Култура
Скопје стана дел од клубот на културни и креативни градови
Скопје од неодамна се придружи кон исклучително селективниот клуб на културни и креативни градови, коишто имаат статус на привилегирани партнери на Белгискиот град Монс – Европски град на културата за 2015 година.
Овој Белгиски град од околу 100.000 жители во јужниот дел на Белгија, не е само извонреден со своето културно богатство (особено со 4-те локалитети регистрирани на листата на Светското културно наследство на УНЕСКО), туку тој е исто така, исклучително динамичен центар на креативни и технолошки индустрии.
Затоа, е многу природно што оваа Европска културна престолнина одлучи да се претстави себеси во текот на 2015 година како место каде што “културата се сретнува со технологијата”.
Еден од водечките проекти на Монс 2015 ќе биде креирањето и анимацијата на мрежата “Café Europa”, синџир на поврзани Кафулиња, кои претставуваат високо технолошки места за средби на артисти и креатори низ цела Европа и чии што сврзани дигитални ѕидови ќе им овозможат на уметниците, дизајнерите, студентите и едноставно на сите граѓани да се сретнат со нивните колеги и сограѓани, да разговараат и разменуваат идеи, да започнат заеднички проекти и да соработуваат со нивните сензибилитети, различни, но кои што се дел од единствениот Европски идентитет.
Благодарение на соработката помеѓу BRIDGES – Институтот за истражување на развојот, управувањето и праведното општество во Балканските држави и МКЦ – Младинскиот Културен Центар од Скопје, и особено благодарение на поврзувањето на одличното познавање на македонската уметничка сцена од МКЦ со важната мрежа на меѓународни контакти од BRIDGES, големиот културен и креативен потенцијал на градот Скопје им беше претставен на организаторите на Монс 2015, кои што срдечно го поздравија приклучувањето на Македонскиот главен град кон нивната мрежа на културни европски градови – Cafe Europa.
Скопје ќе им се придружи во оваа мрежа на неколку предводници на светската култура како што се: Париз, Рим, Сиена, Рига, Монс и Плзен, Сан Себастијан (Европски град на културата за 2016 година), Авињон (најголемиот светски театарски фестивал) и многу други. Меѓу сите градови од Југоисточна Европа, а покрај Скопје, само градот Сараево беше примен во оваа исклучително ексклузивна иницијатива.
Младинскиот Културен Центар од Скопје ќе биде домаќин на Кафулето – Skopje Cafe Europa. Неговото официјално отворање ќе се одржи на 12-ти Март преку поврзување во живо со Монс и со другите градови од мрежата на Cafe Europa. Преку редовно организирање на поврзани активности до крајот на 2015 година, кафулето во Скопје ќе понуди платформа за претставување на локалните дизајнери и креативни артисти во другите партнерски градови и за иницирање на можности за соработка.
“Иницијативата “Café Europa” ќе им овозможи на македонските уметници во голема мера да ја зголемат нивната меѓународна видливост и со тоа воедно и ќе се адресира една многу важна потреба на нашата креативна заедница” – вели Маргарита Арсова, проектен менаџер на Skopje Café Europa од Младинскиот Културен Центар – Скопје. Според Васе Атанасоска, извршен директор на BRIDGES “Оваа соработка претставува почетна точка на многу други иницијативи со водечките културни центри од Европа, кои што ќе резултираат со многу корисни економски и културни можности, како за креативните уметници и компаниите од Република Македонија, така и за самиот град Скопје”.
Всушност, заедничка апликација за европски грант е веќе испратена од страна на МКЦ – Скопје, Монс и неколку други градови од мрежата на Cafe Europa, додека пак BRIDGES иницираше соработка со CULTURALLIA, Европска иницијатива под мотото “каде што културата се сретнува со бизнисот”, организирана во Белгија во текот на оваа година. И двете организиации, МКЦ – Скопје и BRIDGES, гледаат во интеграцијата на Скопје во проектот Cafe Europa, предводен од Монс 2015, во исто време голема можност за креативците од Скопје и веќе признание за нивниот квалитет и динамизам. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Љутков: Да изградиме индустрија што ќе создава игри со македонски печат и глобален потенцијал

