На денешен ден 1991 година е одржан Референдумот за независност на Македонија, а на Референдумот позитивно се изјасниле 1.079.308 граѓани, односно 95,26% од оние кои гласале биле „за“  суверена и независна држава Македонија.

По тој повод, денес на 33 – годишнината од независноста на Mакедонија, делегација на Левица составена од членовите на Централниот комитет, Андреа Јанков, Гордана Ивановска и Марјан Димитриев, положи свежо цвеќе на споменикот на паднатите борци на НОБ во Алејата на великаните во Бутел.

„И овој 8 Септември потсетуваме дека Уставното име на државата е Република Македонија!  Референдумот одржан на 30 септември 2018 година, за промена на уставното име беше неуспешен. Оттука, промената на уставното име на државата, како последица на Преспанскиот договор, којшто насила го склучи тогашната квислингшка власт (без потпис од претседателот) е ништовен! Левица останува доследна на правото за самоопределување на народите и како партија не ги признава империјалистички наметнатите договори, спротивни на повелбата на ООН, коишто го нарушија суверенитетот на државата и угледот на Македонците!  Сметаме дека овие нелегитимни договори не треба да се почитуваат! Секоја наредна Влада која ги почитува истите, слободно, може да се смета за соучесник во најголемото предавство направено на македонскиот народ од тогашната влада на СДСМ“, порачуваат од Левица.

Агенцијата за храна и ветеринарство (АХВ) казни нерегистрирани производители на сирење во Прилеп и Скопје, како и месарница поради неводење на дневна евиденција за потрошени суровини за производство на подготовки од месо.

Како што информираат од АХВ, во прилепското село Ново Лагово, индивидуален земјоделец е казнет поради нерегистрирано производство на сирење и му е наложено да ја регистрира дејноста.

Во Прилеп, исто така, е изречена казна на оператор со храна – месарница поради неводење на дневна евиденција за потрошени суровини за производство на подготовки од месо.

Преку нивните редовни и вонредни контроли на целата територија на земјава казнети се и физички лица на скопскиот зелен пазар „Буњаковец“.

– Нештетно се уништени 8 килограми сирење, 2 килограми кашкавал, 5 пакувања мед со саќе во количина од 4,5 килограми, кои немале документ за потекло, стои во соопштението од АХВ.

Оттаму дополнуваат дека контрола е спроведена и во сендвичарница на овој зелен пазар каде не се утврдени неправилности.

„Денес се одбележува најголемиот светилник на постоењето на македонската држава, финалниот чин по повеќестолетната борба за слобода и независност или што би се рекло денот над деновите – 8 Септември, празникот на нашата независност“, напиша премиерот Христијан Мицкоски на својата Фејсбук страница по повод Денот на независноста.

„На овој ден за прв пат се слушнаа зборовите: Да ви ја честитам суверена и слободна Република Македонија, на плоштадот Македонија каде се прославуваше независноста. Воедно да не заборавиме дека 8 септември е стремежот на илјадници претходно борци за слободна и своја држава. Тогаш се градеа темелите на Републиката и создаваа институции, но и денес имаме битки кои мора да ги победиме, заеднички, поинакви, иако поинакви сепак подеднакво важни“, додаде Мицкоски.

Мора да се победи разочарувањето, додава Мицкоски, кое ни го оставија и криминалот и корупцијата кои денес се најважните проблеми против кои се бориме. Секој атом од силите да го вложиме во градба на иднина каква заслужува секој еден човек.

„Овој пат државата е на потег и нејзе ја враќаме на народот. Да создадеме земја на среќни граѓани и силна економија. Општество кое ќе одговара на реалните потреби и ќе нуди реални решенија. Да си ги зачуваме луѓето овде во нашата татковина. Оваа генерација има обврска да ги исправи грешките и да создаде иднина за сите наредни. Ова е нашата заедничка битка и заедно се бориме и заедно ќе успееме! Нека е честит и вековит денот на независноста. Бог да ја благослови Македонија!“, вели премиерот во честитката по повод Денот на независноста.