Турците ги познава подобро отколку што тие се познаваат самите себе. Видео снимката од нејзиниот говор на една конференција во кој таа преку турскиот чај сликовито им ја претстави Турција и нејзините луѓе на светот преку приказната за турскиот чај, минатата година доживеа рекорден број на споделувања на социјалните мрежи.

Американската писателка и истражувач  Кетрин Бренинг е вљубеник во Турција, на почетокот на минатата година го привлече вниманието на јавноста со својата збирка есеи  „Уште еден чај ве молам“. 

Таа деновиве повторно беше во Турција за промоција на својата најнова книга „Махпери султана“ („Месечева принцеза“), историски роман во кој Бренинг  ја опишува  Анадолија од 13 век, во периодот на владеењето на Селџуците. Љубовната приказна на оваа селџучка принцеза, сопруга на султанот Алаедин Кејкубат е проткаена со нејзината смела борба  против интригите на царскиот двор, политичките измами, изневерувања  и борбата за власт.  Зошто токму Селџуците? На ова прашање Кетрин Бренинг одговара: „ Затоа што сите ги знаат Османлиите. Милиони туристи го посетуваат сарајот Топкапи, серијата за султанот Сулејман Величествениот е популарна, но регионот на Анадолија, Конја, Кајсери и Токат е еден сосема различен амбиент, различна атмосфера, тоа е земјата на Селџуците.  

Дали нејзиниот повторен претстој во Истанбул и промоцијата на најновиот роман во една од босфорските конаци е случајност? Според писателката тоа е нејзина судбина. Таа веќе 30 години како историчар на уметноста и модерен патописец  истражува во Турција и го има посетено секое нејзино катче. „Во животот сѐ минува но три работи се трајни вели Бренинг: историското наследство, убавината на уметноста и моќта на жената. Затоа решив да го напишам овој роман.“  

Принцезата Махпери била сопруга на селџучкиот султан, била многу моќна жена, прво била христијанка, а потоа го примила исламот. Изградила седум карвансараја и 13 век, периодот кога таа живеела, бил најблескавиот период на Селџуците. Поголемиот дел од карактерите во романот се реални, но некои се имагинарни. „Сакав да покажам како една моќна жена како што била принцезата Махпери успеала да обедини две религии и да создаде еден убав и мирен живот на оваа почва.“ 

Најновото дело на американската писателка е резултата на нејзиното долгогодишно истражување на селџучката историја и уметност на овие простори. Таа самата е вљубеник во оваа уметност и ја оценува како една од најмоќните во историјата на уметноста. 

Кетрин Бренинг живее во Њујорк, но нејзина втора татковина е Турција. Нејзините први сознанија за оваа земја ги добила читајќи ги познатите писма на Лејди Монтегју, британската благородничка и сопруга на англискиот амбасадор во тогашната Османлиска Империја, која била една од ретките западни сведоци на животот на Турција од 18 век. Нејзините писма до своите пријатели содржат живописни описи за разни аспекти од животот на Османлиите во тој период. 

„Кога првпат ги прочитав имав 20 години и бев восхитена, Лејди Монтегју оставила  драгоцени записи и свои сведочења за тогашното време и никогаш не употребила никаква критика“, објаснува Бренинг.  „Решив да напишам книга во која ќе се допишував со Лејди Монтегју  во која ќе ѝ  пишував за моите искуства во оваа земја и за тоа што сѐ променило од нејзиното патување и престој од пред неколку века“. 

На нашето прашање дали и таа се чувствува како лејди Монтeгју додека ги пишува своите дела, таа вели дека додека Монтегју ги запишувала своите впечатоци и им ги пренесувала на своите пријатели,  таа самата има и една  едноставна мисија, а тоа е да ги зближува различните култури. 

Кетрин Бренинг е експерт за исламска уметност и од 1978 г. има направено безброј истражувања во Турција од полето на архитектурата и декоративните уметности. Држи предавања од областа на мултикултурата и била уредник на разни публикации за селџучката уметност како и била куратор на изложби.  Уредник е на публикацијата „Големото селџучко наследство“ објавено минатата година под покровителство на  тогашниот претседател на Република Турција Абдулах Ѓул. Во 2012 г. е прогласена за почесен граѓанин на турскиот град Ризе.крај/аак