Во книгата „Дипломатија и Феминизам”  на младата авторка, магистер по дипломатија и родови студии Нела Ташковска, е објаснета традиционалната структура и  идеологија врз која се заснова светската надворешна политика, почнувајќи од техниките на влијателниот американски дипломат Хенри Кисинџер кој се смета за татко на оваа наука, па сé до трансформацијата на дипломатијата како мировно средство, нејзината промоција пред македонската јавност се одржа во неделата во просториите на фондацијата „Никола Кљусев“  во присуство на почесни гости и соговорници на настанот беа Лилјана Поповска, Претседател на Комисијата на еднакви можности на мажите и жените во Собранието на Република Македонија и Даниела Димитриевска, извршен директор на Македонското женско лоби.

Ташковска првпат својата книга ја има издадено во САД за Проквест УМИ (каде има добиено прва награда за инвентивен метод на истражување). Книжевниот труд претставува научно истражувачки проект низ кој се анализира сферата на дипломатијата од родово-сензитивна перспектива и нуди нов пристап и стратегии за применување на политичката медијација.

Оваа книга дава одговор на прашањето зошто сеуште светската дипломатија не е наклонета кон поголемо присуство на жени амбасадори и кои се причините за сеуште малиот број на жени лидери на светските тркалезни маси. Овој проект дава и детална анализа на политичките одлуки и долгогодишната кариера на една од најзначајните женски фигури во меѓународната дипломатија,поранешниот американскиот државен секретар Хилари Клинтон.

„Од особена важност е да и дадеме поддршка на младата авторка пред која претстои голема кариера. Ташковска анализира една деликатна но премногу значајна тема. Јас се гордеам што една ваква млада дама тргнала по патот на феминизмот и ја имам можноста да кажам дека ја чувствувам како мој соборец. Еднаквоста на половите е темел на една демократска држава и имплементација на демократските процеси. Македонија е меѓу најдобрите земји во развој на еднаквост, во самиот врв во Европа, по бројот на вклученост на жените во политиката. Книгата посочува дека жените можат еднакво како мажите да се справат со сите предизвици и дека е потребно да се креира баланс помеѓу жените и мажите во политиката и дипломатијата“, изјави Поповска на промоцијата.

Според Димитриевска, оваа книга нуди новитет и оригиналност во начинот на истражувањето. Напишана е со висок стил на изразување и претставува високо квалитетен научен труд кој досега не е презентиран во Република Македонија, во оваа област.

„Во моментов во Македонија има само пет жени амбасадорки, што е мал број. Овој број на жени во дипломатијата е средна бројка, која сметаме дека може да се зголеми за што и ние во македонското женско лоби се залагаме. Дипломатијата е едно навистина значајно поле за Република Македонија и како што цитира авторката во својата книга е завиено во една сомотска ракавица и има своја посебна структура. Инсистираме, жените да се вклучат во дипломатијата и политиката, само заради тоа што жените имаат различни размислувања и искуства, кои може да се пренесат во секојдневното работење и да презентираат еден нов начин на работење“, рече Димитриевска.

Ташковска, пак, говореше за почетоците на книгата и за тимот на експерти во надворешната политика од Розевелт Универзитетот кој што учествувале во истражувањето и дале придонес за овој труд.

„Македонија е сé уште млада демократија која што се развива прогресивно и во позитивна насока, и затоа овој проект е доста релевантен за нашата земја, бидејќи во истражувањето постојат споредбени факти и статистички податоци за земјите во Европа и САД од кои што Македонија може да земе пример. A јас би сакала да се залагам и да дадам придонес во овие области во својата земја и да го имплементирам знаењето кое што го стекнав на универзитетите во САД“, појасни Ташковска.

Нела Ташковска, родена 1988 година во Скопје, е дипломиран политиколог на престижниот Американски универзитет Пурдју и магистар по дипломатија и родови студии на Розевелт Универзитетот во Чикаго. Ташковска има богато интернационално резиме работејќи како асистент во одделот за странски јазици и литература на Пурдју Универзитетот, а потоа и во Советот за надворешна политика на Чикаго, во секторот за организација на политички настани со високи претставници од Американската влада како Ал Гор и Хилари Клинтон. Ташковска имала можност да работи и во предизборната кампања на актуелниот Американски претседател Барак Обама. Во 2012 година, ја добила престижната награда Чарлс Дејвид за социјална работа од Асоцијацијата за Економски Развој во Чикаго./крај/мф/сн

Извор: Макфакс