Македонија
(Видео) Кузеска: Скандалозната одлука на Апелациониот суд е удар врз правдата

„Денеска, целата македонска јавност е сведок на силен удар врз правдата од страна на судиите во Апелацискиот суд во Скопје. Скандалозна е одлуката на судот да ја прифати гаранцијата со што на лицето Сашо Мијалков му се укинува притворот. Мијалков издржува мерка притвор во предметот ‘Трезор’, каде што е осуден на 8 години затвор, со сѐ уште неправосилна пресуда. Исто така, за Мијалков има и втора неправосилна пресуда од 12 години за нелегеланото прислушување“, изјави на денешната прес-конференција Богданка Кузеска, портпарол на СДСМ.
Кузеска се обрати до судиите Ѓоко Ристов и Енвер Беџети и побара јавно да излезат пред целата јавност и да кажат како е можно за лице со вкупни пресуди од 20 години да донесат ваква одлука?
Таа додава дека оваа одлука директно ја загрозува правдата не само за овој предмет туку и за сите другибшто се водат за него, како и за криминалот на други поранешни функционери на ВМРО-ДПМНЕ.
Судиите се независни, но оваа срамна и скандалозна одлука отвора сериозни сомнежи и претставува директен удар врз кредибилитетот на судството да испорача правда за секого.
СДСМ ги повикува сите надлежни институции да се вклучат во овој случај да не се дозволи бегство, а граѓаните ги повикуваме да бидат гласни и заедно да обезбедиме правда.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Реновирани два оддела на Клиниката за токсикологија

Министерот за здравство,Фатмир Меџити, заедно со заменик министерката, Маја Манолева, денеска ја посетија Универзитетската клиника за токсикологија, каде се комплетно реновирани одделите за токсикологија и детоксикација.
Инвестицијата е во вредност од 9,5 милиони денари.
Станува збор за комплетно реновирање на болничките соби, опремување со нови кревети и мебел, 24-часовен централен надзор и мониторинг на сите витални параметри на сите хоспитализирани пациенти, како и комплетно реновирање на сите тоалети на овој кат.
Од Министерството за здравство велат дека оваа инвестиција значи унапредување на условите за третман и успешно лекување на пациентите.
Во претстојниот период е предвидено да се реновира и приземниот амбулантски простор, со што ќе се заокружи реновирањето на комплетниот амбулантско-стационарен дел на клиниката, а предвидена е и нова токсиколошка лабораторија, што ќе значи третман на акутните интоксикации по најсовремените светски протоколи.
Македонија
Петровска во Брисел: Одвојуваме повеќе од 30 отсто од буџетот на Министерството за модернизација на Армијата

Средба Петровска – Џоана: Северна Македонија и сојузниците во НАТО се обединети и јасни во целта – безбедност на територијата на НАТО и осуда на руската агресија врз Украина.
Министерката за одбрана Славјанка Петровска денеска во седиштето на НАТО во Брисел се сретна со Мирчеа Џоана заменик генералниот секретар на Алијансата.
На средбата Петровска и Џоана заклучија дека земјите – членки се обединети и посветени на безбедноста на Алијансата како никогаш досега и дека тоа е јасно видливо преку чекорите кои ги презема НАТО во зацврстување на процесите за трансформација.
Во контекст на трансформација на македонската одбрана, министерката Петровска подвлече дека Северна Македонија од самиот почеток јасно и недвосмислено се насочи кон исполнување на доделените Цели за способности преку соодветно одделување на финансиските средства. Напомена дека оваа година Министерството за одбрана одвојува повеќе од 30 отсто за модернизација што ја искажува и политичката волја за исполнување на нашите обврски.
Заменикот генерален секретар на НАТО, Џоана порача дека ставот на Северна Македонија е ист како и ставот на сите сојузници и изрази благодарност за улогата на земјата во зацврстувањето на колективната безбедност на НАТО.
Во седиштето на НАТО, министерката се сретна и со претседавачот на Воениот комитет на Алијансата, адмиралот Роберт Бауер со кого разговараше за придонесот на земјава во мултинационалните сили во рамките на Зајакнатото истурено присуство во источното крило на НАТО. Дополнително се запозна и со процесите на воената трансформација на Северноатлантската алијанса.
Македонија
Отчукува часовникот до застарување на делото на Мијлаков – остануваат 16 дена до слобода

Преостануваат 16 дена во кои Апелација треба да донесе одлука за предметот „Титаник 2“, а за на обвинетиот Сашо Мијалков да не му застари делото. Предметот што Кривичниот суд предвреме го прати до Апелација, па беше вратен назад и повторно пратен – сега е во Вишото јавно обвинителство. Таму обвинител треба да даде мислење во однос на жалбите.
„Предметот денеска ни стигна од Апелација. Го дадеме на обвинител да го проучи предметот. Мислам дека утре или задутре ќе има одлука од страна на Обвинителството“, вели Мустафа Хајрулахи за „Макфакс“.
Ако предметот биде вратен задутре со мислење, ќе останат уште 14 дена за закажување јавна седница. По нејзиното одржување, ќе може да се донесе и одлука.
За овој предмет двапати се изрекува пресуда. Првата беше укината од Апелација во декември 2019 година. Од тогаш до јануари 2023 година предметот се судеше во Кривичниот суд. Судиите Огнен Ставрев и Осман Шабани одново ги прогласија обвинетите за виновни. На повтореното судење ексдиректорот на УБК, Сашо Мијалков, е осуден на казна затвор од две години. Лидерот на ДПА, Мендух Тачи, исто така доби казна затвор од две години.