Македонија
(Видео) Жителите на Аеродром бесни: Дојде животот, ама овие сакаат со згради да ни го одземат

Жители на Реонски центар Аеродром бараат државата итно да се откаже од изградба на зграда на последната слободна парцела меѓу нивните згради. За истата зграда во предизборниот период сегашниот градоначалник Златко Марин ветуваше дека нема да се изгради и дека просторот ќе се уреди во паркинг. И покрај ветувањето, пред две недели се појавила фирма што го оградила просторот со лимени тараби. Во градилиштето е заграден и тротоарот, па сега учениците се протнуваат покрај тарабите за да стигнат до училиштето во близина или кружат околу зградите.
„Единаесет години, условно кажано, водевме војна со претходниот градоначалник и општинскиот Совет, кои беa од ВМРО-ДПМНЕ, и 11 години не изградија ништо на парцелата иако во тој период изградија седум други згради. По 11 години, на заминување, старата власт ѝ дала маркичка за градење на некоја фирма да гради зграда со 35 стана, веројатно со цел да си гради ако остане на власт, ако не тие што ќе дојдат да имаат клин во тркала, да не можат ништо да направат. Наоколу сме 8 згради што имаат потпишано барања да не се гради зграда, туку да се изгради урбанизиран паркинг-плац бидејќи во околните згради има над 1.000 стана што гравитираат на оваа улица и нема каде да ги паркираат возилата“, вели Горјан Вревезовски, жител на Реонскиот центар.
Инвеститор на зградата не е приватна, туку државна фирма, Акционерското друштво за изградба и стопанисување со станбен и деловен простор, а и земјиштето е државно. Овој факт уште повеќе ги иритира жителите од околните згради, кои се децидни во барањето да сопре изградбата и просторот да се пренамени.
„Пред една недела бевме во претпријатието за стопанисување со станбен и деловен простор и од таму кажуваат дека планот не може да се менува, меѓутоа наше тврдење е дека тој што го донел урбанистичкиот план, тој може и да го промени. Како е донесен, така во обратна постапка може и да се промени. Граѓаните најмногу ги боли што новиот градоначалник не дошол да види на самото место какви се потребите на граѓаните, да поразговара со нив и да види што е поисплатливо – да се гради паркинг-плац со 60-70 паркинг-места или да се гради зграда што целосно ќе го затвори просторот, кој сега ќе биде полош и од Капиштец, кој како населба сите го критикуваа. Во предизборието беше ветено дека ќе се направи тоа што граѓаните ќе го бараат“, вели Вревезовски.
Тој предупредува дека состојбата со паркирањето и сега е алармантна. Се паркира и на средина на улицата иако просторот треба да остане празен за итни случаи. Веќе имале еден пожар во кој противпожарното возило не можело да се пробие од паркираните возила. Жителите се бесни од незаинтересираноста на Општината и на јавното претпријатие за нивните барања и веќе губат верба дека нешто ќе се смени.
„Какво ќе биде решението на крајот – не знаеме, меѓутоа ако е ова мотото на СДСМ дека доаѓа живот за сите, тогаш да се спремиме сите, да повикаме товарни вагони за стока и да се иселиме од оваа држава. Ова не е барање на еден-двајца, туку е барање на седум-осум згради, тоа се над 1.500 стана“.
И градоначалникот Златко Марин и директорот на јавното претпријатие, Кристијан Трајковски, најавија дека ќе го кажат ставот за новата зграда, но в понеделник. И едниот и другиот вчера беа презафатени да одговорат на прашањата за зградата, а денес исто така двајцата се на службен пат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Паника во Катланово и Петровец поради голем пожар, Ангелов смирува дека нема опасност да се запали бензинската

