Гаврил Бубевски, основниот јавен обвинител на ОЈО Скопје ја назначи Искра Хаџи Василева јавната обвинителка од истата институција како лице за контакт во врска со предметите поврзани со безбедноста на новинарите, кои се во надлежност на Основното јавно обвинителство Скопје.

Одлуката која пристигна на адреса на ЗНМ е донесена врз основа на заклучоците од состанокот на Бубевски со претставници на Здружението на новинарите на Македонија (ЗНМ) и Самостојниот синдикат на новинари и медиумски работници (ССНМ), што се одржа на 27.05.2022 година.

ЗНМ со години наназад постојано работи на кампањи за кревање на свеста за состојбата на новинарите и медиумските работници каде што акцентот е ставен безбедноста на новинарите како и на проблемот со неказнивост на напаѓачите. Токму заради овие причини, една од препораките на ЗНМ до ОЈО Скопје беше формирање на посебно одделение со цел да се зголеми безбедноста на новинарите. Сето ова е во согласност со препораките на Совет на Европа со крајна цел – да се иницираат системски промени за подобрување на моменталната состојба.

Јавната обвинителка Хаџи Василева има надлежност да го следи постапувањето во предметите во кои во својство на оштетени, сведоци или пријавени лица се јавуваат новинари кои ги извршувале своите работни задачи.

Во одлуката се вели дека ОЈО Скопје и останатите јавни обвинителства ќе даваат приоритет во постапувањето по предметите поврзани со безбедноста на новинарите и ќе продолжат во оваа насока да ја унапредуваат соработката со новинарските здруженија, со цел да се санкционира секое кривично-правно загрозување на слободата на изразување.

Втор ден Министерството за одбрана молчи за украдените класифицирани документи и за украдените компјутери на кои имало строго доверливи документи, реагира Драган Ковачки од ВМРО-ДПМНЕ.

„Голем срам е министерството за одбрана на НАТО членка да биде нетранспарентно за ваков настан, а уште поголем срам е да си неспособен да заштитиш класифицирани документи и компјутери. Ова е случај кој мора да заврши со кривична одговорност и кон одговорните кои не преземале мерки и овозможиле поединци или група да во сред центар на градот, се осмелат да влезат во заштитен објект на министерството за одбрана и да крадат документи и компјутери“, пишува Ковачки.

Појаснува дека според Законот за класифицирани информации, класифицирана информација со степен „Строго доверливо“ е информација чие неовластено откривање би предизвикало исклучително сериозна штета за виталните интереси на Република Македонија.

„Кога се крадат класифицирани документи (мобилизациски) со степен на тајност Строго Доверливо, а за тоа молчи Министерот – Славјанка Петровска, а молчи и Врховниот Командант – во случајов Стево Пендаровски, се отвора сомнеж дека сакаат да го прикријат настанот со цел да се спасат од одговорност“, додава Ковачки.

После ваков скандал, како што додава, министерот за одбрана треба да си поднесе оставка, а Претседателот на државата треба помалку да зборува за енергетската состојба која не му е во надлежност, туку да се заинтересира за тоа кој и зошто се дрзнал да краде мобилизациски и друг тип на документи, како и за тоа колкава штета е нанесена на Одбраната во која тој има надлежност

ВМРО-ДПМНЕ и во време на енергетската криза, исто како и во време на пандемијата со коронавирусот се однесуваат неодговорно и себично, со разни блокади и опструкции работат на штета на граѓаните,се вели во соопштението од СДСМ.

Од партијата наведуваат дека наместо со фабрикувани лаги и клевети да го напаѓаат претседателот на СДСМ и премер, Димитар Ковачевски, во обид да го прикријат фактот дека се фатени во криминал со нивните зделки во тендер од 136 милиони евра, од ВМРО-ДПМНЕ требаше да го повикаат својот лидер Мицкоски во време на криза струјата што ја произведува и продава од хидроцентралите, бесплатно да им ја отстапи на граѓаните.

Но, очигледно е дека Мицкоски е против тоа, очигледно е дека повеќе сака да ги полни своите џебови отколку да им помага на граѓаните.

Во време на светска економска и енергетска криза, но и години претходно, Мицкоски си го полнел џебот продавајќи електрична енергија од своите хидроцентрали. Ако е загрижен за струјата и стандардот на граѓаните, Мицкоски ќе ја отстапи бесплатно струјата од своите хидроцентрали за граѓаните, се вели во соопштението.