Македонија
(Видео) Пендаровски до Сакеларопулу: Договорите треба да се чуваат и да се почитуваат

Претседателот Стево Пендаровски денеска во Атина оствари тет-а-тет средба со претседателката на Грција, Катерина Сакеларопулу, по што се одржа и пленарен состанок на делегациите на двете држави.
На средбите беше констатиран позитивниот тренд на севкупните билатерални односи помеѓу двете држави, но и дека постои потенцијал за понатамошно зајакнување на соработката на секое поле. Беше изразено задоволство дека двете држави го оставија минатото зад себе и се фокусирани кон иднината. На средбите, претседателот Пендаровски изрази благодарност за поддршката од Хеленската Република која станува еден од најгласните поддржувачи на нашата интеграција во Европската Унија и изрази очекувања дека поддршката ќе се интензивира во наредниот период.
Претседателката Сакеларопулу на тет-а-тет средбата му посака добредојде на претседателот Пендаровски и посочи дека оваа прва официјална посета на претседател на Република Северна Македонија на нивната држава е значајна и ќе придонесе за развојот на односите меѓу двете земји. Сакам да подвлечам дека ние вложуваме во зајакнување на нашите билатерални односи и за вашата европска перспектива, рече претседателката Сакеларопулу.
„ Ќе се согласите со мене дека целосното применување на Преспанскиот договор со добра волја е значајно за развој на нашите односи. Веќе поминаа две и пол години од применувањето на Преспанскиот договор, и треба да признаме дека се направени многу позитивни чекори кон спроведувањето, но сепак постојат доста нерешени прашања. Затворањето на овие отворени прашања ќе придонесе за понатамошен развој на нашите односи.
„Ние од наша страна ги разгледуваме сите страни на Преспанскиот договор и се обидуваме да ги решиме сите отворени прашања за подобрување на нашите односи“, истакна на средбата претседателката на Хеленската Република, Катерина Сакеларопулу.
Претседателот Пендаровски истакна дека оваа посета има историска димензија и е значајна, како прва средба на највисоко политичко ниво меѓу две соседни држави после триесет години.
„Ние и претходно имавме одлична соработка, но од 2018 година наваму ја поставиваме таа политичка и правна рамка наречена Преспански договор, која ни овозможи уште подобро да соработуваме. Сакам да ви кажам еден правен принцип кој вие добро го познавате и до кој ние имаме намера да се држиме во однос на Преспанскиот договор. Тоа е „pacta sunt servanda“, или договорите треба да се чуваат и да се почитуваат”, рече претседателот Пендаровски.
Претседателот Пендаровски додаде дека се согласува со квалификацијата дека многу работи се направени во изминативе две ипол години во имплементација на Договорот.
„Јас би рекол најголемиот, најтешкиот дел се имплементирани, се разбира има уште неколку работи кои треба да се завршат, и ние имаме јасна политичка волја и намера да го спроведеме тој договор до последната буква“, истакна претседателот Пендаровски на средбата со претседателката на Хеленската Република.
Претседателот посочи дека Комисијата за историски, археолошки и образовни прашања и Комисијата за трговските брендови имаат договор за следна средба. „Тие имаа одреден застој во работата, но очекувам сега тоа време да се искомпензира, да се надомести и да почнеме со забрзан ритам да ги решаваме преостанатите прашања кои се на агенда“, додаде претседателот Пендаровски на средбата.
„Преспа нас ни овозможи да влеземе во НАТО Алијансата и следната наша цел за која очекуваме ваша помош и поддршка е да почнеме преговори со Европската Унија и да го заокружиме нашиот европски и евроатлантски сон. Да не заборавиме кој е целиот наслов на Преспанскиот договор. Тој не е само за решавање на проблемот со името, туку и за воспоставување на стратешко партнерство меѓу нашите две држави“, истакна претседателот Пендаровски на тет-а-тет средбата со претседателката Сакеларопулу.
На пленарниот состанок на двете делегации беше потврдена поддршката од Хеленската Република за европската перспектива на Република Северна Македонија и земјите од Западен Балкан и беше реафирмирана подготвеноста за целосно применување на Преспанскиот договор.
Претседателот Пендаровски истакна дека доследното спроведување на Преспанскиот договор ќе биде доказ дека Хеленската Република ги почитува преземените меѓународни обврски.
На состанокот, Претседателот се заблагодари за солидарноста и донираните вакцини, како и за помошта во справување со неодамнешните пожари во Гевгелија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Таравари за „Макфакс“: Има реални шанси денес или утре да се заврши договорот за влез на Алијансата во Владата