Денес во Скопје беше отворена првата конференција за развој на видеоигри во Македонија „Game Dev Rev 2025“, во организација на Асоцијацијата на македонската индустрија за видеоигри (MGI).
Со своето обраќање пред присутните, министерот за култура и туризам Зоран Љутков нагласи дека оваа конференција не претставува само промоција на видеоигри, туку е симбол на креативноста, младинската енергија и новата културно-економска реалност за Македонија.
„Дали знаете што имаат заедничко една добра видеоигра и една успешна културна политика?“-праша министерот во своето обраќање. Двете почнуваат со идеја, момент на инспирација, што, ако е поддржан на вистински начин, може да прерасне во нешто големо. Некогаш дури и светски“, рече Љутков.
Министерот посочи дека индустријата за видеоигри денес е една од најбрзорастечките културни и економски гранки во светот, со годишен приход што го надминува оној на филмската и музичката индустрија. Таа индустрија, како што истакна, претставува спој на уметност, технологија, наратив и дизајн, и создава нови можности за младите.
Тој информираше дека Министерството за култура и туризам ја даде својата поддршка за иницијативата на асоцијацијата и за сите професионалци, ентузијасти и визионери вклучени во неа.
„Ова не е само конференција, туку повик до нашите млади креативци, дизајнери и програмери да го препознаат својот потенцијал, да се поврзат, да учат и да создаваат. Тука се гради иднината на македонската гејминг-индустрија,“ рече министерот.
Во своето излагање, министерот се заложи за поголема поддршка на новите културни индустрии, особено оние што го поврзуваат младинскиот потенцијал со глобалните трендови и носат нова економска вредност за земјата.
„Да го искористиме овој почеток за да создадеме заедница што ќе расте и ќе создава игри со глобален потенцијал–но со македонски печат,“ рече Љутков.
На конференџијата особено значајно беше присуството на претставници од Европската федерација за развој на видеоигри, како и поддржувачи од целиот регион и Европа, што претставува силен сигнал дека Македонија се позиционира како активен чинител на дигиталната и креативна мапа на Европа.
Култура
Сиљановска-Давкова: Фестивалот „Игор Маџиров“ уште еднаш покажа и докажа дека театарската моќ допира до сите генерации

Претседателката Гордана Сиљановска-Давкова вчеравечер се обрати на свеченото отворање на четвртото издание на Интернационалниот фестивал на детски театри „Игор Маџиров“, којшто под слоганот „Сцена за сечиј сон“, и годинава се одржува под нејзино покровителство.
За неа, фестивалот, иако е насочен кон најпрефинетата и најпробирливата целна група- најмладите, со оригиналниот и искрен пристап ги заведува, радува и восхитува не само нив, туку и возрасните, будејќи го детето во нив.
Според претседателката, името на фестивалот го отсликува и наликува на профилот и сензибилитетот на извонредниот, прерано починат Маџиров, чии незаборавни улоги од него направија театарска легенда.
Акцентирајќи ја не само естетската туку и педагошката мисија на „Театарот за деца и младинци“, Сиљановска-Давкова изрази неизмерна почит кон актерите и сите вработени во театарот кои, од скромен, но топол амбиент, небаре волшебници, создаваат прекрасна сцена, налик на онаа од соништата.
Таа укажа на потребата од нова, пристојна тетарска куќа, обраќајќи се до надлежните институции со зборовите: ,,Уште еднаш посакувам овој минијатурен дом на „Театарот за деца и младинци“ да порасне, како што пораснаа децата кои во изминатите три децении го посетуваа и му се насладуваа. Просторното растење нека соодветствува на потребите на домаќините, но и на гледачите”.
Култура
Наградена со Стериина награда, славена во Белград – претставата „Народен пратеник“ на МНТ сега патува за Брчко

Со претставата „Народен пратеник“ од Бранислав Нушиќ, во режија на Егон Савин, Македонскиот народен театар ќе настапи на претстојните 42. Интернационални театарски средби „Брчко Дистрикт“ во Босна и Херцеговина.
Фестивалската програма се одржува од 16 до 24 октомври, а МНТ ќе настапи на втората фестивалска вечер, утревечер, на 17 октомври.
Фестивалот „Брчко Дистрикт“, со речиси половина век традиција, важи за еден од најрелевантните во регионот, познат по специфичниот пристап кон продукцијата, селекцијата и наградувањето на претставите и поединците.
Селектор на годинашното издание е култниот и харизматичен актер и режисер, Ирфан Менсур.
Летово, претставата „Народен пратеник“ доби Специјална Стериина награда за колективна актерска игра во Нови Сад и е сè поактуелна во регионалниот театарски простор.
Веднаш потоа беше изведена и во Народно позориште во Белград, каде Менсур фасциниран од актерската игра ја вклучи претставата во официјалната селекција на фестивалот во Брчко, со зборовите „Значаен пример на сценска интерпретација на класичен текст“.
Режијата на Савин ја задржува суштинската визија на Нушиќ, избегнувајќи радикални режисерски интервенции. Наместо тоа, фокусот е ставен на колективната актерска игра и јасната критика на политичкиот театар, испорачана интелигентно, духовито и трезвено.
Во претставата играат: Александар Микиќ, Дарја Ризова, Тони Михајловски, Јордан Симонов, Тања Кочовска, Александар Михајловски (со снимен глас), како и ансамблот: Дејан Стамчевски, Синан Ракип, Скендер Бериша, Зекирија Алим, Мирослав Атанасовски, Мартин Китановски и Хусеин Халили.
Ова е трето учество на МНТ на фестивалот во Брчко. Во претходните години, театарот има учествувано со претставите „Народен непријател“ и со „Нема да биде крај на светот“ и двете во режија на Нина Николиќ.