Македонија
Арсовска: Мојата визија за развој на Скопје има осум главни столба
Независната кандидатка за градоначалник на Скопје, поддржана од ВМРО-ДПМНЕ, Данела Арсовска, денеска ги презентира осумте столба од својата визијата за главниот град, односно осумте принципи и цели на нејзината работа.
„Скопје мора да биде град чии врати нема да се затворени за скопјани. Второ, Скопје мора да биде дигитализиран град. Трето, Скопје мора да има многу повеќе зеленило. Четврто, Скопје мора да биде град со среден и функционален сообраќај. Петто, Скопје мора да биде град со многу културни настани и фестивали. Шесто, Скопје мора да ги врати солидарноста и хуманоста и да им се посвети на своите граѓани. Седмо, Скопје да биде град на иднината, град на модерни услови за образование и град на квалитетен спорт. И, осмо, Скопје мора да биде град за сите“, порача Арсовкса.
Таа и подетаљно ги објасни столбовите врз кои ќе ја гради визијата за Скопје.
„Отворен град значи да има 100 % транспарентност и нула толеранција за корупција.
Скопје мора да биде модерен европски град и ќе има мотивирана администрација што ќе одговара навремено на барањата на граѓаните.
Врз столбот зелено Скопје ќе се заштити зеленилото и значително ќе се намали загадувањето. Ќе се реализираат проекти за 5 нови мегапаркови. Секоја година ќе бидат засадени 100.000 нови дрвја. Ќе иницираме заштита на Водно со закон. Ќе ги исчистиме дивите депонии во првите 82 дена од мандатот.
Мобилно Скопје значи бесплатен јавен превоз и крај на сообраќајниот метеж. 250 нови екоавтобуси ќе ја заменат старата флота и ќе го направат јавниот превоз поудобен и поеколошки.
Скопје го гледам како дигитален центар на Балканот бидејќи ја имаме најталентиранита младина кога станува збор за кодирање, софтверски инженеринг и информациска технологија, што е дел од економијата на иднината.
Секој месец по еден фестивал, 12 фестивали годишно, кои Скопје го промовираат во главен град на културата.
Живописно Скопје за да бидеме европски главен град на културата. Скопје мора да ја заживее културната сцена со поддршка за независните уметници и музичари и со подобрување на инфраструктурата на објектите од културата.
Солидарноста на градот ќе се врати преку солидарно Скопје како град што се грижи за сите свои жители. Градот ќе воспостави неделна услуга за доставување и помош за стари и изнемоштени лица и за лица со инвалидитет и ограничена подвижност. Во сите јавни канцеларии и објекти во надлежност на Градот ќе се обезбеди пристап за лицата со попречености. За младите ќе обезбедиме младински центри во сите општини и ќе го зголемиме бројот на социјални работници во училиштата. За жените ќе изградиме безбедни куќи и ќе воспоставиме специјална апликација за итна поддршка во случај на семејно насилство.
Иднината подразбира силни инвестиции во образованието на младите, а ние ќе овозможиме нова гимназија, нови објекти за дел од постојните средни стручни училишта, нова библиотека и читалници. Таа иднина ќе се гради и со вложување во спортот и здравиот живот. Затоа, приоритет ни е зелен спортски кеј, во должина од 40 километри, од Ѓорче Петров до Долно Лисиче, со спортски содржини за сите генерации од двете страни на реката Вардар.
Урбаниот развој на Скопје со години беше фокусиран само на развој на централните делови на градот, а подалечните населби беа заборавени, но и тие имаат еднакво право на модерна инфраструктура. На Скопје му е потребно чисто и организирано водоснабдување за да им се обезбеди на граѓаните чиста вода за пиење, без секојдневни прекини и дефекти. Ќе почнеме програма за модернизација и ревитализација за запоставените населби и села. Буџетот за реконструкција на патишта и друга основна инфраструктура ќе биде рамномерно распределен на сите делови на Скопје. Секоја населба ќе има паркови и спортска инфраструктура“, објасни Арсовска дефинирајќи ги осумте столба врз кои ќе ја гради визијата за Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЕУ: Очекуваме соработка со претседателката на Македонија, парламентот и владата за да работиме на европскиот пат
Европската унија и честита на Гордана Силјановска Давкова за нејзината победа на претседателските избори во Македонија и со нетрпение очекува да работи со првата жена лидер во земјата, изјавија високиот претставник на ЕУ за надворешни работи и безбедност Жозеп Борел и европскиот комесар за проширување и соседска политика Оливер Вархељи
Борел и Вархеи, во заедничката изјава објавена по повод вториот круг од претседателските и редовните парламентарни избори во Северна Македонија, ги охрабрија „релевантните политички актери да работат на формирање парламент и стабилна влада“.
„Двете институции треба да работат заедно на подобрување на европскиот пат на Северна Македонија, кој вклучува имплементација на клучните реформи, особено во областа на владеењето на правото и борбата против корупцијата, во интерес на сите нејзини граѓани“, се вели во заедничката изјава на Борел и Вархеи.
Македонија
Боки-13 за операцијата „Бумеранг“: поднесе кривични против Заев, Спасовски, Русковска
Бојан Јовановски-Боки 13 поднел кривични пријави против поранешниот премиер Зоран Заев, ексминистерот за внатрешни, Оливер Спасовски, и двајцата генерални секретари на СДСМ, поранешниот Александар Кирацовски и актуелниот Миле Зачевиќ, како и против поранешната шефица на Јавното обвинителство за гонење организиран криминал и корупција, Вилма Русковска.
Тој дошол во Обвинителството на покана на актуелниот шеф на оваа институција, Ислам Абази.
Најави дела кривично-правната операција е наречена „Бумеранг“.
„Сите мои наводи и описот на настаните ќе бидат материјализирани со докази што потекнуваат од мојот телефонски уред, кој ми беше одземен при моето апсење во предметот ‘Рекет’. Се работи за кривични дела што се однесуваат на злоупотреба на службената положба и овластувањето, за изборни измани, незаконско финансирање политичка партија, злоупотреба на јавните набавки“, додаде тој.
Најави и продолжение на предавање докази во писмена форма.
„Поднесена е кривична пријава и против Вилма Русковска за злоупотреба на службената положба, примање поткуп, примена на тортура. Зоран Заев е речиси во секоја пријава“, рече Јовановски.
Македонија
Мицкоски на средба со коалицијата: доби поддршка за почнување преговори за состав на идната влада
Претседателот на ВМРО-ДПМНЕ, Христијан Мицкоски, денеска оствари средба со претседателите на партиите во состав на коалицијата „Твоја Македонија“.
Беше констатирано дека коалицијата оствари успешен и историски резултат, кој создава и одговорност за реализирање на очекувањата.
Мицкоски доби поддршка од претседателите на коалициските партии за почнување преговори за состав на идната влада.
Според заклучокот на состанокот, разговорите треба да се водат врз основа на постулати за забрзан економски развој на Македонија, силна борба против криминалот и корупцијата и европските интеграции врз база на принципи и вредности, соопштија од партијата.