Привршуваат преговорите за распределбата на ресорите помеѓу Владата и Алијансата за Албанците. Ова за „Макфакс“ го потврдува партискиот претседател Арбен Таравари. По дефинирањето на програмските определби, се привршува и со другите отворени прашања.
„Сè уште нема дефинитивна одлука. Има реални шанси денес или утре да се заврши“, вели Таравари за „Макфакс“.
Засега, иако неофицијално, извесно е кои две министерства ќе им припаднат на кадри од Алијансата за Албанците. Тоа се Министерството за здравство, со кое моментно раководи Алтернативата, и Министерството за правда, со кое моментно раководи кадар на СДСМ.
Извесно е дека Таравари и неговата партија ќе добијат и директорски места во повеќе институции.
Маја Терзиова
Македонија
За набавка на „трикафта“ за осум пациенти, Собранието треба да смени три закони

Министерот за здравство, Беким Сали, ќе иницира измени на три закони за да се овозможи набавка на лекот „трикафта“ за пациентите со цистична фиброза преку директни преговори со фабриката производител. Иако се стремеле да го набават лекот за вкупно 30 пациенти, во првата набавка извесно е дека ќе се обезбеди терапија, само за осуммина, чија состојба е критична, за другите е само стремеж.
„Давањето законска можност за директно преговарање со фабриката може да ни овозможи пониска цена за терапијата поради барањето условите за преговарање да не бидат јавни затоа што фабриките имаат регионални политики и даваат посебни понуди за одредени држави. Знаејќи ги условите кај нас, тие сигурно би дале за нас пониска цена. Во контакт сме со фабриката и се подготвуваат законските измени, кои ќе ни овозможат директно да преговараме. Законот за лековите, Законот за јавните набавки и Законот за здравственото осигурување се законите што треба да ни го овозможат тоа“, рече министерот Сали.
Средства за терапијата за првите осуммина пациенти ќе обезбеди Фондот за здравствено осигурување, а набавката на лекот би одела преку Клиниката за педијатрија. Во тимот за преговори министерот Сали најави дека ќе биде и член на Асоцијацијата за цистична фиброза, кој ќе може да известува за разните фази од набавката.
Министерот Сали денес уште еднаш објасни дека набавката на лекот „трикафта“ не е планирана во буџетот за годинава. Тој се надева дека в година Министерството и Фондот за здравство ќе бидат подобро спремни за набавка на лекот за другите пациенти.
Во саботата пациентите со цистична фиброза преку протест пред Владата им кажаа на институциите дека лекот треба да се набави за сите и оти немаат време за долги процедури за набавка.
Македонија
Гаревски: Бидете спокојни, земјотресот во Турција со сигурност нема да ја стресе Македонија

Разорниот земјотрес во Турција нема да ја стресе Македонија, уверува професорот Михаил Гаревски. Тој за „Макфакс“ вели дека Македонија може да здивне бидејќи во следниот период од неколку месеци не се очекуваат потреси. Нагласува дека земјотресите не може да се предвидат, но земјотрес со поголема јачина не се очекува.
„Бидете спокојни, земјотресот во Турција со сигурност нема да ја стресе Македонија. Ние сме друго сеизмичко подрачје и далечината од источно-анадолскиот расед е преголема за да се трансферира редистрибуцијата на напрегањето од денешниот земјотрес“, вели Гаревски за „Макфакс“.
Професорот објаснува дека земјотресот во Турција од утрово не е изненадување имајќи предвид дека земјата е едно од најтрусните подрачја на светот заедно со Јапонија, Индонезија, Америка и Чиле.
„Ваков земјотрес не е за изненадување, но сепак ова е еден од најголемите земјотреси во историјата на Турција. Таму најсилниот земјотрес што се случил во 1939 година бил во градот Езерџан со магнитуда од 7,9 степени според Рихтер и имал 17.000 жртви. Езерџан се наоѓа на почетокот на северно-анадолскиот расед долг 1.200 километри. Земјотрес со магнитуда од 7,4 степени според Рихтер се случи и на крајот на истиот расед во близина на Истанбул во 1999 година, исто така со 17.000 жртви. Тогаш ја предводев екипата од Македонија, која излезе по две недели од земјотресот. Глетката беше стравотна, како и оштетувањата. Констатацијата беше дека бројот на жртви е предизвикан и поради исклучително слабите градби“, додава Гаревски за „Макфакс“.
По 1999 година, Гаревски цени дека Турција многу ги зајакнала контролите и мерките за сигурна градба. Имајќи ја предвид јачината на сегашниот земјотрес, Гаревски смета дека на градбите навистина се внимавало, а тоа го покажува бројот на жртви.
„Засега бројот на жртви, официјално, е 1.500. Би бил среќен да се остане на тоа. Но, имајќи ја предвид силината на земјотресот, очекувано е бројот на загинати да надмине 5.000 жртви. Но, дај боже, да грешам“, посочува професорот.
Според Гаревски, во регионот околу земјотресот во Турција очекувани се афтершокови, чиј интензитет ќе се намалува.