Македонија
(Видео) Нови циркуси во Судскиот совет – хајки, нервоза, довикувања и расправии

Нови расправии и обвинувања во Судскиот совет. Точка на дневен ред е судирот на интереси на експретседателката Весна Дамева за која има обвинувања дека учествувала во постапки при одлучување одговорност за судии, каде што странка бил нејзиниот сопруг. Судир имаше и помеѓу Дамева и експретседателката на Судскиот совет, Павлина Црвенковска. Во дискусијата се надоврзаа и други членови.
„Некој кога станува член на Судскиот совет ја знае основната надлежност на Советот – следење на работата на судиите и нивно оценување. Не станува член на управен одбор на карате-сојуз, па да ја следи работа на каратистите – како се одвива нивната кариера или како си ја вршат нивната работа. Секој од нас кога станувал член на Судскиот совет, имал обврска да си праша дома дали евентуално има некои предмети во кои може да настане судир на интереси. Како член на Судскиот совет овде се одлучувало по барање за утврдување одговорност. Се следела работата на најголемиот суд во државата, Кривичниот. Нејзина обврска било да праша каде евентуално нејзиниот сопруг има предмети и друг член на семејството, деца, за да може да се изземе и да не се доведе во прашање нејзината работа“, рече Црвенковска, поставувајќи прашања на нејзината колешка Мери Радева.
Црвенковска постави прашања, а кога ѝ упадна во збор на Мери Радева, имаше и бурна реакција.
„Нема што да одговарам и да ме прашувате мене. Не знаев за случајот, да знаев, ќе ѝ речев дека треба да се изземе, ако е тоа вистина. Јас тоа и сега не го знам (…) Кога зборувам, очекувам да молчи“, рече Радева одговарајќи на прашање.
Се надоврза и потпретседателот Селим Адеми за тоа кога дознал за сопругот на експретседателката Весна Дамева.
„Јас очекував поранешната претседателка да информира за работи што ѝ се познати. И не само да прашува дома, туку да се држи во согласност со законот. Многу боли кога нападите се насочени кон мене“, рече Дамева.
Се надоврза повторно Црвенковска, без да добие збор, и почна викање во салата. Поради ова, следуваше рекација од Весна Дамева која беше обвинета од дел од колегите.
„Колешката е многу изнервирана. Доколку знаела, во најмала рака таа како член требало да ме извести. Вие, колешке, имате законска обврска да ме известите“, коментира Дамева.
„Немам намера да бидам дел од овој циркус. Судскиот совет има куп прашања од негова надлежност по кои треба да постапува. Продолжуваме со циркузи. Овде се продолжи со меѓусебни обвинувања. Јас на почетокот на седницата реков дека точката ‘разно’ не ми е јасна. Колешката Мери ја појасни. Таа наведе кои аргументи се потребни за да одлучиме за изземање. Ова прерасна во меѓусебни обвинувања. Претседателе, од вас зависи во која насока ќе оди ова“, рече Ивица Николовски.
Во една од дестиците реплики на потпретседателот Селим Адеми, кој зборуваше за правење хајка.
„ За ова ќе се расправа, ќе се утврди колку предмети има, а за тоа дека требало да знаеш – требало да знаеш, без разлика дека вчера си разбрала. Тоа ќе дојде кога точката ќе биде на седница“, рече Адеми.
Претходно, Дамева се бранеше од другите членови, кои ја обвинуваат дека не се иззела во минато постапување иако морала поради тоа што странка во судскиот случај што се ревидирал бил нејзиниот сопруг.
„Ниту треба ниту сум морала да знам за деловните обврски за судски постапки и какви било постапки за мојот сопруг бидејќи ние дома не разговараме за судски работи. Ниту тој знае по што јас постапувам ниту јас знам какви судски постапки се водат, тоа прво. Второ, мојот сопруг и кој било член на моето семејство нема законска обврска мене да ме известува за јас да ве известам. Да бидеме на чисто, ова е она што имам да кажам. Во овој момент знам за тоа. Во секој момент кога ќе дознаам, ќе известам. Како ми кажуваат – така известувам. И за разлика од некои членови на Судскиот совет, кога можеби имале судир на интереси или одредени состојби, не известиле или не кажале причина за изземање, јас такво нешто не го сторив. Јасно и гласно известив, да престанеме со ова зашто созвадаме лажна слика“, рече Дамева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Времето денеска сончево и топло

