Култура
Промоција на бестселерот „Убиство во хотел Босфор“
 
																								
												
												
											Организацискиот тим на Фестивалот на европската книжевност „BookStar“ го најавува гостувањето на турско-германската писателка Есмахан Ајкол, на која ќе ѝ биде доделена наградата „BookStar“ за најчитана книга помеѓу две изданија на Фестивалот.
Во понеделник, со почеток во 20 часот, во Јавна соба ќе биде промовиран нејзиниот роман „Убиство во хотел Босфор“, издание на „Антолог“, кој на македонски јазик го приопшти Тулај Сејфула. Романот е најчитаниот наслов во Книжевниот центар „Антолог“ за 2016 година, а е објавен со поддршка на програмата „ТЕДА“ на Министерството за култура и туризам на Република Турција. Промотор на романот ќе биде писателот и универзитетски професор Владимир Мартиновски. Наградата „BookStar“ е слатко изненадување на вечерта, по што следува журка со настап на „ОК бенд“, млад бенд со богато искуство на улични свирки и јавни настапи. „Убиство во хотел Босфор“ е првиот од серијата крими-трилери со ликот на Кати Хиршел, потпишани од Есмахан Ајкол. Кати се доселила во Истанбул од Германија и отворила своја книжарница, во која се продаваат исклучиво детективски романи. Наскоро во блискиот хотел се случува убиство во кое е вклучена и нејзина пријателка. Така што, истрагата станува нејзин интерес. Ова е книга што со својата разноликост и мистериозност ќе ве заведе и ќе ви се лизне низ рацете, без да почувствувате кога одлетале страниците. Есмахан Ајкол е родена во Едрене во 1970 година, во семејство на емигранти од мешано потекло. Татко ѝ е роден во Македонија, а баба ѝ е Бугарка. Двајцата родители ѝ се правници. Посетувала британско училиште во Истанбул, со германскиот како втор јазик. Дипломирала право во Истанбул, а продолжила со постдипломски правни студии на Хумболтовиот универзитет во Берлин, каде што магистрирала на тема дискриминации и разлики меѓу турското и германското разводно право. За време на студиите, пишувала новинарски текстови од социјални теми. Веднаш по дипломирањето отворила свој паб, но наскоро го затворила. Потоа се преселила во Берлин со сопругот и почнала да пишува криминалистички романи на турски јазик. Нејзината прва книга, „Убиство во хотел Босфор“, е објавена во 2001 година. Веднаш станала бестселер, по што објавила уште три дела од серијата со Кати Хиршел: „Бакшиш“ (2003), „Сомнителна смрт“ (2007) и „Танго Истанбул“ (2012). Нејзините книги се преведени на осум јазици. Ајкол живее и работи во Берлин и во Истанбул. Има германско државјанство Читателите ќе имаат поголема можност да ја запознаат лично оваа авторка одблиску и следниот ден, на 1 ноември, во Книжевниот центар „Антолог“, во периодот од 11 до 12 часот, кога ќе се одржи Книжевното кафе на кое таа ќе потпишува книги и со кафе и колачиња ќе поразговара со својата публика во Македонија. Истиот ден почнува и Филмската програма, и тоа со проекцијата на филмот „Авр“ (Le Havre) на Аки Каурисмаки. Проекцијата е во Јавна соба од 14 часот, а модератор е Ѓорѓи Пулевски. /крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
 
																	
																															Култура
Виенски валцери и нем филм во КИЦ: мултимедијална вечер со Пламенка Трајковска посветена на Јохан Штраус
 
														Гудачкиот квартет Пламенка Трајковска на 5 ноември во Културно-информативниот центар – Скопје ќе направи уникатен спој на класична музика и нем филм во чест на „кралот на валцерот“
Уникатниот, мултимедијален концерт, насловен како „Јохан Штраус во филмот: Концерт и проекција на немиот филм ‘Веселата војна’“ претставува редок спој со кој гудачкиот квартет ќе ја изведува музиката на Јохан Штраус во живо, додека на платното ќе се проектира нем филм на режисерот Роберт Вине. Филмот, инспириран од виенската култура, нуди визуелно и музичко патување низ духот на европската култура од крајот на 19 век.
Публиката ќе има можност да доживее едно несекојдневно уметничко искуство во кое валцерот, некогашниот белег на европската култура, повторно ќе заживее преку звук, слика и емоција.

Концертот е замислен како омаж на двојното наследство на Штраус – како симбол на музичката елеганција и како инспирација на кинематографијата. Поводот е одбележувањето на 200-годишнината од раѓањето на славниот виенски композитор и 30 години камерно музичко творештво на виолинистката Пламенка Трајковска.
Концертот е во рамките на фестивалот фестивалот „Есенски музички свечености“.
На концертот ќе настапи гудачкиот квартет во состав: Пламенка Трајковска – виолина, Сандра Крстевска – виолина, Љубица Бошкоска – виола и Александра Јаневска – виолончело.
Култура
Концерт на ансамблот „Македониум“ во КИЦ Белград
 
														Вечерва во 19 часот, КИЦ Белрад ќе биде домаќин и организатор на концерт на музичкиот ансамбл „Македониум“ од Белград, со наслов „На срце ми лежи, мила мамо“. И самиот наслов асоцира дека на вечерашнава програма ќе се најдат грст изворни и новосоздадени македонски песни, со кои ансамблот веќе повеќе од 10 години стекнува симпатии како меѓу публиката од македонската заедница во Србија, така и меѓу српската публика, каде и да настапува.
Концертот кој се организира во партнерство со Здружението на Македонците во Белград „Македониум“, ќе го отвори директорот на КИЦ Белград Васко Шутаров, а овој концерт е поддржан од Министерството за култура и туризам.
Ансамблот „Македониум“ е основан во 2015 година, со цел да бидат сочувани, негувани и популаризирани старите македонски изворни песни, да се сочуваат и почитуваат старите обичаи, како и да се афирмираат песните од современото македонско музичко творештво.
Ансамблот има настапувано скоро на сите поголеми манифестации во рамките на македонската заедница во Србија, како што се „Деновите на македонска култура“ во Нови Сад, централните македонски прослави поврзани со нашите големи празници, како што традиционалните празнувања на Илинден во Јабука и Качарево, а ансамблот бил и претставник на Македонскиот национален совет во рамките на Саемот на националните малцинства во Белград, како и претставник на меѓународниот фестивал „Експлорес“.
Култура
„Фрида од Македонија“ со концерт на „Есенските музички свечености“
 
														В недела со почеток во 20 часот во Музејот на македонската борба за самостојност ќе се одржи концерт на женскиот хор „Фрида од Македонија“ насловен „Фрида Музикотерапија“, во рамки на 25. издание на „Есенски музички свечености“.
Аматерски женски хор ФРИДА е формиран во октомври 2023 година. Основач, раководител и диригент на хорот е Сузана Турунџиева – вокален солист и музички педагог. Хорот функционира во 2 секции/групи составени од по 60тина хористки аматери, со големо хорско искуство.
Билетите се во продажба на karti.com.mk.


 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											 
														 
																											