Македонија
Вакцинацијата оваа недела ќе се одвива со намалено темпо

Вакцинацијата оваа недела ќе се одвива со намалено темпо, изјави министерот за здравство, Венко Филипче.
Тој кажа дека во државата има само 5.000 останати вакцини за прва доза, но уверува дека вакцинацијата нема да сопре оти синоќа стигнале 11.720 дози од вакцината на „Фајзер“.
Филипче рече дека нема точен датум кога ќе стигнат руската вакцина „спутник В“ и кинеската на „Синовак“.
„За ’спутник’ и ’синовак’ сè уште немаме точни датуми кога ќе стигнат. За ’спутник’ беше најавено дека ќе стигне на крајот на мај. Јас вчера разговарав со амбасадорот на Русија, зеде обврска во текот на денот да искомуницира со Институтот во Москва и да ни даде повратни информации. Најавата за пристигнување на вакцините од ’Синовак’ е за почетокот на јуни. Кажаа првата недела, првите десетина дена дека треба да ги очекуваме. Имунизацијата нема да запре, вчера стигнаа Фајзеровите вакцини и тие ќе бидат дистрибуирани во пунктовите. Во текот на неделава очекуваме и други вакцини да стигнат пред сè од Бугарија, а понатаму и од Грција“, рече министерот Филипче.
Додаде дека очекува веќе од следната недела повторно да се достигнува бројката од 12 илјади вакцинирани дневно.
Во текот на неделава министерот Филипче очекува да стигнат 50.000 дози од вакцината на „Астразенека“ од Бугарија и уште 20.000 дози од Грција. Со оваа вакцина кај нас се вакцинираат само лица над 60 години. Забраната за вакцинирање лица помлади од 60 години со „Астразенека“ останува сè додека не се утврди дека е безбедна.
Исто така, во првите десет дена од овој месец се очекуваат 500.000 дози од кинеската „синовак“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Осуда од Ковачевски за каменувањето на македонскиот клуб во Бугарија: Очекувам да го санкционираат вандализмот во најкраток рок

Претседателот на Владата на Република Северна Македонија, Димитар Ковачевски најостро го осудува вандалскиот чин, на каменување на македонскиот клуб „Никола Јонков Вапцаров” во Благоевград.
Тој преку својот Фејсбук профил, порача дека очекува во најкраток можен рок, институциите во Република Бугарија да ги најдат сторителите и соодветно да ги казнат.
„Каменувањето на македонскиот клуб „Никола Јонков Вапцаров” во Благоевград е чин на вандализам кој најостро го осудувам. Ваквите активности не соодвествуваат на договорената политика за унапредување на добрососедските односи, взаемното почитување и пријателство меѓу две соседни држави. Очекувам од страна на надлежните институции во Бугарија во најкраток можен рок да се пронајдат и санкционираат сторителите и да се осуди вандализмот. Северна Македонија во духот на европските вредности, ќе продолжи со заложбите за зацврстување на дипломатската и позитивна агенда меѓу Северна Македонија и Бугарија“, пишува во објавата на премиерот Ковачевски.
Македонија
ЦУК: Пожар кај селото Миладиновци

Искрење на бандера, предизвика пожар помеѓу селото Миладиновци и рафинеријата ОКТА.
Центарот за управување со кризи на својот фејсбук профил објави дека во моментот се интервенира на негово гаснење.
,,Во 19:05 часот на телефонскиот број 112 пријавен е пожар помеѓу селото Миладиновци и рафинерија ОКТА кој настанал како резултат на искрење на бандера и истиот се проширил на околната сува трева. Во моментот на местото на настанот се екипи на БППЗ на Град Скопје и полиција. Се интервенира на негово целосно гаснење и во моментот нема опасност од негово проширување”, се вели во соопштението од ЦУК.
Македонија
ВМРО-ДПМНЕ го осуди демолирањето на македонскиот клуб во Благоевград: Да запре говорот на омраза кон Македонците во Бугарија

ВМРО-ДПМНЕ најостро го осудува демолирањето на македонскиот клуб во Благоевград. Вандализмот не е добрососедство и не може да биде. Негирањето на Македонија, но и на Македонците во соседството е пред се резултат на поданичкиот однос на власта, која го дозволи и мотивира тој однос, се вели во соопштението од ВМРО-ДПМНЕ.
Од партијата додаваат дека сега Ковачевски и Пендаровски на дело гледаат кај ја донесоа државата и македонскиот народ. Народот не смее да биде жртва на власта, затоа и ВМРО-ДПМНЕ бара промени. Потребна е власт која ќе се грижи за народот.
Упатуваме апел и до Бугарија и до меѓународните институции во таа земја, што побрзо да се откријат вандалите, истите да се казнат и да се запре со говорот на омраза против Македонците, се вели во соопштението.