Времето денеска ќе биде сончево со мала, а претежно во северните делови со умерена облачност. Ќе дува умерен до засилен ветер од северен правец, најизразен долж Повардарието (каде на места ќе има брзина и над 60 км/час).
Минималната температура ќе биде во интервал од 6 до 16, а максималната ќе достигне од 23 до 30 степени.
Во Скопје сончево со умерена облачност и со умерен до засилен северен ветер. Минималната температура ќе се спушти до 11, а максималната ќе достигне 27 степени.
Продолжува периодот на претежно сончево и релативно топло време со свежи утра и со повремена умерена облачност.
Утре ќе дува умерен до засилен ветер од северен правец. Во четврток и петок ќе има делумно зголемување на облачноста и услови за краткотраен локален дожд.
Македонија
Започна „Бела ноќ“ во Скопје

Изложби, перформанси, инсталации, концерти, театарски претстави и филмски проекции ќе се одржуваат вечер во главниот град во рамки на 19. традиционалната културна манифестација „Бела ноќ 2023“.
Централната манифестација ќе се одржи пред порта „Македонија“. Скопјани ќе имаат можност да уживаат во композициите на маестро Кире Костов во изведба на Андријана Јаневска, Наде Талевска, Дани Димитровска и Ламбе Алабаковски, придружувани од Биг бенд оркестарот, под диригентската палка на Љупчо Мирковски, проследени со специјално визуелно шоу со 3Д-мапирање на портата. Ќе претходи рок-концерт на музичкото училиште „Ентерпрајз“.
Првото издание на „Октомвриски музички поход“ ќе биде кај „Школка“, во Градскиот парк, каде што ќе настапат: групата „Педро Хоризонте“, Стефан Петановски бенд, Занаду бенд, Димиш бенд и диџеите Раста Грл, Чарли и Јаска.
Во ГТЦ, пак, ќе може да се види изложбата „Игри и мечтаења“ на Друштвото на ликовните уметници, а на Факултетот за драмски уметности ќе може да се проследат повеќе театарски претстави, како и филмска и музичка програма. На плоштадот „Филип Втори“ повеќе културно-уметнички друштва ќе изведат традиционални македонски ора.
Во Кинотеката на Македонија ќе може да се проследат македонски филмски и музички достигнувања, а во галеријата „Остен“ ќе биде поставена изложбата „Право на јавни простори“ од Факултетот за архитектура и дизајн на Универзитет „Американ колеџ“. Во Капан ан ќе биде прикажан проектот „Никеја“ со Славе Димитров и Весна Ѓиновска-Илкова, а во Домот на културата „Кочо Рацин“ ќе биде поставена изложбата „Култура во кутија“ на културното јадро „Доминиум“.
Во ноќниот клуб „Пјур“ (Pure) ќе биде одржан „Скопски моден фестивал“ (Skopje Fashion festival), на кој ќе се претстават модните дизајнери Ивана Кнез, Џорџе Башаревиќ, како и Бошко и Цеце Т.
Програмата ќе ја збогатат и културните институции: Културно-информативен центар – Скопје, Детски културен центар „Карпош“, Музеј на Град Скопје, Музеј на современата уметност, Библиотека „Браќа Миладиновци“, НУ Национална галерија, НУ Музеј на македонската борба и самостојност и НУ Турски театар.
Сите настани се од отворен карактер и се бесплатни за посетителите. И оваа година е обезбеден бесплатен јавен превоз за сите граѓани за време на одржувањето на „Бела ноќ 2023“. Бесплатниот превоз ќе може да се користи од вечер, од 18 часот, до 5 часот во недела (1 октомври 2023).
Македонија
Откако протекоа документи за токсично млеко и јогурт, утре директорот на Агенцијата за храна и ветеринарство ќе има прес-конференција

Откако ВМРО-ДПМНЕ денеска објави документи за токсично млеко и јогурт во Македонија, и побараа одговорност од АХВ, попладнево од Агенцијата најавија дека директорот утре ќе го каже својот став.
„Директорот на Агенција за храна и ветеринарство Николче Бабовски, утре, во 11 часот ќе одржи прес конференција. На прес конференцијата директорот Бабовски ќе одговори за прозивките за работењето на Агенцијата“, стои во поканата.
Претходно, Цветан Трипуновски, претседател на комисија за земјоделство, шумарство и водостопанство на ВМРО-ДПМНЕ рече дека „се работи за протеински јогурт увезен од Република Србија, и од него се гледа зголемено ниво на амфлатоксин, вториот документ е лабораториски извештај за млеко од една млекарница од Република Македонија, која исто така покажува присуство на амфлатоксин над дозволената граница“.
Трипуновски праша дали протеинскиот јогурт од соседна Србија и млекото од млекарница во Македонија се пуштени во промет, или истото е преработено и се наоѓа на некој по рафтовите ширум маркетите во Република Македонија?
„Овие документи се уште еден показател дека контролата на млекото и млечните производи, како домашни, така и од увоз, АХВ не ги прави согласно потребите да ги заштити граѓаните од злоупотреби. Сакам да нотирам и дека Националниот систем за брзо известување не функционира, односно вакви известувања не се нотирано“, истакна Триупуновски