Заменик министерот за социјална политика, демографија и млади Ѓоко Велковски оствари работна посета на општина Гевгелија.

Заменикот Велковски изврши увид во градежните активности за доградба на детската градинка „Детска радост“, коишто се во завршна фаза. Новиот објект „Сончогледи“ ќе обезбеди дополнителен капацитет за 135 деца, овозможувајќи поголем број семејства да имаат пристап до квалитетно предучилишно воспитание и образование.

„Како родител и како човек, свесен сум за значењето на сигурна и поттикнувачка средина за децата. Горд сум што успеавме да го откочиме процесот на доизградба на објекти кои со години беа во застој. Денес, секој проект што носи подобар живот за граѓаните е наш приоритет“, истакна заменик-министерот.

За време на посетата, заменик-министерот одржа средби и со претставници на Здружението на лица со телесен инвалидитет „Мобилност“, Здружението на лица со попреченост „Порака“, Здружението на слепи лица и Здружението на лица со оштетен слух и говор.

На средбите беа дискутирани предизвиците со кои овие лица се соочуваат, како и можните решенија за подобрување на условите, пристапот до помагала и унапредување на законските рамки.

„Овие искрени разговори ме мотивираат уште повеќе да работам на создавање општество каде секој човек, без разлика на своите потешкотии, ќе има можност да живее достојно и со поддршка. Не застануваме додека не изградиме инклузивна заедница која ги прифаќа и вреднува сите“, нагласи заменик-министерот.

Со оваа посета, Министерството ја потврдува својата посветеност за унапредување на условите за живот и инклузија на сите граѓани.

Министерот за локална самоуправа, Златко Перински, денеска претседаваше со националниот Совет за рамномерен регионален развој, кој денеска ја одржа 38 седница, практично со нов состав. Со последните измени на Законот за рамномерен регионален развој е направено усогласување со Законот за организација и работа на органите на државната управа, со што структурата на Советот останува иста, но за прв пат членови на Советот се и министрите на новите министерства, Министерството за енергетика, рударство и минерални суровини и Министерството за спорт.

„Ова е местото каде што сите вклучени страни од двете нивоа на власт, централната и локалната, ги усогласуваат ставовите по прашањата од важност за рамномерниот регионален развој“, истакна претседателот на Советот, министерот Перински, кој посочи дека во наредниот период Советот ќе се состанува со зголемена динамика, а целта е да се поттикне развојот во сите општини и плански региони, соодветно на потребите на граѓаните и секогаш со вклученост на граѓаните.

На денешната седница, Советот ги утврди Предлог Одлуката за индикаторите за пресметување на развојниот индекс на планските региони и Предлог Одлуката за класификација на планските региони според степенот на развиеност, за периодот 2024-2028. Најразвиен останува Скопскиот плански регион, а со најнизок развоен индекс се Вардарскиот и Североисточниот плански регион во земјава. На предлог на Советот за рамномерен регионален развој, Одлуките ги донесува Владата.

Советот за рамномерен регионален развој е координативно тело меѓу надлежните министерства што имаат буџетски програми со влијание на регионалниот развој, но обезбедува и координација со Советите за развој на планските региони, каде членуваат градоначалниците од соодветниот плански регион.

На седницата, сите точки од дневниот ред беа едногласно усвоени, а претседателот на Советот, министерот Перински, најави дека следната седница ќе се одржи во јануари на која ќе се разгледува одлуката за подрачјата со специфични развојни потреби.

Проектот за унапредување на образованието за медицинските сестри и на акушерките и воспоставувањето систем за признавање на професионалните квалификации ќе им овозможи на учениците и студентите да добиваат квалитетно образование по европски стандарди, рече министерката за образование и наука, Весна Јаневска, на настанот со кој беше означен почетокот на проектот, кој е финансиран од ЕУ и се имплементира со поддршка на Министерството за надворешни и европски работи на Република Словенија, техничка помош на Канцеларијата на СЗО во Скопје и македонското Министерство за здравство.

Здравствената струка се реализира во 20 средни училишта во  државата, а над 4.700 ученици, од прва до четврта година, се школуваат за медицински сестри. Во образовниот профил гинеколошко-акушерска сестра, од прва до четврта година, има вкупно 406 ученици. Некои од нив продолжуваат на студиските програми од прв, втор и трет циклус на студии.

„Проектот ќе обезбеди натамошно унапредување на сестринскиот и акушерскиот кадар, а ние како Влада и ресорни министерства се стремиме да создадеме услови за нивна поддршка. Нашата држава треба соодветно да го цени нивниот придонес преку конкурентни плати и можности за професионален раст и напредок за да можеме да ги задржиме меѓу нас. Како лекар можам со сигурност да кажам дека тие се столб на здравствениот систем, без кој не е можна здравствената заштита“, нагласи Јаневска.

Важен аспект на проектот е воспоставувањето на системот за признавање на професионалните квалификации, што ќе овозможи препознатливост на стекнатите дипломи.