Национална установа – Универзитетска библиотека „Гоце Делчев“ – Штип во понеделник вечер беше домаќин промоција на книгата „Тајните на Исарот“ од Звонко Белдедовски.

Станува збор за постхумно дело на еден од најпознатите штипски истражувачи и арехолози, долгогодишен вработен во Заводот и музеј Штип, кој сиот свој живот меѓу другото, го посвети и на Исарот. Како што кажа и Милена Ристова-Михајловска, директор на НУ-УБ „Гоце Делчев“, промоцијата на ова дело е од голема важност за градот, бидејќи останува патоказ за понатамошни истражувања на штипското кале. Белдедовски е заслужен за многу откритија кога е во прашање Исарот, а тие се содржани хронолошки како податоци во ова постхумно дело кое го издава неговото семејство, но исто така и по многу други важни арехолошки откритија за Македонија вклучително и теракотните икони во Виничко:„Од исцрпувачката работа во античката Баргала, старословенските материјални арехолошки наоди, откривањето на виничките теракоти, 50 статии и трудови издадени од 1977 до 2010, до „Тајните на Исарот„, сите заедно, тоа се моќните високи стожери што ја вознесуваат душата на човекот и археологот професионалец, сопругот, таткото и милиот дедо Звонко Белдедовски кон вечното паметење“, кажа промоторот на книгата, Виктор Лилчиќ, директор на Управата за заштита на културно наследство.„Тивок, скромен, неуморен… Не треба могу да се каже за да се опише неговата душа… Толку вреден и трпелив, а толку таинствен и мирољубив со домашните. За работата со нас, ретко зборуваше. Тој Исар беше цел негов свет што како деноноќно да го носеше на плеќи, а во домот со нас, молчешкум си ги запишуваше впечатоците и пронајдоците. Само едно знаеше и сакаше – да ја објави КНИГАТА. Со тие зборови замина… со КНИГАТА… а таа остана неотпечатена…“, кажа во воведниот монолог актерот Страшко Милошевски, претставувајќи го животниот пат на Белдедовски.Градоначалникот на Штип, Илчо Захариев кој присуствуваше на промоцијата кажа дека Исарот е митско место кое од секогаш привлекувал внимание:„Оваа книга е само потврда на нашите заложби Исарот да го приближиме до Македонија и светот, и драго ми е што промоцијата се случува во предвечериоето на „Четрсе“ кое е духовно богатство на Македонија прогалсено од Унеско, а книгата е посветена токму на тајните на Исарот“, рече Захариев.Според Захариев, промовирањето на пешачката патека зад Исарот, како проект на локалната самоуправа, овозможи штипјани да видат дел од истражувањата и резултатите на Белдедовски, а тоа е тунелот.„Нашата цел е да ја заокружиме неговата мисија. Најмалку што можеме да направиме за него во овие моменти на негово физичко отсуство е да ги објавиме интегрално материјалите од неговите истражувања кои што се основа за книгата што му остана недопишана. Ви благодарам за убавите зборови за мојот татко , се надевам дека оваа дело ќе ги постави основите за издавање на една монографија“, изјави Душан Белдедовски, син на починатиот истражувач Звонко.Инаку, Звонко Белдедовски бил роден 1948 година  во Берово каде завршил основно и средно образование  а во 1974 година  дипломирал на Филозофскиот факултет, група археологија во Белград. Беше вработен во Н.У. Заводот за заштита на спомениците на културата и Музеј – Штип во 1974 година. Бил учесник е на бројни национални и меѓународни симпозиуми од областа на археологијата и член на МАНД  (Mакедонско Археолошко Научно Друштво). Работеше на местото советник кустос археолог, раководител на античкото и средновековно одделение. Своите истражувања ги преточувал во соодветни записи уште од 1977 кога пишувал за Исарот во Штип како средновековна населба. Почина во 2011 година а неговата пасија за Исарот, постхумно е преточена во новата книга „Тајните на Исарот“ во 2016 година од неговото најблиско семејство. На промоцијата зборуваше и Весела Честоева, дирктор на Археолошкиот музеј во Скопје која промовираше уште три други наслови кои се објавени преку проектот на Владата на Р.М за објавување на познати преводи на книги а кои се од областа на археологијата. /крај/со/др