филмот доминираат, што е сосема разбирливо, Англичаните и Французите. Едните го фалат, другите го кудат. Критиките за најновата продукција на Скот се поделени, но не смее да се изостави фактот дека, и покрај одредени пропусти, станува збор за прецизно сработен биопик. Дело кое функционира на неколку нивоа – како биографска сторија, историска рекреација, но и омаж кон еден од омилените филмови на Ридли Скот – Бари Линдон од 1975, по сценарио и режија на Стенли Кјубрик.
Уште една филмска творба којашто предизвика интерес и претежно позитивни рецензии – УБИЈЦИ НА ЦВЕТНАТА МЕСЕЧИНА на Мартин Скорсезе– ќе биде проектирана во кино салата на Кинотека месецов.
Во финалето на месецов, ќе погледнеме два филма со музичка содржина. Познатиот ТОМИ, рок операта на Кен Расел, ќе биде прикажана на оригинална 35 милиметарска лента. Новитетот е музичкиот документарец за екс ју панк легендите Панкрти. Специјален гостин на кинотеката тие денови ќе биде фронтменот на групата, Перо Ловшин.
Февруари е можеби календарски пократок месец , но затоа ќе биде исполнет со исклучително богата кино-програма.