Утре ќе биде сончево и натпросечно топло со слаб до умерен ветер од западен правец. Минималната температура ќе биде во интервал од 14 до 24, а максималната ќе достигне од 35 до 43 степени. Вредноста на УВ-индексот ќе биде многу висока и ќе изнесува 9.

Во Скопје сончево и натпросечно топло со слаб до умерен ветер од западен правец. Минималната температура ќе се спушти до 20, а максималната ќе достигне 42 степена.

Под влијание на многу топла воздушна маса од југ продолжува периодот на стабилно и исклучително многу топло време до 6 август со натпросечни температури за овој период од годината.

Ќе биде активирано портокалово ниво на опасност од високи температури, а вредноста на УВ-индексот ќе изнесува 9. Наместа по должината на Повардарието температурата ќе го надмине и 42. степен.

Министерството за образование и наука изразува жалење што денеска, поради опозициската ВМРО-ДПМНЕ во Собранието, како што се наведува, испуштена е можноста за усвојување на измените на Законот за наставниците и стручните соработници, со кои се обезбедуваат повеќе права и се унапредува економскиот и општествниот статус на наставниците.

„Очигледно е отсуството на интерес кај претставниците на најголемата опозициска партија во парламентот за придонес кон подобрување на состојбите во областа на образованието, првенствено преку подигнување на мотивацијата за работа на наставниците и стручните соработници во основните и средните училишта во државата. А тоа е нешто што го обезбедува ова современо законско решение“, велат од МОН.

Од МОН појаснуваат дека законот уредува дека сите нови вработувања во училиштата ќе бидат директно на неопределено време наместо како досегашната практика да се чекаат две години за почнување процес на трансформација, а воедно и сите наставници и стручни соработници, кои во овој момент се ангажирани на определено време, со стапувањето во сила на законските измени ќе добијат решение за трајно вработување доколку ги исполнуваат предвидените законски услови.

Законското решение, додаваат од МОН, овозможува професионален и кариерен развој за вработените во училиштата, како и следење и оценување на работата уште од првиот ден на стапувањето во редовен работен однос. Воедно, првпат законски се дефинираат компонентите на платата на наставниците и стручните соработници, со што се овозможува исплата на додатоците на плата за претходно стекнатите педагошки звања како резултат на успешност во работењето, додатокот за одделенско, односно класно раководство, за работа во комбинирана паралелка и за работа во ридско-планинско подрачје за кои во минатото имаше реакции дека не се исплаќаат од страна на училиштата.

Решението предвидува и исплата на целосна плата за неполн неделен фонд на часови на наставниците кои ќе реализираат воспитно-образовна работа според наставен план и програми донесени во согласност со Концепцијата за основно образование и воспитание доколку имаат минимум 10 наставни часа во неделата. А предвидено е и покачување на платите на наставниците со секое зголемување на минималната плата.

Град Скопје ќе му додели парична награда во износ од 300.000 денари на добитникот на сребрениот медал во теквондо (категорија над 80 килограми) на Олимписките игри во Токио, Дејан Георгиевски.

Оваа одлука, на иницијатива на градоначалникот Петре Шилегов, ќе се најде на дневниот ред на следната седница на Советот на Град Скопје.

Георгиевски предмалку слета на аеродромот во Скопје каде што беше пречекан од голем број граѓани, а свечениот пречек ќе се одржи во 19:30 часот на плоштадот Македонија.

Дејан Георгиевски по историскиот настап на Олимписките игри, каде што го освои сребрениот медал, стана најуспешниот македонски спортист на Олимписките игри, а ова е прв медал за нашата држава по пауза од 21 година.