Попладново пожар изби и помеѓу Катланово и Петровец. Директорот на Дирекцијата за заштита и спасување Стојанче Ангелов вечерва во видео-изјава посочи дека пожарот е пресечен и не претставува закана за бензинската пумпа која е во близина.
„Пожарот кој што изби помеѓу Катланово и Петровец во близина на безинската пумпа е делумно локализиран, односно е пресечен и не претставува опасност за блиската бензинска пумпа. Се движи кон село Чифлик, а на негово ставање под контрола работат скопските пожарникари. Рано наутро ќе се упати и ер-трактор, а ќе упатиме и неколку возила. Се работи за непријатен пожар кој се наоѓа на непристапно место, но верувам дека утре пожарникарите ќе го стават под целосна контрола. Видлив е од автопатот и предизвикува вознемиреност, но граѓаните да не се плашат бидејќи не може да ја зафати бензинската пумпа“, изјави Ангелов.
Македонија
До 18 часот вкупно 29 пожари на отворен простор, гори уште на 14 места

До 18 часот вкупно 29 пожари на отворен простор, од нив 14 активни, четири под контрола и 11 изгаснати.
Како што информираат од ЦУК активни пожари има во Општина Василево, Радовиш и Берово – с. Нивичино (планината Голем Готен и Малешевските планини – нискостеблеста шума, смрека, грмушки и ниска вегетација), Општина Прилеп – с. Бешиште, Бешишки Рид, кон с. Градешница (опш. Новаци) и кон границата со Р. Грција (мешана шума), Прилеп и Кавадарци – помеѓу с. Царевиќ, Смолани, Радобил, Дрен, Галиште и Трстеник (мешана шума и ниска вегетација), Македонски Брод – помеѓу с. Црешево, Локвица и Крапа (деградирана дабова шума и грмушки, Желино – помеѓу с. Церово и Групчин (нискостеблеста и деградирана шума),Крива Паланка – с. Нерав (висока борова шума), Старо Нагоричане и Куманово – с. Облавце, Бељаковце, Довезенце, Орах и Ругинце (ниска вегетација), Битола – с. Велушина (ниска вегетација), Битола 2 – с. Миџитлија (ниска вегетација), Кичево – с. Горно Трско (ниска вегетација и ниска шума), Македонска Каменица – с. Косевица (борова шума), Струга – с. Ново Село и с. Делогожда (ниска вегетација и стрниште), Штип – помеѓу с. Драгоево и Селце (нискостеблеста шума, прнар и сува трева),Петровец – с. Ржаничино (ниска вегетација).
Пожарите кај Македонски Брод 1 – с. Грешница, Македонски Брод 2 – с. Латово, Карбинци – с. Јунузлија и кај Петровец – с. Средно Коњаре кај р. Пчиња се ставени под контрола.
Македонија
Алиу ветува 205 милиони евра за болници кои инспирираат доверба, а не страв

Верувам дека здравството е повеќе од систем. Тоа е нераскинливо морално ветувањето што си го даваме едни на други: дека кога најмногу ни треба, ќе има некој тука за нас“, порачува во видео обраќање министерот за здравство, Азир Алиу.
Тој нагласува дека тоа ветување денес има потреба да се врати во системот, но без импровизирани одлуки, туку со јасна визија. Без носталгија, со податоци и храброст.
-Визијата станува реалност со голем прв чекор: 205 милиони евра за болници кои инспирираат доверба, а не страв, вели министерот Алиу, додавајќи дека во Штип ќе се гради модерна клиничка установа и Факултет за медицина за идните генерации лекари.
-Во Тетово, болницата ќе добие современа медицинска опрема и два нови објекти, со што ќе прерасне во симбол на грижа и достоинство. Во Кичево, каде што болницата остана нереализирано ветување од минатиот век, од темел ќе градиме нова, светла, топла и достојна за секој од вас, вели министерот Алиу.
Тој истакнува дека ова е само почеток, бидејќи хоризонтот на неговата визија е многу подалеку.
-Да изградиме модерно, хумано и дигитализирано здравство. Ние не сме тука да чекориме по патеки од минатото кои не водат никаде, ние сме овде да градиме доверба за идните генерации. И заедно со вас, ќе ја направиме оваа визија реалност, порачува министерот за здравство, Азир Алиу во неговото видео обраќање.